ఎంతగ నిను పొగిడాను
ఎన్నని నిన్ను నేనడిగాను
ఉలకవు పలకవు నీవు ఓ బెల్లంకొట్టిన రాయి
కదలవు మెదలవు నీవు శ్రీ షిరిడీపుర సాయి
గుడిలోన కొలువైవున్న నీవో కొండరాయి
కన్నీటికైనా కరగని కరకు గుండెనీదోయి
1.నిత్యం అభిషేకాలు అందమైన వస్త్రాలు
గురువారమైతే చాలు ఊరేగ అందలాలు
షిరిడిసంస్థానమందు ఎన్ని రాజభోగాలు
ఊరూరా మందిరాలల్లో ఉత్సవాలె ఉత్సవాలు
ఫకీరువే నీకేలా సంబరాలు ఆర్భాటాలు
అవధూతవు నీకవసరమా ఈ వైభోగాలు
2.నమ్ముతూనె ఉన్నాను ఊహతెలిసి నప్పటినుండి
వేడుతూనె ఉన్నాను కష్టంవచ్చినప్పటినుండి
ఏ విన్నపాన్ని విన్నదైతె ఎన్నడు లేదు
ఏ కోరిక తీర్చిన దాఖలాయే కనరాదు
అడుగడుగున ఆటంకాలు నోటికందకుండా
అనుభవించు గతిగనరాదు లేకనే నీ అండ
No comments:
Post a Comment