మా ఇంటి వాకిట్లో మల్లెపూల పరిమళాలు

మా సింహద్వారానికి మామిడాకుతోరణాలు

బంధుమిత్రులారా మీకివే హార్దిక స్వాగతాలు

మా నూతన గృహప్రవేశ సాదర ఆహ్వానాలు

స్వాగతాలు ఆప్తులారా మీకివే సుస్వాగతాలు

1.ఎన్నాళ్ళుగానో కన్న మా కలల పంట

చిన్నదైనా ఇది మా స్వప్న సౌధమేనంట

తోడునీడగా నిలిచింది నిలువెత్తు రూపంగా

మా ఆశలు నెరవేర్చి వెలుగిచ్చే బ్రతుకుదీపంగా

2.మదిలో దాగిన మమతలు పునాదిగా

ఆదరణే రూపుగొని కిటికీలు గమ్మాలుగా

ఆప్యాయత కలబోసి మూల స్తంభాలుగా

వెలిసింది మాఇల్లు వీడని బంధాలే  గోడలుగా

3.హృదయాన్ని పరిచాము చలువరాయిగా

తీరిచిదిద్దాము ఉన్నంతలొ కలికితురాయిగా

అడుగిడు అతిథులకు  అనుభూతే హాయిగా

మా ఇల్లే ఇలలో స్వర్గసీమగా జనులే తలపోయగా