ఆనందం..!కణకణమున..క్షణ క్షణమున..

రాఖీ||ఆనందం..!కణకణమున..క్షణ క్షణమున..!!||

పెంచుకొన్న పావురాన్ని–అరచేతిలొ ఉంచుకొని

ప్రేమగా నిమిరితే ఎంతటి ఆహ్లాదమో..

సాదుకొన్న రామ చిలకని-ముంజేత పెట్టుకొని

జిలిబిలిగా పలికితే ఎంత మోదమో..

దొరకని దెక్కడా-ఆనందమె అంతటా

అనుభవించు హృదయముంటే లభియించును అన్నిటా

1.       నింగి లోని సింగిడి చూసి-అబ్బురంగ ఆస్వాదిస్తూ

మైమరచి పోతుంటే పరితోషము..

ఊరవతలి చెరువు లోనా-వచ్చీరాక ఈడులాడుతూ

కేరింతలు కొడుతూ ఉంటే సంతోషము..

దొరకని దెక్కడా-ఆనందమె అంతటా

అనుభవించు హృదయముంటే లభియించును అన్నిటా

2.       తొట్లెలోని పాపతోటి-వెర్రి మొర్రి చేష్టలు చేస్తూ

తుళ్ళి తుళ్ళి నవ్విస్తుంటే..చెప్పరాని పరవశము

కల్లాకపట మెరుగని వారితో-కల్మషమే లేని మనసుతొ

కబురులాడుతుంటే కొదవలేని హర్షము...

దొరకని దెక్కడా-ఆనందమె అంతటా

అనుభవించు హృదయముంటే లభియించును అన్నిటా

3.       కోరి కోరి పొందిన దాన్ని-అడిగినదే తడవుగా

ఆత్మీయుల కందజేస్తే అభినందము

పోరి పోరి గెలిచిన దాన్ని-నవ్వుతు తృణప్రాయంగా

పరాజితుల కొదిలేస్తే ప్రహ్లాదము

దొరకని దెక్కడా-ఆనందమె అంతటా

అనుభవించు హృదయముంటే లభియించును అన్నిటా

“సంగీతా౦గన”

“సంగీతా౦గన”

నఖ శిఖ పర్యంతమూ

నువ్వే సంగీతమూ

ఏ చోట మీటినా 

అద్భుత మగు నాదము

1.       నువ్వు నవ్వు నవ్వితే

మువ్వలే మ్రోగుతాయి

నీ నడకలు సాగితే

మృదంగాలు నినదిస్తాయి

చేయి కదిపినావంటే

సంతూరు స్వానమే..

కన్ను గిలిపినావంటే

సారంగి సవ్వడే

2.       పలుకు పలికి నావంటే

వీణియ బాణము.

గొంతు విప్పినావంటే

సన్నాయి మేళము

మేను జలదరించెనా

జలతరంగమే

మౌనము దాల్చినా

తంబురా రావమే

ప్రేమ పట్టకం(ప్రిజం)

ప్రేమ పట్టకం(ప్రిజం)

వర్ణాలు రెండే ఈ ప్రేమకు

వర్ణాలు మెండే ఈ ప్రేమకు

తెల్లగా కనిపిస్తుంది-మెల్లగా కబళిస్తుంది

చల్లనీ బ్రతుకులనెన్నో నలిపి నలుపు చేసేస్తుంది

1ఊదా రంగు ఊహల్లో విహరింప జేస్తుంది

నేరేడువన్నెయే   ఆశలు కలిపింప జేస్తుంది

నీలిరంగు మేఘాల్లో తేలియాడ జేస్తుంది

ఆకుపచ్చ కలలెన్నో కనుల కలగజేస్తుస్తుంది

మంత్రాలు వేస్తుంది-మాయలెన్నొ చేస్తుంది

కన్నుమూసి తెరిచే లోగా పంజరాన బంధిస్తుంది

2.పసుపు పచ్చ  బంధాలే పెనవేస్తుంది

బంగారు భవితను చూపి మురిపిస్తుంది

సంజె కేంజాయిలోనా ..రంజింపజేస్తుంది

రక్తానురక్తిగా జీవితాన్ని మార్చేస్తుంది

మత్తు కలుగ జేస్తుంది-మైకాన్ని కమ్మేస్తుంది

ఏడేడు జన్మలదాకా వెంటాడి వేధిస్తుంది

https://youtu.be/QtMSjoxIcHk

స్వయం’భు’వన మోహిని

వర్ణించలేదు ఎవరూ..కావ్యాలలో...- 
తిలకించలేదు ఎపుడూ...స్వప్నాలలో...

సాక్షాత్కరించినావు....రెప్పవేయనీయనట్లుగ- ప్రత్యక్షమైనావు  .....సాగిలపడునట్లుగా

        ప్రసాదించవే చెలి... క్రీగంటి వీక్షణం.

       కై౦కర్యమైపోతానే.నా.జీవితాంతం

1. సుందరాంగులెందరో...చేస్తారు వందనాలు..

అందగత్తెలె౦దరో....దాసోహమంటారు

ముజ్జగాల ముదితలు సైతం చేష్టలుడిగి చూస్తారు

బ్రహ్మ కూడ నిన్ను చూసి బిత్తర పడిపోతాడు      

అతిలోక సుందరీ..అన్న పేరు నీదేనేమో.

నీ దర్శన భాగ్యమే నా పూర్వ పుణ్యమేమో

2. దేవతవు నీవనను..మాయమైపోదు వేమో..

అప్సరసవు నీవనను...అందకుండా పోదువేమో..

నీ దరహాసం కురిసే  శరత్కాల జ్యోత్స్న లు

నీ నయనాల మెరిసే నక్షత్ర జ్యోతులు

ఏమందు నే నిన్ను కుందనాల బొమ్మా..

తనివిదీర నిన్నుగనగ  సరిపోదు ఒక జన్మ

3.  పెద్దన నిను చూసి ఉంటే..ఉన్మత్తుడయ్యే వాడేమో..

శ్రీనాథుడు నిన్ను గాంచి ఉన్మదితుడుఅయ్యేనేమో

వర్ణాలు  సరిపోవే..నిన్ను వెలయించ

పదములకు..పాటు గాదే..నిను ప్రస్తుతించ

మతిభ్రమించకముందే..నన్ను కాస్త దయగనవే

వెర్రి శ్రుతి మించక ముందే..నన్నిక గైకొనవే..

https://youtu.be/J28G1OQatq4?si=zd9nMMhsYks8uLCC

అమ్మా శ్రీ లలితా శివాత్మికా - నివాళి నీకిదే నిర్మల చరిత

కాత్యాయిని కాదంబరి కమలలోచని- సహస్ర నామాంకిత సకల లోకజనని

1.    అతివలంత జేరి నిను ధ్యానించిరి- అలివేణులందరూ ఆసన మందించిరి

అ౦గనలంత కలిసి అర్ఘ్యాదులనిచ్చిరి- పడతులంత గూడి పాదపూజ జేసిరి

                                                          ||అమ్మా శ్రీ లలితా ||

2.     అంబుజాక్షులందరూ అభ్యంజన మొనరించిరి- వనితలంత నీకు పట్టు వస్త్ర మిచ్చిరి

గరిత లంత జేరి గంధమ్ము బెట్టిరి -తెరవ లంత నీకు తిలకమ్ము దిద్దిరి

                                                          ||అమ్మా శ్రీ లలితా ||

3.     పూబోడులంత నీకు పూమాలలు వేసిరి- సుదతులంత నీ సహస్ర నామాలు చదివిరి

తరుణులంత తపన పడి ధూపమ్ము వేసిరి- ప్రమదలంత భక్తితొ ప్రమిదలు వెలిగించిరి

                                                          ||అమ్మా శ్రీ లలితా ||

4.     నెలతలంత నీకు నైవేద్యము నొసగిరి- ముదితలంత ముదమార తాంబూల మిచ్చిరి

హేమలంత ప్రియమారగ హారతులిచ్చిరి- కాంతల౦త ముక్తకంఠ గీతమాలపించిరి

                                                          ||అమ్మా శ్రీ లలితా ||

5.    భామలంత కలిసి నీ భజనలు జేసిరి- నారీమణులందరూ నాట్యాలు జేసిరి

మగువలంత నీకు మనసారా మ్రొక్కిరి- రమణులంత నీ ముందర సాగిల పడిరీ

                                                         ||అమ్మా శ్రీ లలితా ||

                                                                                  

తిప్పల రెప్పలు

.
చెప్పిన మాట వినవు-కనురెప్పలదెంత హఠము
వద్దని వారిస్తున్నా -నిద్దుర కొరకే..తగవు
కలనైనా..కననీవు-తలపులసలు రానీవు
మూయాలనుకొంటే..మూతలు పడవు
తెరవాలనుకొంటే..ఎంతకు విడివడవు

.
1. భువిభారం మోయునట్లుగా.. ధనగారం..దాయు నట్లుగా
కను స్వేచ్ఛను కాయునట్లుగా...తము ధర్మం తప్పనట్లుగా
సైనికులై పహారాలే..వేస్తుంటాయి..పాలకులై. కట్టడులే చేస్తుంటాయి
కలనైనా..కననీవు-తలపులసలు రానీవు
తెరవాలనుకొంటే..ఎ౦తకు విడివడవు||

2. అలసిన *కుడి సేదదీరగా..విచలిత మది విశ్రమించగా
వేదనలలో ఊరడిల్లగా..ఇహపరముల కతీతమ్ముగా
కోరుకున్న వారినీ..లేక్కచేయవు –వేడుకున్నా ఏమాత్రం చెవిని పెట్టవు
కలనైనా..కననీవు-తలపులసలు రానీవు
మూయాలనుకొంటే..మూతలు పడవు||

3. ప్రేమికులతొ పగలే బూను ..రోగులకూ..వైరుల తీరు
విద్యార్థుల కిల విరోధులే..రసికుల పాలిటి రిపులే
విద్యుక్త ధర్మాన్నీ విస్మరించ లేవు...సందర్భ సహితంగా ప్రవర్తించలేవు
కలనైనా..కననీవు-తలపులసలు రానీవు
మూయాలనుకొంటే..మూతలు పడవు
తెరవాలనుకొంటే..ఎ౦తకు విడివడవు

*కుడి = శరీరం..దేహము..

https://youtu.be/xo3XIJuBlVU

రచన:డా.గొల్లపెల్లి రాంకిషన్ రాఖీ "సరస్వతీ నమస్తుభ్యం.!!"

రాగం :మోహన 

వరవీణా మృదు పాణీ-నమోస్తుతే పారాయణీ
సంగీతామృత తరంగిణీ-సారస్వతపుర సామ్రాజ్ఞి
మంద్రస్వర వీణ గాన ప్రియే-మంజుల చరణ శింజినీ నాదమయే
పాలయమాం..పరిపాలయమాం.. పాలయమాం..పరిపాలయమాం...

1.అక్షర రూపిణి-అక్షర దాయిని-భాషా లక్ష్మీ భావమయి
అగణిత పదయుత- అద్భుత పదనుత- విద్యాదేవీ వాక్య మయి
అతులిత జ్ఞాన -ప్రదాయిని భారతి –మేధావిని హే వేద మయి
పాలయమాం..పరిపాలయమాం.. పాలయమాం..పరిపాలయమాం...

2. సుస్వర మార్దవ –మాధుర్యాన్విత –గాత్రప్రదాయిని గానమయి
శ్రుతిలయ పూరిత –భావగర్భిత-నాదవినోదిని మోదమయి
రాగ తాళ సమ్మేళన గీతా-వాణీ మహదను రాగమయి
పాలయమాం..పరిపాలయమాం.. పాలయమాం..పరిపాలయమాం...