కుంతల జలపాతం నీ నవ్వుల్లో
కురిసెను మకరందం నీ పలుకుల్లో
మంజుల భాషిణీ సుమధుర హాసినీ
నీ డెందము కవితల అందలం
నీ అందము భూతల నందనం

1.పాలకడలియందు ఆవిర్భవించినావొ
పూల పరిమళాలే నీమేనదాల్చినావో
క్షీరజ సంబంధి చందన సౌగంధి
నీవదన కమలం సూర్యకిరణ వికసితం
నీ నయన కుముదం చంద్రాతప హసితం

2.కఛ్ఛపినే ఇఛ్ఛగా వెంటతెచ్చుకున్నావో
పెదవులు వేణుధరునికిచ్చుకున్నావో
మానవ కలకంఠీ అభినవ సితికంఠీ
గంధర్వ గానాలు నీకే ఇల సొంతం
నాట్యశాస్త్రమే నీ నడకలు ఆసాంతం