అలజడి రేపకు చెలికాడా
ప్రశాంత మానస సరోవరానా
చిత్తగు ఒత్తిడి వద్దుర మగడా
గుంభనాల సంసార సాగరానా
దొరికావులే సరిజోడుగా తపించగా వరానా
మన సంగమాలెపుడూ ప్రేమదీవి తీరానా

1.చీకాకుల అనుదినచర్యకు ఆటవిడుపు నువ్వు
చీకటి ముసిరిన రాతిరికి పొద్దుపొడుపు నువ్వు
నిస్సారపు జీవనఝరికి కొత్తదైన మలుపే నువ్వు
నీ తలపులు నాలో లోలో చల్లని వెన్నెలలే రువ్వు
దొరికావులే సరిజోడుగా తపించగా వరానా
మన సంగమాలెపుడూ ప్రేమదీవి తీరానా

2.నా మది కిటికీ తెరవగనే మలయానిలమై దూరేవు
నెమ్మది నెమ్మది వేదన నార్పే సాంత్వననే కూరేవు
పనిబడి బడలిక తీర్చేమందగు లాలిపాటగా మారేవు
నిద్దురలోకి జారగనే మధుర స్వప్నమై నను చేరేవు
దొరికావులే సరిజోడుగా తపించగా వరానా
మన సంగమాలెపుడూ ప్రేమదీవి తీరానా