తోమాల సేవకు ఏమాలలల్లను
నీ మాలకోసము ఏపూలుచెల్లును
పూలెన్నొ దొరికేటి ఏ తోటకెళ్ళను
నా తోటే నాకుడి నీకే చెల్లింతును
తిరుమలగిరివాస అలసెను నా శ్వాస
నా వపువు వాడకనే మెడను దాల్చు నీవాడిగ
1.నీమాల నెరుగను నీ నామాలను మినహా
వేదాల నెరుగను నీ దివ్య పాదాలు వినా
మంత్రాలనెరుగను నీ మహిమలు మాత్రమే
ఏ పూజలెరుగను నీ పుణ్య కథా శ్రవణమే
తిరుమలగిరివాస అలసెను నా శ్వాస
నా వపువు వాడకనే మెడను దాల్చు నీవాడిగ
2.తనువులొ అణువణువు తులసీదళమే
నయనాలు కలువలు సర్వదా నీ పరమే
నా నవ్వుల మల్లెలను కర కమలాలను
ఎద గులాబీని కూర్చి అల్లివేతు మాలలను
తిరుమలగిరివాస అలసెను నా శ్వాస
నా వపువు వాడకనే మెడను దాల్చు నీవాడిగ
No comments:
Post a Comment