పలుకలేవ మమతల మకరందమొలుక
తెలుపలేవ వలపులు శ్రీగంధమే చిలుక
ఎదదాగిన మంజుల సడినుడి ఎవరికెరుక
వేచినకొలది వెతలు పెరుగ బ్రతుకే మరీచిక
గతిగానవే నా మానసం-మతినిండినే నీ ధ్యానం
1.అంతరంగాన అంతేలేని చింతల సాగరం
పెదవుల చెలఁగును నగవుల నయగారం
అనునయ మొకటే హృదయానికి తగు ఔషధం
సాంత్వనకూర్చే ప్రేమ సింధువా నీకిదె ఆత్మీయ చందనం
గతిగానవే నా మానసం-మతినిండినే నీ ధ్యానం
2.జీవితమంతా చేస్తాను నీకే అంకితం
ఏకాకి నేనిక లోకాన సర్వం నీవేగా నేస్తం
నీ సహచర్యం నాకిల ధైర్యం కావేలా సంప్రాప్తం
అందించవే ఇక జన్మజన్మలు నీ స్నేహ హస్తం
గతిగానవే నా మానసం-మతినిండినే నీ ధ్యానం
No comments:
Post a Comment