రచన,స్వరకల్పన&గానం:డా.రాఖీ
రాస్తూనే ఉన్నా కరగని గుండెకోసం కవితలెన్నో
తెలుపుతూనే ఉన్నా ప్రతినిమిషం విరహపు వెతలెన్నో
ఇంతకన్న నరకం వేరే ఉంటుందా
చింతలేని నాకం నీ చెంతన లేకుందా
మనసెరిగీ మౌనం ఏలనే
మది తెలుపగ జాప్యం ఏలనే
1.మాటల్లో చెప్పాను నర్మగర్భంగా
చేతల్లో చూపానే ప్రతి సందర్భంగా
ప్రతిపదార్థతాత్పర్యం విప్పిచెప్పలేను
విడమరచి వివరంగా ఎరుకపరుచలేను
మనసెరిగీ మౌనం ఏలనే
మది తెలుపగ జాప్యం ఏలనే
2.పరికించమన్నాను చిలకా గోరింకల
తిలకించమన్నాను జంట పావురాల
అంతరార్థమేదో ఆమాత్రం గ్రహించలేదా
ప్రేమ సూత్రమదియేదో సంగ్రహించలేదా
మనసెరిగీ మౌనం ఏలనే
మది తెలుపగ జాప్యం ఏలనే
No comments:
Post a Comment