రచన,స్వరకల్పన&గానం:డా.గొల్లపెల్లి రాంకిషన్ రాఖీ

కాపురాలకెసరొచ్చే రేపల్లెలో నీ మాయ జిక్కి కృష్ణా

గోపికలే మైమరచేరు నువు మభ్యపెడితె దొంగ కృష్ణా

మచ్చిక చేసుకొనగ నిను మించరెవరు కొంటె కృష్ణా

నువు విసిరే వలలొ పడని వనితే లేదు వంశీకృష్ణా

1.నాదస్వరమల్లే మురళిని వాయించి లొంగదీస్తావు

పొగడ్తలే కుమ్మరించి గొల్లభామలందరి ఉల్లము దోస్తావు

నీ మాటల మత్తులో చిత్తుకాని చిత్రాంగి ఇలలో లేదు

నీ అక్కునజేరాక మతిపోని అతివంటూ ఉండనే ఉండదు

2.ఇంటిలోన బొంకి సైతం నీ వంకవచ్చేరు జంకులేక

ఒంటి పైన ధ్యాసేలేక నీ వెంటబడతారు కాదు కుదరదనక

అష్టభార్యలందరినీ ఆకట్టుకున్నావు కనికట్టుచేసేసి

ఇష్టసఖులెందరున్నా వద్దనక మురిపిస్తావు ముద్దుచేసి