హృదయవీణ మీటితే ..పలుకుతుంది అనురాగం

పెదవి వేణువూదితే కలుగుతుంది ప్రేమ యోగం

గీతం నీవు సంగీతం నీవు నా జీవితానికి సంకేతం నీవు

ఆ రాధనే నీవు ఆరాధన నోచేవు  

మరపురాని ప్రణయ గాధవైనావు

1.కను కలువలు విచ్చినంత మందహాసం

సంపంగి నాసిక పూయగ వింతహాసం

చెంపల రోజాలు విరియగ దరహాసం

అధర మందారాలు మురియగ చిరుహాసం

మొత్తంగా మోమంతా  వెలిసింది పూవనమై

చెలీ నీవు చేరువై  నీవైనావు నాజీవనమై

2.పదహారు ప్రాయమై పరవశించెనీ పరువం

ప్రేమైక లోకమై పరిమళించెగా మరువం

తాకితే మాసిపోయె అపరంజి నీతనువు

మన్మథుడే ఎక్కిడిన పంచబాణ ధనువువు

మన కలయిక కానీయకు ఎన్నటికీ మరీచిక

నిస్సారపు నా బ్రతుకున నీవే నాకు వేడుక