రచన,స్వరకల్పన&గానై:డా.రాఖీ
ఎలా చిక్కుబడతామో-ఎపుడు రాలిపోతామో
ఒంటిగా మొదలౌను పయనం-ఒంటిగానే చేరేము గమ్యం
కాలం నదిలో కొట్టుక పోయే కట్టెపుల్లలం
ఏవెంతవరకు కలిసిసాగునో
ఏవెప్పుడు వేరై వీడిపోవునో
1.విధిచేతి కీలుబొమ్మలం మనం తోలు బొమ్మలం
భగవంతుడు ఆడుకొనే చదరంగపు పావులం
పాత్రోచితంగా నటిస్తున్న రంగస్థల పాత్రలం
పాములు నిచ్చెలు ఆశానిరాశలౌ వైకుంఠపాళీ గవ్వలం
ఎవరు ఎలా ఆడాలో ఎప్పుడెవరు ఓడాలో
సూత్రధారి నిర్ణయాన మనం నిమిత్త మాత్రులం
2.తలిదండ్రులు భార్యాబిడ్డలు వింతైన బంధాలు
చరాచరాలపైనా వదులుకోలేని అనుబంధాలు
రక్త సంబంధాలు తెగని ఆత్మ బంధనాలు
కలిసిన బాంధవ్యాలు వ్యామోహ పాశాలు
ఏవీ మనను పట్టి ఉంచలేవు కాలమాసన్నమైతే
వద్దన్నా వదిలి వెళ్ళిపోతాము కాలుని ఆనతి ఐతే
No comments:
Post a Comment