రచన,స్వరకల్పన & గానం:డా.రాఖీ

జడత్వమే ఆదరువు నియంత్రణే నాకు కరువు
శాఖోపశాఖలై విస్తరిల్లె నా కవన తరువు
నిమిషమైన మోయలేను నాలో భావాల బరువు
గీతమై వెలువరించ నా మనసే ఆపోవు
కవనమే నాకు జీవనం గీతమే ప్రియతమం

1.పగలు లేదు రాత్రి లేదు ఇపుడపుడని లెక్కలేదు
భక్తీ రక్తీ ముక్తీ దేశానురక్తిగా విషయమొక్కటని కాదు
అనుకోని అతిథిగా ఏదెపుడెద తడుతుందో
ఏ రూపుదిద్దుకొని ఎలా వెలుగు చూస్తుందో
కవనమే నాకు జీవనం గీతమే ప్రియతమం

2.ఊపిరాడని ఒత్తిడి ఎన్నెన్నో సవాళ్ళ  దాడి
రచనచేయ అడుగడుగున అవాంతరాల సుడి
దొరికిన సమయాన్ని లిప్తపాటు వదలను
అనుకున్న అనుభూతి వచ్చు వరకు వదలను
కవనమే నాకు జీవనం గీతమే ప్రియతమం

3.ప్రశంసలు విమర్శలు ఏవైతేం స్పందనలు
సత్కారం బహుమానం కావు తూచు తూనికలు
పాఠకుల ఎదలోన స్థిరపడాలి పదిలంగా
అభిమానుల మన్నలు పొందాలి ఘనంగా
కవనమే నాకు జీవనం గీతమే ప్రియతమం