మరీచికవో మలయవీచికవో
నా మనోనావ దిక్సూచికవో
విధి చేతి పాచికవో నా బ్రతుకు సంచికవో
అపురూప సాలభంజికవో
ఎన్నాళ్ళు నాకు ప్రతీక్ష ఎందుకే ప్రేమ పరీక్ష
లక్ష్యపెట్టట్టానికేల లలనా నీకీ వివక్ష

1.నింగి నీవు నేల నేను
దిక్చక్రమల్లె తోచే మన సంగమం
ఎండ నీవు వాన నేను
సింగిడినే తలపించే మన ప్రణయం
ఊహలకే పరిమితమైతే
మనుగడకు ఊతమేది
ఆశించుటె దోషమైతే
చితికి పోని జీవితమేది

2.ముంచవూ తేల్చవూ
వినోదిస్తావూ నే మునకలేస్తుంటే
ఔననవూ కాదనవూ
ఆనందిస్తావు నే సతమతమైపోతుంటే
ఒప్పుకుంటే ఇలయే నాకం
తప్పుకుంటె భవితే నరకం
కొట్టుమిట్టాడుతున్నా
నేనున్నది త్రిశంకు స్వర్గం