రచన,స్వరకల్పన&గానం:డా.రాఖీ

ప్రతి దినమూ  ప్రత్యేకమే

కదిలించే ఎద ఎదుటేఉంటే

అనునిత్యం పరమానందమే

అనుభూతి చెందే మనసుంటే

నిన్నకు నేటికి రేపటికెంతో వ్యత్యాసం

అనుక్షణం అనుభవించుటకె మనకోసం

1.మండే ఎండలు ఒకనాడు

ముంచే వానలు మరునాడు

హాయగు వెన్నెల ఒక మాసం

మనసలరించగ శీతాకాలం

ఆటుపోటులు జీవితాన అతిసామాన్యం

ఒడిదుడుకులలో స్థిరమగు మనసే ధన్యం

2.నవ్వేవేళలొ  బాధల మననాలు

దుఃఖపు ఘడియల ఏవో బింకాలు

నిన్నటి చింతలలో క్షణం  జారిపోతుంది

రేపటి చింతనలో నేడు మారిపోతుంది

నవ్యంగా సాగించాలి  నిరంతరం మనయానం

సవ్యంగా యోచిస్తే మానవజన్మే బహుమానం