రచన,స్వరకల్పన&గానం:రాఖీ

రాగం:ఘూర్జరి

కత్తులకే అర్పణం
నెత్తుటితో తర్పణం
ఇదే కదా ఈనాటి ప్రేమపురాణం
ఇంత పలుచనయ్యిందా పావన ప్రణయం

1.ఆమ్లదాడి చేస్తుంది ఒక ప్రేమ
బ్లేడుతొ మెడ కోస్తుంది ఒక ప్రేమ
అత్యాచారం సలుపుతుంది ఒక ప్రేమ
బ్లాక్ మెయిల్ చేస్తుంది ఒక ప్రేమ
కీడుచేయ కోరుతుంటే అది ప్రేమ ఎలా ఔతుంది
కాడుచేర్చ పూనుకొంటె అనురాగమా అది నిజ ద్రోహమౌనది

2.తొలిచూపుల ఆకర్షణ నేటి ప్రేమ
తొందరపాటు చర్య అందుబాటు ప్రేమ
నెచ్చెలులుంటేనే యువతకు ఒక హోదా
పెళ్ళివరకు వస్తేనే అసలైన ప్రేమగాధ
ప్రియులను మార్చడం మంచినీళ్ళ ప్రాయం
ప్రేమను ఏమార్చడం అత్యంత హేయం,కడుదయనీయం

రచన,స్వరకల్పన&గానం:డా.రాఖీ

రాగం:హిందోళం

బద్దకం దుప్పటి తొలగించు
పొద్దున్నే ఉషస్సు నాస్వాదించు
ప్రకృతితో చెలిమిచేస్తు నడకసాగించు
పరిసరాల పచ్చదనం తనివిదీర పరికించు
శుభోదయం అన్న మాట సాకారం కావించు
ప్రతివారిని ప్రేమిస్తూ చిరునవ్వుతొ పలకరించు
శుభోదయం నీకీదే నేస్తమా నవోదయం మనకిదే మిత్రమా

1.చిన్నచిన్న త్యాగాలతొ మంచితనంనార్జించు
ధనమో శ్రమనో సమయమో కేటాయించు
మనసుంటే మార్గమొకటి ఎదురౌను గ్రహించు
ఈర్ష్యాద్వేషాలు త్రుంచి స్నేహితాన్ని నిర్మించు
ప్రతివారిని ప్రేమిస్తూ చిరునవ్వుతొ పలకరించు
శుభోదయం నీకీదే నేస్తమా నవోదయం మనకిదే మిత్రమా

2.హృదయానికి నాలుకకు దూరాన్నితగ్గించు
అవగతమౌ భావనగా ఎదుటి ఎదకు ప్రవహించు
విశ్వమె నీ సొంతమనే స్వార్థంగా వ్యాపించు
అందరునీ  బంధువులే అనుకొంటూ ప్రవర్తించు
ప్రతివారిని ప్రేమిస్తూ చిరునవ్వుతొ పలకరించు
శుభోదయం నీకీదే నేస్తమా నవోదయం మనకిదే మిత్రమా

రచన,స్వరకల్పన&గానం:డా.రాఖీ

నీకూ నాకూ నడుమన నీ నడుమే ఓ వంతెన
ఉండీలేదనిపిస్తూనే ఉడికించే భావన
పిడికెడే ఆ కొలమానం
అది బ్రహ్మ ఇచ్చిన బహుమానం

1.చూపులను మెలితిప్పే సుడిగుండమే నాభి
తాపసులకైనా యమగండమా ఊబి
తరచిచూస్తే ఏముంటుంది బొడ్డుమల్లి వైనం
శోధిస్తే దొరకదు మర్మం ఉల్లి పొరల వైచిత్రం
చీరకట్టు చెలియలికట్ట దాటబోవు కెరటం పొక్కిలి
కోక మబ్బుచాటునుండి తొంగిచూసె తుండి జాబిలి

2.వంపులవయ్యార మొలికే కటి కిన్నెర సాని
మడతల్లో మతలబు చిలికే కౌను కృష్ణవేణి
భరతముని పని నెరవేర్చిన ఇక్కు నాట్యరాణి
హంసకే గురువుగమారిన మధ్యమమొక మహరాణి
మన్మథుడే తడబడినాడు వేయలేక బాణాల్ని
ఏ కోణం తిలకించినా లాగుతుంది ప్రాణాల్ని

https://youtu.be/Jz37Iu9ogSI

రచన,స్వరకల్పన&గానం:డా.రాఖీ

శ్రేయస్సు కోరే వాడే దేవుడు
యశస్సు పెంచేవాడే దేవుడు
మనస్సుకే ప్రశాంతినే ఒసగువాడు దేవుడు
సన్మార్గము చూపువాడె దేవుడు
ఇన్నిగుణములున్నవాడు ఒకడే గురుదేవుడు
షిరిడిలోన వెలసినా సమర్థ సద్గురుడు సాయినాథుడు

1.కష్టాలనెదుర్కొనే ఆత్మ స్థైర్య మిచ్చేవాడు
పెనుసవాళ్ళు స్వీకరించు ధైర్యముకలిగించువాడు
వేదనలో అండగనిలిచి ఓదార్పు నిచ్చేవాడు
శ్రద్ధాసహనములను సమకూర్చే వాడు
ఇన్నిగుణములున్నవాడు అతడే కదదేవుడు
షిరిడిలోన వెలసినా సమర్థ సద్గురుడు సాయినాథుడు

2.చెప్పడానికంటె ముందు చేసిచూపించువాడు
తనపరభేదమేది కనబఱచనివాడు
మనలోని దక్షతను ప్రకటింపజేయువాడు
కర్మకు తగుఫలితాలను అందజేయువాడు
ఇన్నిగుణములున్నవాడు అతడే కదదేవుడు
షిరిడిలోన వెలసినా సమర్థ సద్గురుడు సాయినాథుడు

రచన,స్వరకల్పన&గానం:రాఖీ

రాగం:సింధుభైరవి

దుఃఖానికి ఎన్నిముఖాలూ
వేదనలకు ఎన్ని కారణాలు
ఎదగుమ్మానికి వెతల తోరణాలు
ఏచరిత్రచూసినా వ్యథార్థ భరితజీవితాలు

1.పుట్టుకలో మొదలైన రోదన
చితివరకూ వెంటాడును నీడగ
జన్యు వైకల్యాల పీడన
తరతరాలు కొనసాగే యాతన
వేదాంత మొక్కటే సాంత్వన
గత జన్మల దుష్కర్మల చింతన

2.చికిత్సలేని రోగాల ఆక్రమణ
తీరలేని సమస్యలతొ ఘర్షణ
కొనితెచ్చుకొన్నవి కొన్నికొన్ని
పనిగట్టుకొని కల్పించగ కొన్ని
నరజాతి చరిత్ర సర్వం సమస్తం
పరపీడనాన్విత పరాయణత్వం

రచన,స్వరకల్పన&గానం:రాఖీ

రెచ్చగొట్టి రేతిరంతా నిద్రదోస్తావు
ఎదకుకాస్తా చిచ్చుపెట్టి వినోదిస్తావు
అందాలు కుప్పబోసి కంచె పెడతావు
ప్రాణాలుతీయకుండా పాతిపెడతావు
పైశాచికత్వమే పడతీ నీవైనం
ఊగిసలాడుతుంది ఆత్మాభిమానం

1.సౌందర్య కేంద్రమేదో కరతలామలకం నీకు
ఆకట్టుకోవడమంటే ఉగ్గుపాలవిద్యనీకు
నీకున్న వనరులన్ని ఫణంగా పెడతావు
మరులుగొలుపు మారణాయుధం మరిమరీవాడుతావు
సయ్యాటనే సుదతి వలపువలతొ చేపలవేటా
దొంగాటలేలనే మదిగదికి తలపుతలుపు చాటా

2.కంటిసైగతోనే బాసలెన్నొ చేస్తావు
పెదవి విరుపుతోనే ఆహ్వానమందిస్తావు
కడకొంగుతోనీవు కథాకళి చేయిస్తావు
నడుమొంపులోనీవు  నయాగరా సృష్టిస్తావు
మనసులో ఉంటేనే మచ్చిక చేసుకో
మారాము చేయకుండ మెచ్చిన దిచ్చుకో

https://youtu.be/0MKk9ErJI44

రాగం:భూపాళం

నరకేసరీ నీకెవరు సరి
లోటేది నీ చెంతనుండ మాయమ్మ సిరి
మనసారా పొగడెదను నిన్ను మరిమరి
జగతి ఖ్యాతినొందనీ దయతో మా ధర్మపురి

1.వేదశాస్త్రాలకు నెలవైనది
వేదనలకేలా నిలయమైనది
సంగీత సాహిత్య కళలకు పట్టుగొమ్మ
కీర్తి చంద్రునికేల సుదీర్ఘ గ్రహణపీడ
పావన గోదావరి అపరగంగానది
కలుషితాలకేల ఆలవాలమైనది
కినుక ఏల మాపైన నరహరి నీకు
నీ పదసన్నధిలో వెతలేల మాకు

2.పరిశుభ్రత పాటించని భక్తబృందాలు
ఏమాత్రం స్వఛ్ఛతే ఎరుగని యాత్రికులు
దారినాక్రమించుకొన్న వ్యాపార వర్గాలు
అడుగడుగున ఎదురయ్యే అవినీతి  దందాలు
గుడినీ నదినీ భ్రష్టుపట్టించిన వైనాలు
నీవెరుగనివా స్వామీ ఈ నిదర్శనాలు
చందనలేపనతో కాస్త చల్లబడిపోయావా
ఉగ్రమూర్తి సమగ్రంగ నా ఊరిని చక్కబఱచు

https://youtu.be/P0qwGffUG9k?si=6ie-nu1ojo6Xy9F2

రచన,స్వరకల్పన&గానం:రాఖీ

రాగం: దర్బార్ కానడ

శ్రుతి ప్రకృతి పార్వతి
లయకాల కాలుడవు నీవె పశుపతి
రచియించినావు సంగీత శాస్త్రము
వెలయించినావు నటరాజా నాట్యము
చంద్రకళాధర నీవు ఆదికళాకారుడవు
తాండవకేళీలోల తకిట తధిమి చైతన్య రూపుడవు

1.అనాలంబి వీణ మీటి రాగ సృష్టి సల్పినావు
అర్ధాంగి అపర్ణకు గాంధర్వము నేర్పినావు
మేళకర్త మెళకువలు అలవోకగ తెలిపినావు
మనోధర్మ సంగీత మర్మము నెరిగించినావు
సామవేద సారమంత ధారపోసినావు
శిశర్వేత్తి పశుర్వేత్తి గానసుధలు గరపినావు

2.ప్రదోషసమయాన ఆనంద తాండవము
విశ్వ విలయకాలన ప్రళయ తాండవము
చిందేయగ సదా శివా నీకు చిదానందము
ఆటపాట బ్రతుకుబాట కదా నీ బోధనము
సప్తస్వర వరదాయక ఓం నమఃశివాయ
సప్తతాళ ప్రసాదకా నమో సాంబశివాయ

ఏది భద్రత మరి ఏది భరోసా
ఏరుదాటి తెప్ప తగలేసే తమాషా
ఎంతమంది బలిదానాల ఫలితము
వండుకున్న కూటిని కాలదన్ను వైనము
ఇందుకేనా ప్రత్యేక తెలంగాణా
ఇదేనా కోరుకున్న బంగరు తెలఁగాణా

1.కప్పదాటు మాటలెన్నొ లెఖ్ఖలేవు
మాటమార్చి ఘటనలెన్నొ దాటుతావు
సంభాషణ చతురతలో ఎవరైనా బలాదూరె
ఏఎండకాగొడుగే రివాజుగా మారె
తెలంగాణ వ్యతిరేకులు చుట్టాలైపోయే
ఉద్యమవీరులంత పట్టరానివారాయే

2.కుతంత్రాల గెలుపెప్పుడు శాశ్వతం కాబోదు
మాయచేయు నైపుణ్యం కడదాకా నిలవదు
జైకొట్టిన ఆ నోళ్ళే ఛీ కొట్టుట అవసరమా
గుడ్డిగానమ్మినోళ్ళే వద్దను వ్యవహారమా
అహంకార పరదాలను అటకెక్కించు
తరతరాలు కీర్తించే ఘనచరితను లిఖించు

https://youtu.be/JS406xjPzQY?si=sKEacPNjpDBfjRrv

రచన,స్వరకల్పన&గానం:డా.రాఖీ
రాగం:మధుకౌఁస్(చంద్ర కౌఁస్)

లక్ష సింహముఖీ మహాదేవీ
లక్ష్యము నెరవేర్చే ఆదిపరాశక్తీ
ప్రత్యక్ష దేవతవే ప్రత్యంగిరాదేవీ
రాక్షస సంహారిణీ నమోస్తుతే శుభకారిణీ

1.మానస సరోవరతీరాన
కృత్యగా ప్రకృతిరూప నిత్యగా
అయ్యావరే అడవిలోన
నికుంభిలగా సత్య శాంభవిగా
అష్టలక్ష్మి ఆలయ చేరువలో
కుర్తాళపీఠాన మాతా ప్రత్యంగిరగా
వెలసినావు నీ మహిమలు తెలియపరుచగా
కలిలోన నీ లీలలు ఎరుక పరుచగా

2.యంత్ర తంత్ర మంత్రాత్మికా
రజోగుణ తేజోమయి శివాత్మికా
ఏల్నాటి శనిదోష పీడా పరిహారికా
అభయంకరి అథర్వణ భద్రకాళికా
చంద్రఘంట నామాంతర ఉగ్ర దీపికా
సకలదేవతారాధిత చండ ప్రచండికా
ఆరోగ్యము ప్రసాదించు అపరాజితా
నరదృష్టి హరియించు పరదేవతా

రచన,స్వరకల్పన&గానం:రాఖీ
రాగం:మాండు

నీవు చూడని పార్శ్వం నీ అనుమాన కారణం
నీకు తెలియని కోణం నీ అజ్ఞానపు నిదర్శనం
మెరిసే ప్రతి వస్తువు బంగారం కాదు
ద్యోతకమయ్యేదంతా వాస్తవం కాదు
ఆలోచించు నేస్తమా  అంచనాలు మించి
మనసు మీటు మిత్రమా ఎద రాగవిపంచి

1.నింగీ నేలా కలిసేనా దిక్చక్ర భ్రమ గమనించు
సింగిడి రంగులన్నీ కాంతి దృగ్విషయంగ ఎంచు
ఎండమావి భ్రాంతి దప్పి తీర్చుననిపించు
భావించుకున్నవన్ని సత్యాలైపోతాయా
వద్దనుకున్నవన్ని కాకుండా పోతాయా
ఆలోచించు నేస్తమా  అంచనాలు మించి
మనసు మీటు మిత్రమా ఎద రాగవిపంచి

2.కళ్ళజోడు రంగునంత లోకానికి పులుమకు
థృక్పథాన్ని విడనాడక ఊబిలోకి దిగజారకు
పట్టుకున్న కుందేటి కాళ్ళ సంఖ్య మరువకు
మేకపోతు గాంభీర్యం ప్రదర్శించి మనకు
గుణపాఠంనేర్పతుంటె కాదుకూడదేమనకు
ఆలోచించు నేస్తమా  అంచనాలు మించి
మనసు మీటు మిత్రమా ఎద రాగవిపంచి

https://youtu.be/DqJRY6Q0FNU

రచన,స్వరకల్పన&గానం:రాఖీ

"బాలికే ఏలిక"

అష్టాదశ శక్తి పీఠాలకాలవాలం
శకుంతలాపుత్ర భరత ఖండం
ఆడపిల్ల రక్షణకై అతలాకుతలం
అమ్మలేక జన్మెరుగని ఇలాతలం
ఇంకానా ఇంతికి ఇంతటి దౌర్భాగ్యం
గర్భాంతర స్త్రీశిశువుల వికృత విఛ్ఛినం

1.ఎంతపెరిగి పోతేనేమి నాగరికతా
మింటికెగసి లాభమేమి విజ్ఞాన సంపద
మహాలక్ష్మి పుట్టిందను మాటలే'మాయే
వివక్షతో అనుక్షణం వనిత నలిగి పోయే
అత్తలూ తల్లులూ కానివారా వారాడపిల్లలు
చెట్టును నరికే గొడ్డలి కామాలకు పోలికలు

2.పుట్టింవారంటే ప్రాణంపెడుతుంది పడతి
మెట్టినింటికె మేలైన గౌరవమౌతుంది మగువ
ఏ పుత్రుడు దాటించునొ పున్నామ నరకాలు
వృద్ధిచెందే నెందుకో  వృద్ధాశ్రమాలు
మంచి పెంపకముతోనే మానవ వికాసం
కొడుకైనా కూతురైన మన నెత్తుటి ప్రతిరూపం

రచన,స్వరకల్పన&గానం:రాఖీ

చేజారి పోయాకె మణుల విలువ తెలిసేది
కనుమరుగై పోయాకె మనిషి వెలితి తెలిసేది
బంధాలు పలుచబడితె తలోదిక్కు కుటుంబం
బాధ్యతలను వదులుకుంటె అయోమయం జీవితం

1.కాసింత పట్టించుకొంటె చాలు ఇల్లాలిని
అవార్డులేం ఆశించదు ఏపూట అర్ధాంగి
పెత్తనమేనీదంటే ప్రాణం పెడుతుంది
గెలినట్టు మైమరచి తాను లొంగిపోతుంది
నిన్నే నమ్ముకొన్నది అన్నీ వదిలివచ్చి ఆలి
ఆరుతీరులా నిను అలరించును కోమలి

2.పిసరంత హత్తుకొంటే ఫిదా నీ పిల్లలు
ప్రేమకొరకు అంగలార్చు అందరున్న అనాథలు
వాస్తవలోకానికి దూరమౌతు ఉంటావు
అరచేతి మాయలో మునిగితేలుతుంటావు
పంచభూతాలతో మైత్రిని బలిచేయకు
పంచేంద్రియాల అనుభూతి నలిపేయకు

రచన,స్వరకల్పన&గానం:రాఖీ
రాగం:నట భైరవి

నిట్టూర్పుగాను నీవె -ఓదార్చగాను నీవె
ఆవేదన లోనూ నీవే సాయీ
ఆనంద కారణమూ నీవే నోయీ
ఊపిరివే నీవైనావు జయజయ సాయీ
ఎద స్పందన నీవైనావు షిరిడీ సాయీ

1.తల్లివనీ తలపోస్తాము-తండ్రివినీవని ప్రేమిస్తాము
గురుడవు నీవనీ గురుతుంచుకొంటాము
హితుడవు నీవని నిన్ను నమ్ముకొంటాము
కులమతాతీడవు జయజయ సాయీ
ఏకైక దైవమీవే షిరిడీ సాయీ

2.ప్రతి పర్వము నీతోనే-ప్రతివారము నీముందే
అభిషేకము అర్చనలు నివేదనలు నీకే
పంచహారతులు పల్లకి సేవలు నీకే
మా మనుగడ నీకృపనే జయజయసాయీ
నువు వినా బ్రతుకులేదు షిరిడీ సాయీ

ఏ కన్ను ఊరుకుంటుంది-చూడకుండా
ఏ పెన్ను మిన్నకుంటుంది-రాయకుండా
చూపుల్లో సూదంటు రాయిలుంటే
 పెదవుల్లో కవ్వింపు నవ్వులుంటే

1.అలంకారమెరుగని అందచందాలు
అహంకార రహితమైన హావభావాలు
చూస్తూండిపోవచ్చు జీవితకాలం
అనుభూతిచెందకుంటె వృధా ఆ జన్మం

2.కళ్ళు తిప్పుకోలేని నిస్సహాయత
రెప్పలల్లార్చలేని నిశ్చేష్టత
సహజమైన సౌందర్యం కుంచెకు లొంగదు
వర్ణనాతీతమైన సోయగం కవితకు అందదు

OK

అక్షరాలే వెన్నెల్లో ఆడుకునే ఆడపిల్లలు
అక్షరాలే అట్లతద్ది నోముకునే ముద్దు గుమ్మలు 
అక్షరాలు తెలుగింటి ఆడపడుచులూ
అక్షరాలే కుంచెను మురిపించే బాపు బొమ్మలు

చ1.గోరింటాకు సొగసులతో ఒక అక్షరం
సంక్రాంతి ముగ్గులతో ఒక అక్షరం
తలకునీళ్ళోసుకొని ఒక అక్షరం
తులసికోట చుట్టు తిరుగునొక అక్షరం
ఓరచూపు విసిరేస్తూ ఒక అక్షరం
కొంటెనవ్వు వలవేస్తూ ఒక అక్షరం

చ2.పట్టు పావడాతో ఒక అక్షరం
పరికిణీ ఓణీలతొ ఒక అక్షరం
పాపిటి బిళ్ళతో ఒక అక్షరం
పట్టీల పాదాలతొ ఒక అక్షరం
బుగ్గసొట్ట గాలమేస్తు ఒక అక్షరం
సిగ్గులొలకబోస్తూ ఒక అక్షరం

https://youtu.be/jOYx9EuA2OA?si=uNNSGntuOr9Y4CAE

రచన,స్వరకల్పన&గానం:రాఖీ
రాగం :భైరవి

నవవిధ భక్తులతో పూజలు సల్పితిమి
నవరస భావాల నిను కొనియాడితిమి
నవరాత్రులూ నిన్ను నెఱనమ్మి కొలిచితిమి
నవనవోన్మేషనీ మహిష మర్ధినీ
చండముండ సంహారిణి చాముండేశ్వరి
చకిత కార్యకారిణీ నమో రాజరాజేశ్వరీ

1.నాశమొందించితివి దనుజ పీడ జనులకు
పరిమార్చవైతివే  ప్లాస్టిక్ రక్కసిని
ఏ వరమంది ఈ భువినవతరించెనో
నువువినా హరియించ హరిహర బ్రహ్మతరమా
సత్వరమే స్పందించి మానవాళి మేలుగొలుపు
చకిత కార్యకారిణీ నమో రాజరాజేశ్వరీ

2.సృష్టి స్థితి లయకారిణి శ్రీ విద్యా కాళికా
కాలుష్యమయమాయె కల్తీ నిలయమాయె
ప్రకృతి వనరులన్నీ కొల్లగొట్టబడసాగె
మానవీయ విలువలన్ని మంటగలిసిపోయే
ఏరీతిగా సరిజేతువో నీకే ఇక వదిలి వేతు
చకిత కార్యకారిణీ నమో రాజరాజేశ్వరీ

https://youtu.be/EycZ74QaKRY?si=jCT4Sc0VR4WUeIcA

రచన,స్వరకల్పన&గానం:రాఖీ

రాగం:హంసధ్వని

విజయ దుర్గా కనకదుర్గా విజ్ఞాన దుర్గా
సన్మార్గము నడపవే మానవాళి నవదుర్గా
దుర్గమమే నీ ఉపాసనా భార్గవి
యంత్ర తంత్ర మంత్రాత్మిక భగవతి

1.భద్రకాళీ నీదే ఈ జననమరణ జీవన కేళీ
మహంకాళీ దనుజారీ మహిష మర్ధినీ
రుద్ర కాళీ అసుర దమనీ దైత్య హనని
ఖడ్గ ధారిణీ శార్దూల వాహిని భవానీ

2.ధన మాన ప్రాణ పోషణీ రమణీ
చంచల మనస్వినీ ఐశ్వర్య రూపిణీ
వైభోగ యోగిని వైభవ ప్రభవిని
మహా లక్మి మనోహరి శుభంకరీ

3.వేదమయీ ఓంకార నాదమయీ
మనో బుద్ధి చిత్తానురాగమయీ
పర విద్యా శ్రీవిద్యా ఆత్మవిద్యామయీ
సామ్రాజ్ఞీ సరస్వతీ సాధ్వీ జ్ఞానమయీ

https://youtu.be/boXJSxItZco?si=VpIGTQMgEIPXRgHa

రచన,స్వరకల్పన&గానం:రాఖీ
రాగం:నవరస కానడ

ప్రియమార ఆరాధన చేసెద
భక్తిమీర నిను అర్చించెద
సిద్ధిధాత్రీ అరవిందదళనేత్రీ
క్షీరాబ్దిపుత్రీ నమోస్తు జగద్ధాత్రీ

1.శంఖచక్ర ఆయుధ దారీ
డోలాసుర భయంకరీ
పద్మాసన సంస్థితే సిరీ
అష్టసిధ్ధి వరదే జాడ్యాపహారీ

2.దుర్గే నిర్గుణే దురితనివారిణీ
కామితార్థ విజయ కారిణీ
మహిషాసుర మర్ధనీ మదనజననీ
విశ్వైక పాలనీ దర్శించనీ నీ రూపాలనీ

3.కీర్తి వర్ధినీ సంకీర్తనానురక్తిని
ఆర్తబాంధవి పరమార్థ దాయిని
పరమానంద ప్రదాయినీ
నారాయణీ బ్రాహ్మణీ రుద్రాణీ

https://youtu.be/ULCnejHU3RU?si=5Dg2vm73uGdZdxcC

రచన,స్వరకల్పన&గానం:రాఖీ
రాగం:మధ్యమావతి

మహాగౌరీ మహాదేవ సహధర్మచరీ
శుభకరీ నాదబిందు కళాధరీ
వృషభవాహన సంచారీ పరాత్పరీ
నయగారీ కొల్తునిన్ను అనునయమే కోరి

1.త్రిమూర్తులైన నీకు భృత్యులే
మహామునులు నీశరణార్థులే
నీ కరమే అభయకరము
నీ పదమే పరమ పదము
నిఖిలలోక జననీ నిరంజనీ
పరవిద్యా పరాశక్తి పరమపావనీ

2.ఢమరుక శూలధరి శ్వేతాంబరి
కరుణామృతలోచని కృపాకరీ
నీ వదనమె కుముదము
నీవే సౌందర్య  సదనము
దైత్య దమని దానవ సంహారీ
నిత్యానందినీ  సత్య శివ సుందరీ

https://youtu.be/xb-0gkHKUcE

రచన,స్వరకల్పన&గానం:రాఖీ

తిరుపతి శ్రీవేంకటపతి-నీవే మా శరణాగతి
అడుగడుగున కాపాడే-చక్రధారీ శ్రీపతి
హే భక్త వరదా ఆర్తత్రాణ బిరుదా
గోవిందా గోవిందా పాహిపాహి ముకుందా

1.నీ నామస్మరణయే ఆనందదాయకం
నీ గుణగానమే ఆహ్లాదకారకం
నీ దివ్య దర్శనమే భవతారకం
నీ పాద సన్నిధియే శోకనాశకం
హే భక్త వరదా ఆర్తత్రాణ బిరుదా
గోవిందా గోవిందా పాహిపాహి ముకుందా

2.ప్రతి పదమూ సాగాలి నిన్ను చేర్చే పథం
నా జీవన గమనమవని నీ అభిమతం
తెగిపోనీ ఇకనైనా ఇహలోక బంధం
ఆఘ్రాణించనీ నీ చరణారవింద గంధం
హే భక్త వరదా ఆర్తత్రాణ బిరుదా
గోవిందా గోవిందా పాహిపాహి ముకుందా

https://youtu.be/QZbGRX_1eOE?si=762NlU0uvygzu8Df

రచన,స్వరకల్పన&గానం:రాఖీ

రాగం:తిలక్కామోద్

జ్వాల నేత్రీ కాళరాత్రీ కామితార్థ దాయినీ
దక్షపుత్రీ దానవ హంత్రీ సర్వదా సజ్జనమైత్రి
స్మరణమాత్రేన అభయ ప్రదాత్రీ పాహిమాం
కృష్ణవర్ణాంగినీ హరితవర్ణాంబరీ పాలయమాం

1.మధుకైటభ సంహారిణీ-శుంభనిశుంభ నిశ్శేషిణీ
అజ్ఞాన తిమిరాంతకి-మహా మాయావినీ
ఖర వాహినీ సురవందినీ-ఘనరూపిణీ జననీ
పాహిమాం పరవిద్యా పాలయమాం నిత్యా

2.రుద్రభామిని కామినీ  కామవర్ధినీ కౌమారి
కాలకాలినీ నాట్యకేళినీ  జగదేక సమ్మోహినీ
దురిత దూరినీ దుర్గుణ హారిణీ భవానీ మారీ
పాహిమాం పరమేశ్వరీ పాలయమాం కృపాకరీ

రచన,స్వరకల్పన&గానం:రాఖీ
రాగం:శుభ పంతువరాళి

ఏమి సేతునే మనసా నిన్నెటులోర్తునే
సతతము మతిమాలి చరియింతువే
కట్టిడిసేయగ  బెట్టుసేతువే
నిన్నట్టి పెట్టగా కట్టజాలనైతి  సేతువే

1.వానర సరియగు చపలత నీది
ఖేచర సమతుల చంచల బుద్ధి
నిలకడ మెదలవె కదలక నాకడ
కుదరదు విచ్చలవిడి రాకడపోకడ

2.చదువగనెంచిన కుదురుగ నుండవు
సంగీతముతో సాంత్వన నొందవు
కాంతా కనకాల చింతన చేతువు
శ్రీకాంతు చరణాల చెంతయె ఇకపై నీతావు

https://youtu.be/pX6wml2XDMM?si=IT4b85VgNp00aqaY

రచన,స్వరకల్పన&గానం:రాఖీ
రాగం:కామవర్ధిని

కాత్యాయనీ కాత్యాయన ముని వందిని
కారుణ్యరూపిని కరుణాంతరంగిణి
మృగరాజవాహిని నగరాజ నందిని
దేహిమే దేవీ దివ్య దర్శనం
నిరంతరం తవ పాద సన్నిధానం

1.ప్రకృతి వ్యాపిణి హరిత వర్ణశోభిని
దీనజనోధ్ధరాణ కంకణ ధారిణీ
రోగనివారిణి ఔషధ సంజీవని
ఆయుర్వర్ధిని అభయప్రదాయిని
దేహిమే దేవీ దివ్య దర్శనం
నిరంతరం తవ పాద సన్నిధానం

2.కమల ఖడ్గ కరభూషిణి దాక్షయణీ
పీతాంబరాలంకార భవ్య ప్రకాశినీ
దురితదూరిణీ దుఃఖపరిహారిణీ
మందసుహాసినీ మంజుల భాషిణీ
దేహిమే దేవీ దివ్య దర్శనం
నిరంతరం తవ పాద సన్నిధానం

https://youtu.be/_XXlnH9Rpcc?si=SHFwdk02bhtUhLba

రచన,స్వరకల్పన&గానం:రాఖీ
రాగం:షణ్ముఖ ప్రియ

స్కందమాత వందనం
ఖంబువదన వందనం
లోకమాత వందనం
శోకహారీ వందనం

1.అతులిత  ప్రేమభరితం
నీ నయనకౌముది వీక్షణం
వర్ణసంయుతం గిరి సుతం
లక్ష్యలక్షణ మోక్ష లక్షితం

2.చతుర్భుజే చతుర్ముఖు సేవితం
హరిహరనుతే షణ్ముఖ మాతరం
సింహవాహినీం  పద్మయగ్మహస్తినీం
కరుణామృతవరదం సుఖదాయినీం

"ఆ-పన్నులు"

పన్నులు పన్నులు పన్నులు

సామాన్యుడి నడ్డిమీద ప్రభుత తన్నులు

మూలకోతపన్నులు సమూలంగా పన్నులు

ఎరుకపరచి కొన్నీ ఏమార్చి కొన్నీ

తప్పులు చేయించి మరీ జరిమానా వసూళ్ళుకొన్నీ

ఆ పన్నుల బారినుండి ఆపన్నుల కాపాడేదెవ్వరో

1.ఆదాయం మీద పన్ను ఆలస్యంమీద పన్ను

ఎగవేతమీద పన్ను సమర్పించకున్న పన్ను

కొనుగోలుమీద పన్ను అమ్మకాలమీద పన్ను

వస్తువులకు సేవలకు అడుగడుగున పన్ను

పన్నే కదా పాలనకు ఎన్నదగిన వెన్నుదన్ను

పన్నులూడగొట్టేలా ఉన్నపుడే బ్రతుకు మన్ను

ఆ పన్నుల బారినుండి ఆపన్నుల కాపాడేదెవ్వరో

2.వసతులకెప్పుడు ఉండబోదు అతీగతి

అన్నివర్గాల జనుల మనుగడే అధోగతి

పన్నుంటుందిగాని రాదారి బాగోదు

పన్నుంటుందిగాని మంచినీరు రాబోదు 

ముక్కపిండి ఒక్కసారే లాక్కున్నా పర్లేదు

గుచ్చిగుచ్చి చంపునట్లు పన్నుమీద పన్ను పోటు

ఆ పన్నుల బారినుండి ఆపన్నుల కాపాడేదెవ్వరో

రచన,స్వరకల్పన&గానం:రాఖీ

కలుసుకుందాం కలలలోనా
ఊసులాడుకుందాం ఊహల్లోనా
కాపురముందాం కల్పనకైనా
ఉత్తుత్తి ప్రేయసీ నాకు నీవె ఊర్వసీ
తిరస్కరించలేవు నా అమర ప్రేమని

1.ఓపలేను ఎడబాటు-చేయలేను ఎదచాటు
బ్రతుకంతా ఆటుపోటు-నీవీయీ కాస్తచోటు
ఏకాకిగా మనలేను లోకానా
ఏరీతిగా గడిపేను శోకానా
ఓదార్చగా నీవు-నను చేర ఏల రావు

2.నిదురలేని రాత్రులను-కలలెలా వరించేను
కలవలేక ప్రతి క్షణము-నిన్నే కలవరించేను
నేస్తమా అందివ్వు స్నేహహస్తం
చితిచేరువరకూ నీవే నా సమస్తం
జ్ఞాపకాలు రేపేను-ఎనలేని విరహాలు

3.కదలదాయె కాలము-కవితలాయే జీవితము
మన కలయికలన్నీ మధురమైన స్వప్నాలు
తలపుల తలుపులే తీసిఉంచాను
వలపుల పరుపునే పరిచి ఉంచాను
తనువు తపన తీరాలు-తీపిగొలుపు కారాలు

https://youtu.be/HtbwqfnThfk?si=bOEopoGBv0Z_TLua

రచన,స్వరకల్పన&గానం:రాఖీ

రాగం:కళ్యాణి


మూలా నక్షత్ర సంజాతా శ్రీవిద్యా మాతా
మాలా సంయుక్తా పరవిద్యా పరదేవతా
లీలా విశేష విబుధ విశారదా శారదా
కైలాటము నీకిడెదను అమ్మా సదా సర్వదా

1.చదువుల తల్లివి చైతన్య వెల్లివి
అజ్ఞాన తిమిర గగన నిత్యనిండు జాబిల్లివి
శ్వేతపద్మాసనీ కచ్ఛపి వీణా ధారిణీ
సంగీత సాహితీ విజ్ఞాన రూపిణీ వాణీ

2.దండకమండల కరభూషిణి గీర్వాణీ
హంసవాహినీ మేధావిని రసనవాసిని
మంద్రస్వర నాద వాదినీ వినోదినీ
నీచరణము నెరనమ్మితి దీవించవె పారాయణి

https://youtu.be/jmCnSNDvilo?si=6srx35g2TE1Nji-w

రచన,స్వరకల్పన&గానం:రాఖీ
రాగం:నాటరాగం

సత్యవ్రత దీక్షాపరుడు-అపర హరిశ్చంద్రుడు
ధర్మాచరణలో రఘుపతి రాఘవ రాజా రాముడు
అహింసా పాలనలో గౌతమబుద్ధుడు
ఆయుధమే ధరించని అని అభినవ కృష్ణుడు
గాంధీమహాత్ముడు భరతజాతి గర్వకారణుడు

1.నల్లజాతివారికి అండదండ అయినాడు
తెల్లవాడి గుండెల్లో సింహస్వప్న మైనాడు
పరమతసహనాన్ని పాటింపజేసినాడు
తరాలెన్ని మారినా తరగని చెరగని ముద్రవేసినాడు
గాంధీమహాత్ముడు భరతజాతి గర్వకారణుడు

2.నభూతోన భవిష్యతి జాతిపితా బాపూజీ
సంకల్పసాధనలో ఎన్నడెరుగలేదు రాజీ
స్వరాజ్య లక్ష్యమే ఊపిరిగా సాగించెను ఉద్యమం
పరపాలన తుదముట్టించెను అస్త్రమై సత్యాగ్రహం
గాంధీమహాత్ముడు భరతజాతి గర్వకారణుడు

3.ఆడంబరాలకు ఆమడదూరం కొల్లాయిధారణ
ఆభిజాత్యానికి తిరస్కారం గాంధీజీ ఆచరణ
నరజాతి చూడలేదు ఇటువంటి పుంగవుని
మూర్తీభవించిన అనుపమాన మానవతావాదిని
గాంధీమహాత్ముడు భరతజాతి గర్వకారణుడు

https://youtu.be/X_mdU046VCM?si=aJaGryjnirWMqv4-

రచన,స్వరకల్పన&గానం:రాఖీ
రాగం:రేవతి

ఓంకార నాదాత్మిక శ్రీచక్ర పరివేష్టిత
మణిద్వీప సంశోభిత హ్రీంకార బీజాన్విత
మాతా శ్రీలలితా ప్రణతులుచేకొనవే పరదేవతా
శంకర వినుత సమ్మోహితా మునిజన సేవితా

1.పాశాంకుశ కరభూషిత అంగారిక చాపహస్త
పంచేంద్రిముల నిగ్రహించవే పద్మలోచని
సౌందర్యలహరీ త్రిమూర్తులూ నీ వలలో
త్రిభువన సుందరీ మనుజులెంత నీ మాయలో

2.సహస్ర నామ సంపూజితా చతుషష్టికళాహృతా
ముగురమ్మల మూలపుటమ్మవు నీవేగా
నిన్ను తెలియునిజ యోగులు నిఖిలజగతి కనరారు
నీదయా దృక్కులతో విశ్వమంత కడతేరు

రచన,స్వరకల్పన&గానం:రాఖీ

మూసిఉంచితేనే గుప్పిటిగుట్టు
విప్పిచూపించితే ఎంతటి ఎబ్బెట్టు
అందీఅందనపుడె గుండెలకారాటము
నేలరాలు పళ్ళపట్ల ఉండదు ఉబలాటము
సౌందర్యము సాంప్రదాయము పరస్పరం శ్రేయోదాయకం
పరికిణి వోణీల తెలుగుదనం నయనానందకారకం

1.పాశ్చాత్య పోకడలు దేశీయత ముందు వెగటు
అనాఛ్ఛాద సోయగం మగటిమికే చేటు
ఉప్పువంటిదే వంటలో ఉత్సుకతను రేపడం
తగ్గినా పెరిగినా తప్పదు అబాసుపాలవడం
సౌందర్యము సాంప్రదాయము పరస్పరం శ్రేయోదాయకం
కట్టూబొట్టులతో  తెలుగుదనం నయనానందకారకం

2.జడ మెడ నడుము నడక అందాలకు నెలవులే
ఎదపై పయ్యెద మువ్వల పాదాలు సొగసుకు కొలతలే
దోబూచులాడే నాభీ ప్రకటన మగదృష్టికి సుడిగుండమేలే
క్రీగంటిచూపులు మునిపంటినవ్వులూ మంత్రదండాలే
సౌందర్యము సాంప్రదాయము పరస్పరం శ్రేయోదాయకం
చిరుబిడియపు తెలుగుదనం నయనానందకారకం

https://youtu.be/X370w422YBg?si=bfJUod-oEAS33R2T

రచన,స్వరకల్పన&గానం:రాఖీ
రాగం:అభేరి

బాలా త్రిపురసుందరీ భ్రామరీ
శ్రీకరీ శుభకరీ శాంకరీ అభయంకరీ
పుస్తకపాశాంకుశధరీ మస్తక వశీకరి
భైరవీ భార్గవీ శాంభవి శాకంబరీ
కరజోతలు నీకివే శర్వాణీ కర్వరీ
నా కైతలు గైకొనవే కన్యాకుమారీ

1.చండముండ సంహారీ మధుకైటభవైరీ
చాముండీ వైష్ణవీ హిండీ హైమవతీ
నగ నందిని నారాయణి కళ్యాణీ గౌరీ
మాతంగీ మాలినీ మాతా యోగీశ్వరీ
కరజోతలు నీకివే శర్వాణీ కర్వరీ
నా కైతలు గైకొనవే కన్యాకుమారీ

2. భవ్య భవతాపహారిణీ భువనేశ్వరీ
భవానీ భగవతీ మారీ మహేశ్వరీ
కాత్యాయని దాక్షాయణి పరమేశ్వరీ
జయంతీ జగజ్జనని జయజగదీశ్వరీ
కరజోతలు నీకివే శర్వాణీ కర్వరీ
నా కైతలు గైకొనవే కన్యాకుమారీ

https://youtu.be/FkC9YVtM8NQ?si=GH7Etkoic1j0lXTD

శ్లోకం: వందే వాంఛితలాభాయ చంద్రార్థకృతశేఖరామ్‌!,
వృషారూఢాం శూలధరాం శైలపుత్రీం యశ స్వినీమ్‌!!..

నవరాతిరి శుభఘడియల్లో
నవరీతుల దుర్గారూపాలు
తొలినాటి అవతారిణి శైలపుత్రి
సకలలోక సంరక్షిణి జగద్ధాత్రి
నమస్కృతులు నీకివే కమలనేత్రి
నాకృతులనందుకో కోమలగాత్రి

1.వృషభ వాహిని త్రిభువన మోహిని
శూలధారిణి దుష్కర్మ వారిణి
మందహాసినీ మధుర భాషిణీ
సుందరవదనారవింద వింధ్యావాసినీ
నమస్కృతులు నీకివే కమలనేత్రి
నాకృతులనందుకో కోమలగాత్రి

2.శివప్రియే శ్రీగిరినిలయే భ్రమరాంబికే
సౌపర్ణికాతీర సంస్థిత మూకాంబికే
శృంగేరి పీఠాన్విత శారదాంబికే
శుంభనిశుంభ ఢంభనాశికే సుకేశికే
నమస్కృతులు నీకివే కమలనేత్రి
నాకృతులనందుకో కోమలగాత్రి

రచన,స్వరకల్పన&గానం:రాఖీ
రాగం:అమృత వర్షిణి

నేలవు నీవు నింగిని నేను
వర్షించనీ నను వానను
పులకించిపోయేను నీమేను
నిన్ను తడిపి నేసేద తీరేను

1.విరివి నీవు భ్రమరం నేను
మకరందము గ్రోలగ నే వాలేను
పరవశించిపోయేవు తనువర్పించి
ప్రహ్లాదమునొందేను నినుమెప్పించి

2.కలువవు నీవు కైరవిశశినేను
కలువగ తపియింతువీవు
కళలు సుధలు నే కురిపించేను
కలలొ ఇలలో నినుమురిపించేను

https://youtu.be/_IsKAYveIlw

తండ్రిగా నిన్ను తలపోసేను
కొడుకువని నీకు ప్రేమపంచేను
అండగావుండవయా వెండికొండ దేవరా
అండపిండబ్రహ్మాండమంతా నీవేనురా
శ్రీశైల మల్లన్నా నీ పావురాన్ని కానీరా
వేములాడ రాజన్నా ననుకోడెగ మననీరా

1.త్రిశూలధారీ అహమును అణిచేయరా
త్రినేత్ర నాలో కర్మలు మసిచేయరా
త్రికాలరూపా జన్మసఫలము సేయరా
త్రిభువనపాలకా నన్నుద్ధరించరా
గురువుగ నిన్ను భావించేను
శిశ్యుడినై నేనూ సేవిస్తాను
కాళహస్తీశ్వరా పరసౌఖ్యమునీయరా
కాళేశ్వరముక్తీశ్వర ముక్తినిదయసేయరా

2.ఆనందభాష్పాలు అభిషేకించనీ
నా నయన కమలాల పూజించనీ
నమకచమక స్తోత్రాల నినుకీర్తించనీ
నమఃశివాయ పంచాక్షరి నను జపియించనీ
మిత్రునిగా నిన్ను స్వీకరిస్తాను
నా హితునిగ సర్వదా అభిమానిస్తాను
శ్రీరామలింగేశ్వర సాయుజ్యము నీయర
కాశీ విశ్వేశ్వరా కైవల్యము నీయరా

https://youtu.be/94MmT8hdzdY

రచన:డా.గొల్లపెల్లి రాంకిషన్ రాఖీ

సాకి:ప్రపంచాధినేతైనా నీకడ తల వంచాల్సిందే
తలకట్టున్నోళ్ళంతా నీమాట వినాల్సిందే

పల్లవి:మెత్తగా వాడుతావు కత్తిని సైతం
శిల్పిలా చెక్కుతావు జుత్తును మొత్తం
వికృతమౌ వికాసాన్ని సంస్కరిస్తావు
నిబిడీకృత అందాలు వెలికితీస్తావు

క్షురకర్మ కార్మికా విశ్వకర్మ రూపుడవు
అవిశ్రాంత ఓర్మికా మయబ్రహ్మ వారసుడవు

1.వినియోగదారుల స్వాగతిస్తావు
ప్రేమమీర పలకరించి ఆసీనులజేస్తావు
జాప్యమున్నగానీ జారుకోనీయవు
కుశలోపరులడుగుతూ ఆకట్టుకుంటావు
నాయీ బ్రాహ్మణుడా నీపలుకే ఒకవేదం
శిరోజాలంకృతుడా మానవతే నీ వాదం

2.కర్మసిద్ధాంతాన్ని నిష్ఠగా నమ్ముతావు
వృత్తిమీద నిశితంగా దృష్టినిపెడతావు
ఖాతాదారు తృప్తిని కొలతగ భావిస్తావు
రాజుపేద ఎవరైనా సమతకు స్ఫూర్తినీవు
మంగళదాయకా నీకు వేనవందనాలు
శుభాశుభైక పాలకా నిత్యనీరాజనాలు

3.చీదరించు బొచ్చునైన ఆదరంగచూస్తావు
వెలిసిన సొగసులను పునరుద్ధరిస్తావు
మారణాయుధాలకైన మమతను నేర్పేవు
కేశాలదోషాలను పరిహరించివేస్తావు
బడుగువర్గ సోదరా భవ్యరీతి వర్ధిల్లు
నీవులేక బ్రతుకేదిర అనవరతము శోభిల్లు

రచన,స్వరకల్పన&గానం:రాఖీ

ఒక శోకం శ్లోకమైంది,రఘువంశమైంది
ఒక మైకం మౌనమైంది,అనుభవైకమైంది
ఒక భావం కవనమైంది,బృందావనమైంది
అనురాగం యోగమైంది,సహయోగమైంది

1.నిదురెలావస్తుంది ఎద నీవె నిండిపోతె
తనువెలా మోస్తుంది తలపులన్ని దండివైతె
ఎదురుగానీవుంటే ఎనలేని స్వప్నాలు
కుదురుగా ఉండక మనలేని జీవనాలు

2.భావనలు నీవైనా స్పందనలు నావి
ప్రతిపాదనలు నావైనా  అనుభూతులు నీవీ
నిజమేమిటంటే నీవీ నావీ వేరేలేవు
నాతో పాటేనీవు నీతో బాటేనేనూ

3.కాలమూ లోకమూ అన్నీ మనవి
మనవిని విని మననంచేయగ నేనే కవిని
పదేపదే లయమౌదాం నిరంతరం బాహ్యంగా
కొత్త చరిత మనమూ రాద్దాం అనూహ్యంగా

శవాలపైని పేలాలు"

అవినీతికి అదునైన మూలాలెన్నో

అవకాశ పదవికి వేలాలెన్నో

గీతానికి ఎగబడే తోడేళ్ళెన్నో

డబ్బుకు గడ్డి కఱచు ఇంద్ర జాలాలెన్నో

1.లంచం జన్మహక్కైన శాఖలెన్నో

ఆమ్యామ్యాకాశపడే గుంటనక్క లెన్నో

అధికారం ముసుగులో ఆరితేరిరెందరో

దర్జాగల దొంగలనక వీరినేమందురో

2.మందుపార్టీలకు మోజుపడే దొకరకం

పొందుచిందు కోరుకునేదింకోరకం

కానుకలను ఆశించేదొక అవినీతి

పలుకుబడికి తలవంచేదొక అవినీతి

3.శ్రమకు మించి లభించితే అక్రమార్జనే

తేరగా దొరికితే అదీ పరుల సొమ్మే

జీతందొబ్బితింటు పీడించడమెందుకు

విధిలేక కక్కిన వాంతి నాకుడెందుకు

Ok

రచన,స్వరకల్పన&గానం:రాఖీ

పాపాలను తొలగించే శ్రీ వేంకటేశ
ఐశ్వర్యమునొసగేటి శ్రీశ్రీనివాసా
నరులను పరిపాలించే శ్రీ తిరుమలేశా
ఏమని నినుకోరను నన్నెరుగనివాడవా
అడిగిపొందలేనప్పుడు మదిసుమాలు వాడవా
జయ జయ జయ అలమేలు మంగా విభో
జయ జయ జయ పద్మావతీ సతిప్రభో

1.నిత్య కైంకర్యాలు బ్రహ్మోత్సవాలు
కనుల పండగే స్వామీ నీ వైభవాలు
తండోప తండాల భక్త సందోహాలు
మెండైన సేవలు నిండుగుండు నీలాలు
ఇంతటి ఈ సందడిలో నా సంగతి మరచెదవా
కొండలు కోవెల విడిచి నా గుండెన నిలిచెదవా
జయ జయ జయ అలమేలు మంగా విభో
జయ జయ జయ పద్మావతీ సతిప్రభో

2.వైకుంఠం వదలి వచ్చి తిరుపతిలో నిలిచావు
ఏడుకొండలెక్కిమరీ వేడ్కతోడ వెలిసావు
నను రమ్మని పిలునీకు రాగమే కనరాదు
నీకై మొహంవాచినా చూచుయోగమేలేదు
కనులుమూసుకుంటాను కనికరించి కనిపించు
ఉఛ్వాసనిశ్వాసలొ నీ నామమె తలిపించు
జయ జయ జయ అలమేలు మంగా విభో
జయ జయ జయ పద్మావతీ సతిప్రభో

రచన,స్వరకల్పన&గానం:రాఖీ
రాగం:చంద్రకౌఁస్

నీ నడక చూసి హంస ఎంతొ నేర్చుకున్నది
నీ నడుముకు నెమలెపుడో సలామన్నది
కిన్నెరసానె విస్తుపోయెనీ వయ్యారానికీ
అలకనంద అలకచెందె చెలీ నీవొలికే వగలుకీ
మోము తిప్పకున్నమానె మోహించవచ్చునిన్ను
నీ హొయలుగని రెప్పలార్పలేకున్నది నా కన్ను

1.బిగుతైన రవికె వల్ల ఊపిరాగిపోవునేమొ
కట్టుకున్న కోకా ఎద తట్టుకోకపోవునేమొ
నీవే పూవని వాలే సీతాకోక చిలుకలు
నీ మేని స్వేదమే మధువుగా గ్రోలె తేనెటీగలు
గుభాళించు నీతనువుకు గులాబే గులాము
గాయపడిన హృదయానికి నీరూపే మలాము

2.మల్లియలే మనసుపడే నీ జడను చేర
పారిజాతాలె రాలె నీ అడుగుజాడలా
మందారవర్ణాలే  అందాలు చిందాయి నీ నఖాలనతికి
మువ్వల పట్టీలే గర్వంగా నవ్వాయి నీ పదాల ఒదిగి
నీ దేహ సౌష్ఠవమే  మునివరులకు శాపము
నీ అంగాంగము అంగనలకె పెంచేను తాపము

అనివార్యం మరణం-అనిశ్చితం జీవితం
ఎందుకు ఆరాటం-ముగియించగ అర్ధాంతర పయనం
భరించు ఏమీ ఆశించక-ఎదిరించు నీదైనతీరుగ
ఆత్మహత్య అర్థరహితము
మనుగడ సాగించడమే హితము మహితము

1.పరికించిచూడు ప్రకృతిని-పరిసరాలలోని జీవరాశిని
పిపీలికాది పర్యంతం-సలిపేను జీవన పోరాటం
ప్రమాదాల్లో చిక్కుబడినా-బ్రతుక ప్రయత్నిస్తాయి
చావు తావచ్చే వరకు-చచ్చుకుంటు బ్రతికేస్తాయి
బుద్దితెచ్చుకోవాలి అల్పమైన ప్రాణుల చూసి
సర్దుకోలేనపుడు సాగు తెగతెంపులు చేసి

2.కష్టాలు లేనివారు-ఇలలోన లేనెలేరు
పీతకష్టం పీతది-సీతకష్టం సీతది
చూసావా ఎప్పుడైనా-జలధి జల రుచిని
కన్నీటి వల్లనే-మారిందది లవణ స్థితిని
అవకరాలనధిగమించే ధీరులే ఆదర్శం
విధివంచితులైనాసరే వీడబోరు ఆత్మస్థైర్యం

రచన,స్వరకల్పన&గానం:రాఖీ
రాగం:దర్బార్ కానడ

కొఱవడుతున్నవి అనుబంధాలు
దిగజారుతున్నవి ప్రేమానురాగాలు
నేనూనాదను పరుగులాటలో
ఎండమావుల వెతుకులాటలో
గుండెలు బండబారుతున్నవి
బ్రతుకులు తెల్లవారుతున్నవి

1.విత్తిన చెట్టే మొలుచుట సహజం
గంజాయి మత్తులొ తూలుటే నైజం
కాళ్ళక్రింది నేలనొదిలితే రాలిపడడమే ఖాయం
విలువలనే గాలికొదిలితే మానవతే మటుమాయం
అత్యున్నత ఉత్తీర్ణతకై అనుభూతులు కర్పూరం
విదేశాల మోజులో కన్నవారు కడు దయనీయం

2.పసినాటి  వసతిగృహాలే పరిణమించి వృద్ధాశ్రమాలు
మితిమీరిన గారాబాలే తలకెక్కిన నిర్లక్ష్యాలు
తలిదండ్రులె ఆదర్శం బామ్మా తాతలనాదరించగా
ప్రభావమే ప్రాధాన్యం ప్రాప్తించినదే ప్రసాదించగా
వికాసం అభిలషణీయమే సర్వతోముఖవగా
విపరీతం అవనేకూడదు విడిపోయే దుర్దశగా

రచన,స్వరకల్పన&గానం:రాఖీ

సహజమైన అందం-నిజమైన సౌందర్యం
పరుగెత్తే లేగదూడలా-బెదిరేటి లేడికూనలా
ఎగురుతున్న తూనీగలా-సీతాకోక చిలుకమ్మలా
తిలకించిన ప్రతి నయనం-చెప్పినారెప్పలే అల్లార్చదుగా
పులకించిన ప్రతి హృదయం-ఆనందడోలికల్లో తేలియాడుగా

1ఉషోదయ తుషార బిందువై
ఆహ్లాద పరచునులే
పడమటి సంధ్యారాగంలా
మోదాన్ని చేకూర్చునులే
సిరిమల్లెలా-చిరునవ్వులా
అనుభూతినొసగునులే సొగసు

2.ఎడారిలోని సరస్సులా
దాహాన్ని తీర్చును లే
చిరుజల్లుకు హరివిల్లులా
నింగికి వన్నెలు చేర్చునులే
ఎగిరే కొంగల జట్టులా-అందిన తేనె పట్టులా
పరవశింప జేస్తుంది సోయగం

3.ఊరికే ఉరికే కొండవాగులా
వయ్యారాలు పోతుంది
నోరూరించే పాలమీగడలా
లొట్టలేయజేస్తుంది
కోడి పిల్లలా-చిన్ని మేకలా
చిక్కీచిక్కకుంటుందీ చక్కదనం

రచన,స్వరకల్పన&గానం:రాఖీ
రాగం:భీంపలాసి

ఏమున్నది సాయినీలొ అంతటి ఆకర్షణ
ఎందుకయా జనులకు నీవంటే ఆదరణ
వేలంవెర్రిగా షిరిడీ పయనాలు
తామర తంపరగా ఎగబడి నీ దర్శనాలు

1.నీవేమో ఫకీరువు నివాసమో మసీదు
నిత్యబిచ్చగాడివి నీవే ఓ గరీబు
ఇవ్వడానికేముంది నీకడ ధునిబూడిది
ఆత్రమెంతనో పాపం అడిగేవాడిది
రెండురూకలడుగుతావు నీవొసగడమేమొగాని
గుండెలోన దూరుతావు మొండిగా తిష్ఠవేయ

2. చిరిగిన కఫిని పెరిగిన గడ్డము
మాసిన తలరుమాలు-చేతిలో సటకా
'అల్లాహ్ మాలిక్' అన్నదొకటె నీజపము
అందమా చందమా అతులిత నీ రూపము
కోట్లమంది కోరికలూ తీర్చావని ప్రతీతి
నాకొకటే కోరిక - కోరికనే చేయి నిహతి

రచన,స్వరకల్పన&గానం:రాఖీ
రాగం: యమన్ కళ్యాణి

భావాలు పావురాలై ఎగిరేను స్వేఛ్ఛగా
అనుభవాలు పంజరాలై బంధీలు చేయునుగా
కలమెంత సహకరించినా
కాగితమే కదలనీదుగా
గొంతుతో చెలిమి కలుపుతూ
పాటగా పరిణమించుగా

1.కోయిలకు కూయాలని ఉన్నా
మావి చివురు కరువైతేనో
వెన్నెలకు కాయాలని ఉన్నా
రాహువే కమ్మేస్తేనో
ఎంతటి చైతన్యమైనా
ప్రకృతికి లోబడి ఉంటుంది
చాతుర్యమెంతటిదైనా
కాలానికి  కట్టుబడుతుంది

2.ఎన్నిముళ్ళు వేస్తే ఏమి
మనసులే ముడివడకుంటే
ఏడడుగులు వేస్తేఏమి
అడుగేసినా అడుగుతు ఉంటే
నమ్మకమే ఆయువుపట్టు
బ్రతుకునావ సాగడానికి
సర్దుబాటు బాటపట్టు
సుఖకరమౌ కాపురానికి

https://youtu.be/k5H641TCxPg?si=9qhu__hwaQZk2M8W

రచన,స్వరకల్పన&గానం:డా.గొల్లపెల్లి రాంకిషన్ రాఖీ

రాగం:సారమతి

నా కలమున కలవు నీవు
నా స్వరముకు వరము నీవు
పల్లవించు పల్లవిగా నా పాటన నీవు
పదపదమున సుధ చిలుకవె మాతా శారదా
చరణములను అందించవె వరదా పరదేవతా

1.కథనో కవితనో గేయమో పద్యమో అన్నీ నీ రూపాలే
చిత్రమో శిల్పమో పాటనో నాట్యమో నీగుడి దీపాలే
తరియించనీ నను కవనగంగలో మునిగీ
వెలయించనీ నను నీ ప్రతీకలే చెలఁగీ
అనితర సాధ్యమై నా సాహితి వెలగనీ
కాలమున్నంతవరకు జనహృదయం గెలవనీ

2.చిత్తమంత నీవే ఆక్రమించినావు
ప్రతియోచన నీదిగా మలచినావు
నీటిబిందువవనీ నను తామరాకు పైని
భవబంధము తొలగగ నీదెస పయనించనీ
అక్షరమే లక్ష్యమై నా దీక్ష కొనసాగని
మోక్షమె సాకారమై  నను నీలో లయమవనీ

అందానికెన్నెన్నో భిన్నమైన కోణాలు
ఆన్నీ ఎదలోన గుచ్చుకునే బాణాలు
రూపలావణ్యం కొందరిది-మేని సౌష్ఠవం కొందరిది
నిండైన స్త్రీత్వం కొందరిది-మెండైన మనస్తత్వం కొందరిది
ఏదో ఒక ప్రత్యేకతవినా సృష్టించడు చతుర్ముఖ బ్రహ్మ
మననిమనం ఎరిగితేనె సార్థకం మానవ జన్మ

1.తొలిచూపులోనె తలతిప్పుకోనివ్వదు సుందర వదనం
అమరిన ప్రతిఅంగం మన్మథరంగంలా మోహం పెంచేను దేహం
ఎదురైనవెంటనే దేవతలాతోచును శుభాంగి కట్టుబొట్టు లక్షణం
ఆదరించినంతనే ఆత్మీయత కురిపించును సుదతి స్నేహితం
ఏదో ఒక ప్రత్యేకతవినా సృష్టించడు చతుర్ముఖ బ్రహ్మ
మననిమనం ఎరిగితేనె సార్థకం మానవ జన్మ

1.కృష్ణవర్ణమైతెనేమి ఆకట్టుకుంటుంది అన్నులమిన్న
పొట్టిపొడుగు ఏదైనా అల్లుకపోతుంది అల్లరి కూచి
చెరగని నవ్వుతొ ప్రసన్న దృక్కులతో మనసు చూరగొంటుంది ముదిత
అరమరికలు లేకుండా బింకానికి పోకుండా కలిసిపోతుంది కలికి
ఏదో ఒక ప్రత్యేకతవినా సృష్టించడు చతుర్ముఖ బ్రహ్మ
మననిమనం ఎరిగితేనె సార్థకం మానవ జన్మ

ఇది వింతలున్న ప్రపంచం
ఇది చింతలున్న ప్రపంచం
ఎంతగా ఆరాట పడినా
మరెంతగా ఉబలాట పడినా
ఎవరికెంతనో అంతే ప్రాప్తం
అదే కదా లలాట లిఖితం

1.ప్రయత్నిస్తేనే సాంతం... ఫలితం 
ఫలితమేదైనా అది  నీకు సొంతం
గెలుపుకు ఓటమికీ తేడా ఇసుమంతమాత్రం
కృషిఉంటేనే తీరుతుంది ఆత్రం

2.నీకోసం వెతకదెపుడు అవకాశం
అందిపుచ్చుకోవాలి దొరికిన నిమిషం
పట్టామా వదల వలదు పట్టుదల
గుప్పిటి లక్ష్యాన్ని చేయబోకు విడుదల

3.విశ్వాసమె ఒక చాకు
వాడడం తెలియాలి నీకు
పండునూ కోయవచ్చు సులువుగా
గుండెలో దించవచ్చు మాయగా

4.ఉన్నతి నిచ్చేది వేదాంతం
అధోగతి చేర్చేది వైరాగ్యం
కర్తవ్యపాలనే గీతా సారం
యథాతథ జీవితం ఆనందయోగం

https://youtu.be/4e2KATEm9wA

రచన,స్వరకల్పన&గానం:డా.గొల్లపెల్లి రాంకిషన్ రాఖీ

వెదురుకు గాయమైతె వేణువౌతుంది

వెన్నకు సెగ తగిలితే ఆజ్యమౌతుంది
రాలిపడిన పింఛమూ మకుటమౌతుంది
ప్రభూనీదయ ఉంటే రాయి రత్నమౌతుంది

1.అవకరమును కరముతాక కుబ్జ స్నిగ్ధ అయ్యింది
కనికరమున కాలు తాక రాతి నాతి అయ్యింది
వానరమే సేవించి నిను ఉరమున నిలిపింది
ప్రభూ నువు దయతలిస్తే ఉడుత ఖ్యాతినొందింది

2.డింభకుడిని బ్రోవగా స్తంభమె నెలవైనది
కాకాసురు కూల్చగా పరకే శరమైనది
బలిమదమదమగా పదమాయుధమైనది
ప్రభూ నీవను గ్రహించ నా బ్రతుకేనీదైనది

ఒక మిథున కథనం
ఒక మథన హృదయం
నలిగేనెన్నొ విలువలు
కమిలే కన్నె కలువలు

1.పన్నేరు మాయ వలలు
దోచేరు పసిడి కలలు
విధివింత నాటకంలో
బలియైన బ్రతుకులు

2.గొంతులోని గరళాలు
గుండెచాటు మర్మాలు
కక్కలేని మ్రింగలేని
గతకాల దారుణాలు

3.తప్పనిసరి మూడుముళ్ళు
విప్పలేని చిక్కుముళ్ళు
కూలనీక కాపురాలు
నేలరాలె స్నేహితాలు

https://youtu.be/FQ_XYzcI20U?si=-rWfj0S_P2SNVEIe

బతుకమ్మా బతుకమ్మా ఉయ్యాలా
భామలంత ఆటలాడే పండగే ఇయ్యాల
ఇంటింటా ఆనందాలు విరిసే వరమే ఇయ్యాల
పాడిపంటా పిల్లాజెల్లాఎదిగేలా నీ దయ మాపై కురియాల

1.బంగారు వన్నెలున్నా తంగేడు పూలు
గుత్తూలు గత్తులుగా మెత్తాని గున్గూవూలు
ఎర్రాని పచ్చాని ముద్దా బంతీ పూలు
కనికట్టు చేసేటి కలువాలు కట్లపూలు
రాణీగులాబీలు రాచా గుమ్మాడీ పూలు
తీరొక్క పూలుకూర్చి తీర్చీ దిద్దేము నిన్ను

2.తొల్తననువ్వు ఎంగిలిపూల బతుకమ్మవే
ఆటెన్కనాడైతె అట్కూల బత్కమ్మవే
మూడోనాడు ముద్దాపప్పు బతుకమ్మవేనూ
నాల్గోనాడూ నానబియ్యం బతుకమ్మవేనూ
అట్ల బత్కమ్మ ఐదోనాడు అల్గిన బత్కమ్మ ఆరోనాడు
వేపకాయల వెన్నముద్దల సద్దుల బత్కమ్మరూపులు

3.ముత్తైదువలంతా కలిసి మూకుమ్మడిగానూ
పదహారుప్రాయాపు పడ్చూల తోడుగాను
నీ పాటలెన్నో పాడి నీచుట్టూ తిరుగుతుఆడి
నీరాజనాలే నీకూపడతాం నివేదనలెన్నొ నీకూపెడతాం
ఏడాదికొక్కమారు ఎదురేగి మోసుకొస్తాం
తొమ్మిదోనాడూనిన్నూ ఊరేగి అనిపివేస్తాం

పుడమి చీల్చుక పుడుతుంది గడ్డి పరక..
తన జన్మకూ సార్థకత కోసం
పాదాల క్రింద నలిగుతున్నా..
మనుగడ సాగిస్తుంది కిక్కురు మనక..
ప్రకృతే పాఠశాల ప్రతి మనిషికి
పాఠాలు వల్లెవేయి వికాసానికి

1.మూడునాళ్ళ ముచ్చటగా
వికసించును ప్రతికుసుమం
చేరుతుంది గుడినో జడనో
మార్చుకోక తన నైజం
అందాలు చిమ్ముతుంది
వసివాడునంతదాకా
సుగంధాలు రువ్వుతుంది
గాలి మోసినంతదాక
ప్రకృతే పాఠశాల ప్రతి మనిషికి
పాఠాలు వల్లెవేయి వికాసానికి


2.చినుకుగా తాను మొదలయ్యి
కలిసిపోతుంది తోటి వాటితోటి
ఒక్కొక్కటిగా చేరి
వాగులూ ఝరులౌతుంది
అడ్డుగా కొండలున్నా
ఆపదు నది తన ధాటి
నేలదూప తీర్చుతూ 
చేరుతుంది ఆనందంగా కడలి కౌగిలి
ప్రకృతే పాఠశాల ప్రతి మనిషికి
పాఠాలు వల్లెవేయి వికాసానికి

రచన,స్వరకల్పన&గానం:రాఖీ
రాగం:చిత్తరంజని

నిన్ను ప్రేమించలేను-చెట్టపట్టాలువేసుకొంటూ
నీ వెంటపడలేను-బంధనాలు తెంచుకుంటూ
నా మదినే కోవెల చేసి నిన్ను ప్రతిష్ఠిస్తాను
దేవతగా ఆరాధిస్తూ బ్రతుకిలా గడిపేస్తాను

1.నీ అందం తరిగిపోయినా నా దృష్టిమారిపోదు
నీ వయసు ఉడిగిపోయినా అనురాగం మూగవోదు
మనసుల మధ్యన ప్రబలిన బంధం మనది
మరణం సైతం విడదీయని మిథునం మనది

2.దేహైక ప్రణయాలే ప్రేమకు పరమార్థమా
స్వప్నలోకాలలో మనమే మనలేమా
కోరుకున్న తక్షణమే నన్ను చేరుకుంటావు
పెదవి విప్పకుండగానే  నాలో లయమౌతావు

"వీడరా దైన్యం-నీవె ఒక సైన్యం"

మ్రోగే బంధూకులు మూగవోయినాయి
ప్రశ్నించే కలాలన్ని విరిచివేయబడినాయి
నినదించే గళాలన్ని నొక్కివేయబడినాయి
అడవితల్లి ఒడిలోనే సమాధులైపొయినాయి
అడిగేవాడెవ్వడు అణచివేయబడినప్పుడు
దిక్కూదెస ఎవ్వరు హక్కుకాలరాచినపుడు

1.నీకు నీవె తోడై నీవే ఒక దండువై
అండదండవై అన్యాయంగుండెలొ నిదురోవాలి
చట్టాలను తెలుసుకొని బాధ్యతగా మసలుకొని
నిఖార్సైన పౌరుడిగా రూపొందాలి
అవినీతి మూలాలను పెకిలించివేయాలి
ప్రజలే ప్రభుతయని ఋజువే చేయాలి

2.కులమతాల మాయలోన ముంచేసే
నేతల తలరాతలు మార్చగ భరతం పట్టాలి
ఓటు నీకు ఆయుధమని నీవే యోధుడవని
గుర్తెరిగి ప్రలోభాల గురికాక పట్టంకట్టాలి
రాజ్యాంగమే దైవంగా భావించాలి
దేశ సమైక్యతె వేదంగా తలపోయాలి

రచన,స్వరకల్పన&గానం:రాఖీ

రాగం:మోహన

కనురెప్పవేయనీయవు
తలనైన తిప్పనీయవు
చూపేమో సూదంటురాయి
నీఅందం అందానికె గీటురాయి

1.మడిగట్టుక కూర్చుంటే మననీయవు
మనసు నిగ్రహించుకుంటె పడనీయవు
తప్పుకొని పోతుంటే  కవ్విస్తావు
అందీఅందకుండ బులిపిస్తావు
నీ పరువం మదనుడి బాణం
నిను కన్నా కనకున్నా పోతుంది ప్రాణం

2.నీ మేని వంపులే హంపిలోశిల్పాలు
అంగాంగ హంగులే అజంతా చిత్రాలు
నువుకదిలే కదలికలే ఖజురహో భంగిమలు
నీ తనువు వర్ణనలే ప్రబంధకావ్యాలు
నీ వలపే  మోహన రాగం
నీ పొందే ఈ జన్మకు  ఓ రసయోగం

రచన,స్వరకల్పన&గానం:రాఖీ
రాగం:వసంత భైరవి

కళాకారుల జీవితం
కళామతల్లికె అంకితం
చతుషష్టి కళల నైపుణ్యం
జన్మాంతరాల పుణ్యం
విశ్వకర్మ ఒసగిన వరము
మయబ్రహ్మ అనుగ్రహము

1.ఎక్కడ దాగుందో అంతటి కౌశలం
ఎవ్వరు నేర్పారో జన్మతః చాతుర్యం
సృజనలో బ్రహ్మనే మించిపోయారు
ప్రతిభలో ప్రకృతినే అధిగమించారు
భారతీ దేవీ ఆశీస్సులే అవి
సరస్వతీ మాత ఇచ్చిన దీవెనలే అవి

2.ఊహకైన అందనిది ఆ వైవిధ్యము
చూపుతిప్పుకోనీదా దృశ్యమే హృద్యము
అవకరమేమున్నా అది అడ్డుకానేకాదు
అందలాలు ఎక్కకున్నా చైతన్యమాగిపోదు
సృష్టికి ప్రతిసృష్టి చేసే విశ్వామిత్రులు
రసిక ప్రేక్షక జనులకు అభిమాన పాత్రులు

https://youtu.be/QpVcKkg5QRY?si=Un41yAQCIPIBX592

రచన,స్వరకల్పన&గానం:రాఖీ

రాగం:హనుమత్తోడి

కపివరా మాకు ధైర్యమునీవేరా
కొండగట్టు దేవరా ఆత్మ స్థైర్యము నీవేరా
సంజీవరాయా సరగున మము బ్రోవరా
అంజనానందనా మమ్ము అక్కునజేర్చుకోరా 
భజింతురానిను రామభక్త హనుమా
నుతింతురా పవనసుతా మము దయతో గనుమా

1.వాగధీశ పలుకులందు తేనె చిలుకనీయరా
జితేంద్రియా చిత్తమునే కట్టడి సేయరా
సింధూర వర్ణాంగా సుందరకాండ నాయకా
జానకి శోకనాశకా దానవాంతకా
భజింతురానిను రామభక్త హనుమా
నుతింతురా పవనసుతా మము దయతో గనుమా

2.చిరంజీవ పీడించే రగ్మతలను మాన్పరా
మారుతీ మానసిక శాంతిని చేకూర్చరా
లక్ష్మణప్రాణదాత ఆపదనెడ బాపరా
ప్రసన్నాంజనేయ మాకండగ నీవుండరా
భజింతురానిను రామభక్త హనుమా
నుతింతురా పవనసుతా మము దయతో గనుమా

పెదవి మీది పుట్టుమచ్చ పెంచె దాహము
చేతిమీది పచ్చబొట్టు తెలిపె మోహము
కనుకలమే రాసెనెన్నొ ప్రేమలేఖలు
మూగసైగలే తెలిపే మనసు ఊసులు

1.ముంగురులే పంపసాగె మేఘసందేశము
బొటనవేలు నేలరాయు అభినివేశము
చీరకొంగు వ్రేలుచుట్టు తీపిబిడియము
తలవంచి మెలిచూపుల ఆహ్వానము

2.మూతివిరుపు ఎఱుకపరిచె మది ఆత్రము
అధరమదుర మధురమాయే మదన శాస్త్రము
గాలిమోసుకొచ్చింది నిట్టూర్పుల ఊష్ణము
ఓపలేని విరహానికి ఇంకేల సాక్ష్యము

రచన,స్వరకల్పన&గానం:రాఖీ

ఎద ఏనాడో -శృతికలిపింది
పదమే లయలో కొనసాగింది
మన అనుబంధమే యుగళగీతం
మన సావాసమే సత్యం నిత్యం  శాశ్వతం

స్నేహానికి మోహమెంతో చేరువ
అహముకు తావీయని తీరుగ
పరస్పరం పరకాయప్రవేశమే
ఒకరికొరకు ఇంకొకరం అంకితమే
మనమైత్రి మంచి గంధమే
మన చెలిమి నెంచగా  మకరందమే

ఊపిరి నీపేరే పలవరిస్తుంది
మది నీఊసులనే తలపోస్తుంది
నీ కంటికి రెప్పనై కాపుంటా
నీ వెంటనీడలా తోడుంటా
కలిసిసాగుదాం కాలం అంచులదాకా
కలలో ఇలలో కలతలజోలిలేక

రచన,స్వరకల్పన&గానం:రాఖీ

బియ్యము మెతుకయ్యే క్షణమది ఏదో
పాలుతోడి పెరుగయ్యే ఆ నిమిషమేదో
కణసంయోగమెపుడు శిశువయ్యేనో
జీవుడెపుడు వీడితనువు శవమయ్యేనో
అంతుపట్టలేనిదా దైవ రహస్యం
అంతరార్థమేమిటో అగమ్య గోచరం

1.గొంగళిపురుగు సీతాకోక చిలుకయ్యే వైనమేమిటో
రంగుల ఇంద్రధనుసు సృజన చాతుర్యమేమిటో
గిజిగాడి గూటి నిర్మాణ నైపుణ్యమెవరు నేర్పిరో
ఊసరవెల్లికి వర్ణ వితరణెవరు చేతురో
అంతుపట్టలేనిదా దైవ రహస్యం
అంతరార్థమేమిటో అగమ్య గోచరం

2.ఆహార నిద్రా భయ మైథునాలనేర్పచిన దెవ్వరో
 చేపలకు పక్షులకు ఈదనెగుర శిక్షణ నెవరిచ్చిరో
ఖగనాగుల నడుమన పగనెవ్వరు కలిపించిరో
వేటాడగ మృగరాజుకు పాటవమును కూర్చిరెవరొ
అంతుపట్టలేనిదా దైవ రహస్యం
అంతరార్థమేమిటో అగమ్య గోచరం

రచన,స్వరకల్పన&గానం:రాఖీ
రాగం:ఆందోళికా

ఉసిగొలిపే నయనాలు-కౌముది వైనాలు
ఊరించే అధరాలు మధురాతి మధురాలు
అలరేగిన నీ కురులు రేపేనెన్నెన్నో మరులు
చెవులకున్న జూకాలు కలిగించె మైకాలు
అణువణువున నీ అందం  చెలీ అమృతభాడం
నిగ్రహించుకొనడమ్మిక నాకు దినదిన గండం

1.నీ కాటుక సోయగమే కిటుకులెరిగి ఉన్నది
నీ నుదుటన తిలకమే అయస్కాంతమైనది
కనుబొమలే ఎక్కిడిన మదనుడి ధనువైనవి
నిగారింపు నీ చెంపలు కెంపుల కింపైనవి
అణువణువున నీ అందం చెలీ అమృతభాడం
నిగ్రహించుకొనడమ్మిక నాకు దినదిన గండం

2.రతీదేవి నిన్నుచూసి అసూయనే గొన్నది
రంభనే తను నీతో  పందానికి తగనన్నది
రవివర్మ కుంచె సైతం నినుదించ తలవంచింది
జక్కన చెక్కిన శిల్పం నీగొప్పను ఒప్పుకుంది
అణువణువున నీ అందం చెలీ అమృతభాడం
నిగ్రహించుకొనడమ్మిక నాకు దినదిన గండం

రచన,స్వరకల్పన&గానం:రాఖీ
రాగం:హరికాంభోజి

బ్రతుకెంత నరకం
నువు వినా అనుక్షణం
నీ ప్రతీక్షలో ప్రతినిమిషం
మనలేను ఈ విరహం

1.అరచేతిలో స్వర్గంచూపించినావు
ఊహల పల్లకీ నెక్కించినావు
గాలిలో మేడలెన్నో కట్టింపజేసావు
నీటిపై రాతలెన్నో రాసేసినావు
నాదానివేనంటు బాసలే చేసావు
తృటిలోనే మటుమాయమై పోయినావు

2.ప్రేమకు మారు పేరే నమ్మిక
వంచించబోకే నను నీవిక
అంకితమైనాను నీకే ప్రేమిక
శూన్యమయ్యింది నా జీవిక
పిచ్చెక్కిపోతోంది నువులేక నాకు
గోదారె దారాయె కడకు

https://youtu.be/M63dtQ0MHhE?si=5xaH2hErd0uMnzh5

రచన,స్వరకల్పన&గానం:రాఖీ

రాగం:ముఖారి

నీ చూపుల వలచిక్కని చేపలు ఏవి
నీ కైపులొ తడిసిపోని తాపసి ఏడి
చెప్పడానికెన్నైనా చెప్పగలరు లోకాన
వనిత వలపు కోరుకోని వారెవ్వరు జగాన
నేనెంతటివాడనే కాంతా దాసోహమనక
కామిగాకమోక్షగామి కాడనునది వాడుక

1.మేనక వెనక బడి చెడె విశ్వామిత్రుడు
ఊర్వశి వశమయ్యీ మురిసె పురూరవుడు
వరూధినీ మోహమున మోసగించె గంధర్వుడు
మోహిని అందానికి మేను మరిచె మహాదేవుడు
నేనెంతటివాడనే కాంతా దాసోహమనక
కామిగాకమోక్షగామి కాడనునది వాడుక

2.హరి ఉరమున ప్రతిష్ఠించె సిరిని ప్రేమ మీరగ
సగమేనునర్పించె హరుడు గౌరి కోరగ
విరించి తరించె వాణి రసనకొల్వుదీరగ
దేవేంద్రుడహల్యకై కుక్కుటముగ మారెగా
నేనెంతటివాడనే కాంతా దాసోహమనక
కామిగాకమోక్షగామి కాడనునది వాడుక

పోరుగడ్డ తెలంగాణ తిరగబడ్డది
విముక్తి కోసమే దేనికైన తెగబడ్డది
బలిదానాలసాక్షిగా సాధించిన ప్రతిబిడ్డదిది
త్యాగనిరతికేనాడూ బహుదొడ్డది
జై తెలంగాణ జయహో తెలంగాణ

1.రజాకార్ల ఊచకోత రక్తపాత మాయెగా
నిజాం నిరంకుశత్వమే బడుగుల తుడిచేయగా
దొరలగడీ చెఱలోన నలిగీ బాంచన్ కాల్మొక్తగా
భూస్వాముల పాలబడి వెట్టిచాకిరితో అశక్తగా

2.నగ్నంగా పడుచులతో బతుకమ్మలాడించగ
కడజాతివారికి శిక్షగ మూత్రాలు త్రాగించగ
నోటికాడి కూడుకూడ ముష్కరమూక కొల్లగొట్ట
కన్యత్వాన్ని తొల్తగ చెఱచి దాసీలుగ మార్చగ

3.కొమురంభీం రాంజీల ఆదివాసి పోరాటం
కాళోజి దాశరథిల అక్షర పోరాటం
దొడ్డికొమ్రయ్య సూరి వంటివారి సాయుధపోరాటం
ముక్కోటి తెలంగాణ ప్రజల నెరవేరిన ఆరాటం
జై తెలంగాణ జయహో తెలంగాణ

https://youtu.be/Bqt34vwtFMY?si=nSjFnTm8Vn2_IRo1

రచన,స్వరకల్పన&గానం:రాఖీ

రాగం:ధాని

గర్భస్థ శిశువుకూ గ్రాసాన్ని కూర్చుతావు
ఏక కణ జీవినీ లోకానికి తెస్తావు
కాలచక్రమెప్పటికీ ఆగకుండతిప్పుతావు
నీవుండేదేతావు నిఖిలము నిండుతావు
శ్రీలలితే మాతరం భజామ్యహం నిరంతరం
హే భగవతి దేహిమే తవ పాదసన్నిధిం

1.నీడగ తోడుంటావు నిత్యసంతోషిణి
రెప్పగ కాపుంటావు నిర్మలకాత్యాయిని
చరాచర జగత్తునంత నియతిన నడిపిస్తావు
ఏదో పరమార్థము సృజనకు ముడిపెడతావు
శ్రీలలితే మాతరం భజామ్యహం నిరంతరం
హే భగవతి దేహిమే తవ పాదసన్నిధిం

2.సత్వరజస్తమో గుణాతీతవు మాతా గాయత్రి
సత్యసుందర శివంకరివి జగన్మాతా రాజేశ్వరి
నిన్ను తెలియగోరితిని నిరంజని పావని
నీ బాలుడనే జనని అనుగ్రహించు యోగిని
శ్రీలలితే మాతరం భజామ్యహం నిరంతరం
హే భగవతి దేహిమే తవ పాదసన్నిధిం

రచన,స్వరకల్పన&గానం:రాఖీ
రాగం:శహన

ఎలుకతోలుతెచ్చి ఏడాది తోమినా
ఏమాత్రమైనా అదిమారునా
బోధలెన్నొ చేసి సన్మార్గము చూపినా
ఆత్మ ఏనాటికైనా నిను చేరునా
సాయీ నువు మళ్ళీ అవతరించవోయి
బాబా నువ్వే మము తరింపజేయి

1.రెండురూకలీయగలిగితే చాలన్నావు
దండిగా ఆర్జించి దాచుకొంటున్నాము
సాటి మనిషికించుకైన సాయపడుమన్నావు
అసూయతో మరింత హానిచేయుచున్నాము
సాయీ కాసింత కనికరించవోయీ
బాబా ప్రేమనేర్పి  ఉద్ధరించవోయి

2.మనసారా నిన్నే నమ్ముకోమన్నావు
తటపటాయిస్తూ శరణుకోరకున్నాము
గుండెలోన నిన్ను నిలుపమన్నావు
గుళ్ళూగోపురాలు నిర్మించుతున్నాము
సాయీ మమ్మల్నిక సమూలంగ మార్చివేయి
బాబా మాచేయిపట్టి నీచెంతకు చేర్చవోయి

https://youtu.be/4PaAsguyxDw

నిత్యము నీవే సత్యము నీవే
విశ్వాధిపత్యము నీదే
ఆదియు నీవే అంత్యము నీవే
కాలచోదనము నీదే
దేహమునీదే జీవమునీదే
నా ఆత్మ రూపము నీవే నీవే
మహాలింగ భూతేశ్వరా ప్రణుతింతురా
మహాదేవ పరమేశ్వరా అభినుతింతురా

1.ఎరుకనీయరా ఎరుకల వేషా
ఎదగ మ్రోగరా ఢమరుక భూషా
దర్పము మాన్పర దిగంబర
అహమును కూల్చర ఋతంబర
మహాలింగ భూతేశ్వరా భజియింతురా
మహాదేవ పరమేశ్వరా స్మరియింతురా

2.పృథివ్యాపస్తేజోవాయురాకాశలింగా
పరితాపము నెరవేర్చరా
ద్వాదశ జ్యోతిర్లింగా అభవా భస్మాంగా
భవజలధిని కడతేర్చరా
మహాలింగ భూతేశ్వరా అర్చింతురా
మహాదేవ పరమేశ్వరా కీర్తింతురా

అడుసు తొక్కుడెందుకు-కడుగ మిడుకుడెందుకు
ఆదిలోనె అణిచేయ్యక-సోది నియతులెందుకు
దారి గుంతలెందుకు-వీథి చీకటెందుకు
మన మొకమే బాగులేక అద్దముననుడెందుకు

1.ఫాక్టరీలె మూసేస్తే-ప్లాస్టిక్కు చిక్కదుగా
నిషేధమే విధిస్తే-మద్యపానముండదుగా
అంగట్లో అమ్మనిచ్చి-ఆంక్షల ఆరాటమేల
అతిక్రమించారని-దండుగులే దండుకొనుడ?

2.ఉన్ననాడు వృధాచేసి-లేనినాడు ఏడ్వడమా
దుబారాను చేరదీసి-ఋణగ్రస్తులవ్వడమా
ముందుచూపు లేనివాడు-ఎందులకూ కొఱగాడు
గ్లోబల్ వార్మింగ్ పేర-గోలగోల చెయ్యడు

3.తయారీలొ మితి బిగిస్తె-నియంత్రించ సులువెగా
అతివేగం అవలీలగ-కట్టడి చేయొచ్చు కదా
ఖజానాకు ఋజుమార్గం-జరిమానా ఐతె ఎలా
రాయితీల పేరుతో-సోమరులను చేస్తె ఎలా

4.కొంటె పన్ను ఉంటె పన్ను-నడిపితె అడుగడుగు పన్ను
రోడ్డు పన్ను టోలు పన్ను-సరిలేని సిగ్నళ్ళు దాటితేను పన్ను
వాహనమే గుదిబండగ-పళ్ళనూడగొట్టు పన్ను
పన్నులపై పన్నులేగ-ప్రభుతకెపుడు వెన్నుదన్ను

రాగం:మేఘ మల్హార్

కురిసిన వానకెంత పరవశం
తడిసిన మట్టికెంత పరిమళం
బీడైన పుడమికది ఓ వరం
మోడైన మానుకెంత సంబరం

1.రైతన్న పొలములో గంగావతరణం
ఊటలేని బావులలో జలనిదర్శనం
వాగులు వంకలకూ చైతన్య సలిలం
నదులే వరదలవగ  ఉద్విగ్న వీక్షణం

2.గొడుగులే అడుగులేయు చిత్రం
ఎటుచూడూ నీటిమడుగులే విచిత్రం
ఏరువాక జరిపే సుముహూర్తం
ఏడాది గ్రాసానికి ఎనలేని ఆత్రం

https://youtu.be/IhZMes5kJVI?si=wtCiTYKEDggufMjf

రచన.స్వరకల్పన&గానం:రాఖీ
రాగం:పీలూ

నను గనవే జనని
మననే నీ దయమాని
తెరిపి లేక కురియనీ
నాపై నీ కనికరముని
వాగ్దేవీ వారిజలోచనీ
నీ ధ్యాసలో నను కడతేరనీ

1.విదిలించుకున్నాగాని
బంధములలొ తోతువే
విధిలిఖితము ఇదెయని
నను ఎడబాతువే
నినువినా ఒరుల విన
నను ఏదరి నువు జేర్చినా

2.నా వెతనే గీతి జేతు
చిత్తము నిటు నిలుపవే
నా కథనే కవిత రాతు
చిత్తగించ తలచవే
అక్షరాల నర్చించెద
నా లక్ష్యము నెరవేర్చవే

https://youtu.be/uDPeJ1vcoiE?si=w6JIFVR8VATCd9jX

గూడు లేని కోయిలకు మావి తోడు దొరికింది

పాటలోని మాధురికే తాను ఫిదా అయ్యింది

కచ్చేరి పెట్టడానికి వనముకంతా తెలిపింది

వసంతాన్ని మోసుకొచ్చి తనసొంతం చేసింది

1.పికమేదో కాకమేదో కనిపెట్టగలిగింది

రూపమెలా ఉన్నా గళమునకే విలువిచ్చింది

నీదీ నాదీ ఓ కథే అంటూ గీతాన్ని నేర్పింది

ఆ గానమాధుర్యానికి జగమంతా తలవూచింది

2.చెక్కగలుగు శిల్పుంటే శిల శిల్పమౌతుంది

సాన పెట్టునేర్పుంటే రాయి రత్నమౌతుంది

భక్తిదృష్టి ఉన్నపుడే సర్వమూ దైవమయం

ఆదరణ నోచినపుడే కళలౌను కమనీయం

రచన,స్వరకల్పన&గానం:రాఖీ
రాగం:తిలాంగ్

అందనిదానికోసం అర్రులు సాచడం
అరిచేతిలొ ఉన్నదేదో జార్చుకోవడం
ఎందుకీ పరుగులవేట ఎండమావుల వెంట
దేనికీ వెంపర్లాట ఇంద్ర ధనుసు భ్రాంతే కంట

1.సుందరాంగుల పొంగులన్నీ-సబ్బునీటి బుడగలంటా
అందంగా బులిపిస్తాయి-అందుబాటుకొస్తాయి
పట్టుకోబోతే ఎగిరి పోతాయి
ముట్టుకోబోతే పగిలిపోతాయి
ప్రకృతి సౌందర్యమంతా నయనానందకరమే
స్త్రీఆకృతి రహస్యమంతా చిదంబర శంకరమే

2.గతము తలచి వగపు-భవితకెంతొ ఎదిరిచూపు
వర్తమానమే మటమాయం-కన్నమూసి తెఱిచే లోపు
బ్రతుకు దారబోసి మితిమీరి ఆర్జించేవు
తేనెటీగలాగా శ్రమతొ పోగుచేసేవు
అనుభవించడానికి జీవితమే కరువౌతుంది
జ్ఞానోదయమయ్యే సరికి చావుచేరువౌతుంది

కదిలిస్తే కవిత్వం
స్పందిస్తే సంగీతం
నీ సహవాసం అనునిత్యం
నువు నవ్వితే రసరమ్యం
ఆనందమే నా గమ్యం

1.మది ఆడుతోంది మయూరమై
నీ మధుర గానానికి
సడిరేగుతోంది అలారమై
నీ మేని గంధానికి
బృందామనమైంది జీవనం
నీ పాదం మోపినంత మేరకు
నందనవనమౌతుంది ప్రతిదినం
నీతో గడిపినంత వరకు
సాగనీ మనమైత్రి కడదాకా
చేరనీ స్నేహగంగ కడలిదాకా

2.గుండెకొట్టుకుంటుంది అందరికీ
లబ్ డబ్బనీ
నా హృదయమేమొ పలవరిస్తుంది
నీ పేరుని
సమయమాగకుంటుంది ప్రతివారికి
టిక్ టిక్కనీ
క్షణం కదలనంటుంది గడిపేదెలా
నువువినా ప్రతిరోజుని
కలవలేని నేస్తమా కలనైనా చేరవా
కునుకైనా లేనినాకు అదికూడ సాధ్యమా

OK

రచన,స్వరకల్పన&గానం:రాఖీ

రాగం:రేవతి

కీర్తన నాది నర్తన నీది

సాగనీ నటరాజా-కళామతల్లి పూజ

చెలరేగనీ చిదంబరేశ-నా హృదయ ఘోష

1.భూ నభోంతరాలు దద్దరిల్లగా

పదునాల్గు భువనాలు పిక్కటిల్లగా

సప్తసముద్రాలు ఉవ్వెత్తున ఎగసిపడగ

ప్రకృతి సమస్తం ప్రకంపించునట్లుగా

సాగనీ నటరాజా నీ తాండవ లీల

ప్రకటించనీ చిందంబరేశ  నా ఆత్మ భాష

2.జలపాతాలే తంబూరాలై సుశ్రుతీయగా

ఎదనాదాలే మృదంగ జతులై లయకూర్చగా

సెలయేటి అలలే జలతరంగిణులై మ్రోగగా

ఆకుల గలగలలే సంతూర్ ధ్వనులై రవళించగా

సాగనీ నటరాజా నీ నాట్య కేళీ

పాడనీ చిదంబరేశ నా జీవన సరళీ

3.పంచభూతాలే ప్రేక్షకులవగా

పంచప్రాణాలే సమీక్షకులవగా

పంచాననా ప్రపంచ పరిరక్షకా

నీ పంచన చేరితిరా నను పెంచిపోషించగ

సాగనీ నటరాజ ఆనంద నృత్య హేల

చల్లారనీ చిదంబరేశ నా బ్రతుకున వెతలకీల

రచన,స్వరకల్పన&గానం:రాఖీ

ఉత్తీర్ణత కలుగుటకు కృషి ఒకటేనా
విజయం సాధించుటకు రాచబాటేనా
నరాలు తెంచుకున్నా మిగిలేది కంఠ శోషే
అస్మదీయుడైతె సరి వడ్డించేవాడికెపుడు మనధ్యాసే

1.బలి దానాలతో కలనెరవేరింది
శోకాలే కాకులకు,గ్రద్దలకే ముద్ద దక్కింది
రంగులగొడుగుంటె చాలు ఏ ఎండైనా సమ్మతమే
సమీకరణ రణాల్లో పక్షమేదైనా పక్షపాతమే

2.స్వార్థమనే యజ్ఞానికి సామాన్యులె సమిధలు
రాజకీయ రంగంలో  ప్రజలేగా వంచితులు
అధికారం నేతలకు అనివార్యమైనదేగ
అంధకారం పౌరులకు  అలవాటైనదేగ

3.ఏకఛత్రాధి పత్యమే పాలన ఏలికలకు
గతమెంత వెతికినా దొరకదు పోలికలకు
కనీవినీ ఎరుగని అవకాశం నాయకత్వాలకు
జనసంక్షేమం మరవొద్దు జారిచేయు ఫత్వాలకు

https://youtu.be/BPKA9lxXjh4?si=za0BIeuVB5MJCb20

రచన.స్వరకల్పన&గానం:రాఖీ

రాగం:అఠాణా

గణనాథుడు త్రిగుణాతీతుడు
అగణిత గుణగణ మహిమాన్వితుడు
కరుణాభరణుడు శరణాగత వత్సలుడు
సరగున బ్రోచెడి ప్రథమ పూజితుడు

1. కరిముఖవిలసితుడు కారణ జన్ముడు
కిన్నర కింపురుషాది దేవగణ సేవితుడు
కీర్తన మోహితుడు కుడుముల కూరిమివాడు
కృష్ణదేహ శోభితుడు కౄరకర్మ నాశకుడు
సరగున బ్రోచెడి ప్రథమ పూజితుడు

2.కెడయాడగ మూషిక వాహనుడు
కేలుమోడ్చి వేడగ అడిగినదొసగువాడు
కైలాసవాసుడు కొండంతఅండవాడు
మందార కోడిగనే మది కోరెడివాడు
కౌముదీపతివైరి కంకణకర వరదుడు

https://youtu.be/UKys-vNCK9o?si=RXSRdm2LgGIhhYSh

రచన,స్వరకల్పన&గానం:డా.గొల్లపెల్లి రాంకిషన్(రాఖీ)

రాగం:మాయామాళవ గౌళ

వెళ్ళిరావయ్యా గణపయ్యా నేటికి
మళ్ళిరావయ్యా మరుసటి ఏటికి
మరలిరావయ్యా మండపాల చోటికి
తరలిరావయ్యా ముమ్మాటికి

వీడోకోలు నీకిదే ఈ ఏటికి
సాగనంపేము నిన్ను పొలిమేర ఏటికి
నేటికి కోనేటికి నీటికి గంగాతటికి
 చేసెదమిదె నిమజ్జనం  ఎదనీకు నీరాజనం

1.కన్నుమూసి తెరిచేంతలొ గడవనీ ఏడాది
నిలువుమయ్య నిరతము కదలక మామది
నిందలు రానీకు మోముని చూసినా చందమామది
వందనాలు నీకివే వక్రతుండ విఘ్నపతి
 చేసెదమిదె నిమజ్జనం  ఎదనీకు నీరాజనం

2.తెలిసో తెలియకో చేసేము తప్పులెన్నో
 ఆడుతు పాడుతూ దాటేము గీతలెన్నొ
గుంజీలు దీసేము ఏకదంత పరితపించి
మన్నింప వేడెదము మా చెంపలువేసుకొని
  చేసెదమిదె నిమజ్జనం  ఎదనీకు నీరాజనం

వెన్నెలే ఎంతో వేడి అమ్మ చూపు కన్నా
తేనియే కడు చేదు అమ్మ పిలుపు కన్నా
కన్నా అని పిలిచినంత కడుపునిండి పోవులే
నానీ అని తలనిమిరిన మనసుకెంతొ హాయిలే

1.కమ్మనైన రుచి ఏది అమ్మగోరుముద్ద కన్న
మధురమైన గీతమేది అమ్మజోల పాటకన్న
అనురాగం అమృతము కలుపుతు కుడిపిస్తుంది
అరిచేతిలొ పాదముంచి నను నడిపిస్తుంది

2.నీరెండ కన్నా వెచ్చనిది అమ్మ ఒడి
మోదానికి ఖేదానికి నా కోసమే అమ్మ కంటతడి
చాదస్తం  అమ్మదంటూ అశ్రద్ధనే నే చేసినా
సర్వస్వం నేనేనంటు అమ్మకు ఆరాటమే ఎపుడు చూసినా

3.అన్నమయ్య రాసాడు వెంకన్నను కీర్తిస్తూ
అతులితమౌ పదాలు ముప్పది రెండు వేలు
ఏ కవీ రాయలేడు అమ్మప్రేగు బంధాన్ని వివరిస్తూ
అలతి అలతి పదాలలోనైనా బ్రతికినన్నాళ్ళూ

https://youtu.be/w2X8mGnNGZQ?si=1Zt_mmkPPCueEZN3

అల్లన పిల్లన గ్రోవే మోహనము
నల్లని అల్లరి మోమే మోహనము
గోపబాలుని లీలలు మోహనము
వేణుగానమే గోకుల సమ్మోహనము

1.ఆలమందలకు మురళీనాదమె వినోదము
రేపల్లె పడుచులకు వంశీవాదనె మైకము
తాండవకృష్ణుణి నాట్యకేళియె నయనానందము
యమునావిహారి రాసలీలయే హృదయంగమము

2.శిఖిపింఛధరుడు రాధా మనోహరుడు
నందకిశోరుడు మీరా ప్రియవరుడు
శ్యామ సుందరుడు కుబ్జాభీష్ట వరదుడు
నవనీత చోరుడు కుచేల దారిద్ర్యహరుడు

https://youtu.be/02L1y_Dg6iM?si=e_RCBBlYCf1A56O5

నీ పదములె వేదములు
నీ కరమురలె అభయకరములు
నీ కన్నులు సూర్యచంద్రులు
నీ వదనమె నిఖిల సదనము
శ్రీ వేంకట నారాయణా
దాసపోష సంకట హరణా
శరణం శరణం శరణం శరణం
శరణం శరణం మాం పాహి శరణం

1.నీ హృదయము శ్రీనివాసము
భక్త మానసమే నీనివాసము
నీ నామస్మరణయే నిశ్రేయసము
నీ యశోగానమే మనోల్లాసము
శ్రీ తిరుపతి వేంకట రమణా
దాసపోష సంకట హరణా
శరణం శరణం శరణం శరణం
శరణం శరణం మాం పాహి శరణం

2.నా ఊపిరి నీ గోపురము
నా జీవమె నీ భావనము
నా కాయమె నీకాలయము
నా జీవితమే స్వామి నీకంకితము
శ్రీ తిరుమల బాలాజీ కరుణాభరణా
దాసపోష సంకట హరణా
శరణం శరణం శరణం శరణం
శరణం శరణం మాం పాహి శరణం

రచన,స్వరకల్పన&గానం:రాఖీ

రాగం: ద్విజావంతి

నీ రాధ పిలిచింది రారామ్మని
మాధవా జాగేల ఏలగ రాధమ్మని
ఊదరా వేణువుని శ్రవణపేయముగ
సేదదీరుతు నా ఒడిని తన్మయముగ

1.నవనీతమెంతో నీకు ప్రియం
మిసిమిని మించును నాహృదయం
విరహాగ్నిలో మదివెన్న  ఆజ్యం
ఘృతము తోడవగ ఉధృత ఆవహనీయం
నీలమేఘశ్యామ వర్షించు ప్రణయం
నీతో ఉన్నంత సమయం రసమయం-సరసమయం

2.ఏ నిధి ఉన్నది నా సన్నిధి నీది కానిది
ఏ విధి కాదన్నను  నీవేకద  నా పెన్నధి
నా పిచ్చిగాని నీవూనేనని వేరే ఏమున్నది
నీమాయయే ఇది ఇహము పరమన్నది
ఆత్మనే నీపరమైతే ఈ దేహానిదేమున్నది
పరమాత్మలో ఐక్యమైతే  ఇక మోహమేమున్నది-వ్యామోహమేమున్నది

రచన,స్వరకల్పన&గానం:రాఖీ
రాగం:నీలాంబరి

నల్లకలువ బాలా
చెలీ నీ అందమెలా పొగడాలా
జాతి వజ్రమేదైనా
జన్మతః తనుకూడా నీలా
నీలా నీలాల కన్నులూ
నీలా నీలాల కురులూ
వన్నెలెన్నొ చిలుకుతాయి
సోయగాలనొలుకుతాయి

1.అంతరాళ మంతా కృష్ణవర్ణమేగా
అంతరంగమందు కృష్ణతత్వమేగా
నలుపంటే రంగులన్ని దాచుకున్నాదేగా
నలుపంటే గోపెమ్మల మదిదోచుకున్నదేగ

2.మెరుపు వెనుక మేఘము నీలిమయే గమనించు
రమ్యమైన రాగము నీలాంబరి అలరించు
నీలమేఘ శ్యాముడు ఆ రఘురాముడు
ఘన శ్యామసుందరుడు-సమ్మోహనాంగుడు

శ్రేయోభిలాషి ముసుగులో ఈర్ష్యా ద్వేషులు
పులుముకున్న నవ్వుమాటున వికృతమౌ మనుషులు
ఎదుటివారిని నిందించడమే పుట్టుకతో ఉన్నబుద్ధి
సాటివారిని బాధించి ఆనందించ పైశాచిక లబ్ది
స్నేహితులను మాటకే మాయని మచ్చ
ఉత్తపుణ్యానికే ఎందుకో అంతటి కచ్చ

1.వెన్నంటి ఉన్నామంటూ వెన్నుపోటు పొడిచేస్తారు
పరాచికాలాడుతూ నగుబాటు చేస్తుంటారు
ఎందుకో ఇటువంటి వారు భూమికే ఒక బరువు
పక్కలోబల్లెమల్లె అదనుచూసి తీతురు పరువు
అన్నా బావా తమ్మీ మావా వరుసలెన్నొ కలిపేరు
నమ్మించి గొంతుకోసి నిండా ముంచేస్తారు

2.తమ ప్రాపకానికై మనల నెపుడు బలిచేస్తారు
మనముందు పొగిడేస్తూ వెనక వెక్కిరిస్తారు
విశ్వసించడానికి ఏమాత్రం సరిపోరు
ఏ ఎండకాగొడుగు వెనువెంటనె మార్చేస్తారు
జుట్టు జుట్టు ముడిబెట్టి వేడుక తిలకిస్తారు
లౌక్యమన్నభ్రమలోనే ఆత్మవంచన కొడిగడతారు

https://youtu.be/bRadpeWtUQg

దశవిధ అవతార దనుజ వైరి
నిజభక్త పాలా నిర్గుణాకారా
నిను కీర్తి పొగడగ శేషుడె అలసే
నిరతము నుతియించ నారదుడే మైమరచె

1.వేదనిధిని సంరక్షింప సోమకు దునిమిన
మత్స్యావతార ప్రణమామ్యహం
సుధకై మధింప మంధర గిరినిల్పిన
కూర్మావతార ముకుళిత కరవందనం
దానవాగ్రణి బలి పీచమణిచిన
వామన స్వరూపా వినమ్ర నమసము
బ్రహ్మవరదర్పి హిరణ్యాక్షుగూల్చిన
వరాహమూర్తి అభివందనం
ప్రహ్లాదుగావగ హిరణ్య కశిపుని
సంహరించిన నరసింహా నమోవాకము

2.పరశువునే చేబూని క్షత్రియులను ఖండించిన
భార్గవరామానీకు బహువిధముల వందనం
రావణాంతక రఘుకుల తిలక సీతాపతీ
శ్రీరామచంద్ర నీకు శిరసావందనం
జీవనసారమైన గీతను బోధించిన
కృష్ణా జనార్ధనా సాష్టాంగ వందనం
ధర్మము సంఘము శరణమ్మని చాటినా
బుద్ధావతార నీకు పాదాభివందనం
అశ్వారూఢుడవై ఖడ్గధారుడవై ఆకలి
నెడబాపెడి కల్క్యావతార నీకు కైలాటము

https://youtu.be/rQi-DtZyRuI

రచన,స్వరకల్పన&గానం:రాఖీ
రాగం:చంద్రకౌఁస్

ప్రణతులు నీకివే ప్రమథ గణపతి
నమస్కృతులు గొనవే -నిను నమ్మితి సరస్వతి
మదినీకే అర్పించితి కొండగట్టు మారుతి
వేడుకొంటినయ్యా వేంకటా చలపతి
నిలిపితి నా తలపున నిన్నేకైలాస పతి
మీ దివ్యచరణాలే నాకిక శరణాగతి

1.దయగనవయ్య నన్ను శ్రీ గురుదత్తమూర్తి
దారిచూపించునాకు దేవసేనాపతి
భారమింక నీదేలే భద్రగిరి రఘుపతి
దరిజేర్చుకోర ధర్మపురి నరసింహ మూర్తి
ఆదరించవయ్యా అన్నవరం సత్యమూర్తి
మీ దివ్యచరణాలే నాకిక శరణాగతి

2.గీతను బోధించరా గురువాయూర్ కృష్ణమూర్తి
ప్రార్థన మన్నించరా వారాణసి పురపతి
జనహితమే కూర్చరా పూరీ జగత్పతి
ఇంద్రియముల నరికట్టర శ్రీశబరీ గిరిపతి
మానవతను వెలిగించర షిరిడీ శ్రీపతి
మీ దివ్యచరణాలే నాకిక శరణాగతి

https://youtu.be/KD9JB88NyKU?si=xGGFpRnf54hQHaDN

కను తెరవగ తొలిగురువు మా అమ్మ వేంకటలక్ష్మి కి  వందనం
నను నడిపిన ఉపదేశ గురువు మా నాన్న అంజయ్యకు వందనం
అ ఆ లు దిద్దించిన లింబగిరి పంతులుకు ఇదె వందనం
నా కవిత నాదరించె అభినవపోతన వరదన్నకు వందనం పాదాభివందనం

1.తెలుగును వెలిగించిన విశ్వనాథశాస్త్రి సారుకు వందనం
గణితపు మర్మాల తెలిపె ప్రభాకర రావుకు వందనం
భౌతికశాస్త్రాన్ని బోధించిన రాజమౌళి సారుకు వందనం
రసాయన శాస్త్రం  నేర్పిన ఆనందం సారుకు వందనం

2.బోధనవిధి తెల్పిన మంగతాయారమ్మకు మనసారా వందనం
ఆంగ్లాన్ని అందించిన డియార్కే రంగారావ్ సారుకు వందనం
చిత్రకళను మేల్కొలిపిన ఆగాచార్య సారుకిదే నా వందనం
నను కవిగా గుర్తించిన తొలి హితుడు రామకిష్టయ్య సారుకు వందనం

ఏమరుపాటుగా నేమరిచిన గురుతతికి త్రికరణ శుద్దిగా సాష్టాంగ వందనం

https://youtu.be/HI09qH38wpI

రచన,స్వరకల్పన&గానం:డా.గొల్లపెల్లి రాంకిషన్ రాఖీ

రాగం:వసంత

వికట రూప విఘ్న పతి
విజ్ఞాన దీప విశ్వపతి
సుగుణ నిధి గణపతి
నిలువుమెపుడు నా మతి

1.నీఆకారం ఓంకారం
నీ వీక్షణలో మమకారం
ప్రతిపని నీతో శ్రీకారం
నీకే మాతొలి నమస్కారం

2.చిత్రమె నీ ద్వయతత్వము
అతులితమే నీదయా పరత్వము
ప్రాప్తమెనీ వరదాతృత్వము
నీఆకృతే ప్రకృతి నిత్యత్వము

రచన,స్వరకల్పన&గానం:రాఖీ

ఏకాకిగా నా పయనము
శోకాల నదిలో సాగెనే
స్వర్గానికెగరగ లక్ష్యము
ఆకాశ నిచ్చెన విరిగెనే

1.ఏ మున్నదో నా లోపము
ఏనాటిదో ఈశాపము
నే కన్న కలలే కరిగెనే
మనసెంతగానో మరిగెనే

2.కృషికిలేనే లేదులోటు
ఎరుగనైతి తొందరపాటు
బ్రతుకునాకో ప్రహేళిక
నాకు నేనే  తోడిక

https://youtu.be/BctzII6_IyQ

రచన:రాఖీ

చిందేసి ఆడరా సిద్ధీ గణేశుడా
అందాల దేవుడా అంబా తనయుడా
నాట్యాలు మీఇంట కొత్త కాదురా
నటరాజే మీ నాన్న తాండవాలె చేయురా
గణపతి బప్పా మోరయా
నినువిన గతియెవరు లేరయా

1.హైందవానికండగా నువ్వుండగా
అన్యమతమేదైన చిచ్చుబెట్టగల్గునా
నవరాత్రి పండగ జరుపుతుండగా
మతసామరస్యము వెల్లివిరియుగా
భారతీయ సంస్కృతి బాటచూపగా
లోకమంత ఏకమై ప్రగతి సాగదా
గణపతి బప్పా మోరయా
నినువిన గతియెవరు లేరయా


2.అక్రమార్కులనే ఒక్కతొక్కు తొక్కరా 
అవినీతి పరుల పీచమణిచి వేయరా
ఆడపడుచులందరికి తోడునీడవై
అబలకాదు సబలగా ఋరుజువు పర్చరా
రకరకాల మత్తుల్లొ జోగుతున్న యువతను
రాదారిలోకి మార్చి గమ్యాన్ని చేర్చరా
గణపతి బప్పా మోరయా
నినువిన గతియెవరు లేరయా

OK

https://youtu.be/k6HICIGtyKs

రచన,స్వరకల్పన&గానం:రాఖీ

రాగం:ఆనంద భైరవి

కన్నిమూల గణపతి-నిను కన్నులార గాంచితి
కాణిపాక గణపతి-నిను వేనోళ్ళ పొగిడితి
రత్నగర్భ గణపతి- నీ మహిమలెన్నొ పాడితి
అష్టసిద్ధి గణపతి-నిన్నదే పనిగ వేడితి

1.నాహృదయ పీఠమెప్పుడు అధీష్ఠించి నిలువగా
నామనో నేత్రమెప్పుడు నిన్నే దర్శించగా
కనికరముతొ వరమీయి వరసిద్ధి వినాయకా
నా కరమును వీడకుమా కరిముఖ గణనాయకా

2.ఐహికమౌ వాంఛలన్ని అంకుశముతొ అణిచివేయి
ఇంద్రియ  విశృంఖలతను పాశముతో కట్టివేయి
నిన్నే నమ్ముకుంటిని-మది నాక్రమించువక్రతుండ
నీ పదమును విడువకుంటి ఏకదంత నీవెఅండ

కలలో నైనా ఊహకైనా ఉత్తుత్తిగానైనా
కలిసే భాగ్యం  మృగ్యమేనా కలతనిద్దురేనా
ఏ వేళ కలిసాయొ కళ్ళు వేసాయిలే చిక్కు ముళ్ళు

1.పదహారు ప్రాయాన  ప్రణయం
ఈనాటికీ అందాల స్వప్నం
ముదిమి పొలిమేరలోనా
ఆలంబనేగా అనురాగం
నువ్వుా నేనూ మనమన్నదీ
ఆహ్లాదకరమైన ఒక కల్పన

2.చేరువయ్యే లోగానే కాలం
పెంచింది ఎనలేని దూరం
మన భాష మౌన ప్రవాహం
తుదిలేనిదీ మన ప్రయాణం
మృతులు చితులు మననాపలేవు
స్మృతులు మతులు గతితప్పలేవు

https://youtu.be/0mG4cJCezQ0

రచన,స్వరకల్పన&గానం:రాఖీ
రాగం:నళినకాంతి

నళిన కాంతి నయన నగుమోము శ్రీపతి
ననుగొనిపోవా నీ తిరుమల తిరుపతి
పరమపదమె కాదా నీ పద సన్నిధి
పదిలముగా చేకొనరా ఓ పరమదయానిధి

1.తహతహలాడెడి చకోరి కోరు రీతిగా
తపనలనొందెడి చాతకమ్ము తీరుగా
ఆకలిగొనియున్న అన్నార్తి మాదిరిగా
నీకడ నిలవాలనీ నే కడతేరాలనీ
నిను నెర నమ్మితిరా రమాధవా మాధవా

2.తొక్కుడు బండలాగ ఓపిక నాకు లేదు
ప్రతీక్షణం ప్రతీక్షలో బ్రతుకగ నేనోపలేను
కఠోరమౌ నియమాల పాటించగా లేను
బలీయమౌ సంకల్పమె నా ఏకైక సాధన
నా ప్రార్థన మన్నించర కనికరముతొ కరివరద

https://youtu.be/SXK8f3l18KY

ఎందుకో దయమానినావు
ఏల మొకంచాటేసినావు
ఎలుక వాహనా నవ మోహనా
గజాననా నా ప్రియదైవమా
కినుకనొదిలి ననుబ్రోవరా
తాళజాల నిర్దయ మన్నించరా

1.నిను తలవని క్షణమేదొ చెప్పవయ్యా
నిను మొక్కని ఘటనేదో తెలుపవయ్యా
నిను పూజించని దినమొకటున్నదా
నిను ప్రార్థించక పని మొదలిడితినా
నా దోషమేదో ఎరిగించవయ్యా
నా నేరమేదో ప్రకటించవయ్యా

2.త్రికరణ శుద్ధిగా  నమ్మినది నిన్నేగా
త్రిగుణాతీతుడవని నిన్నే కొలిచితిగా
చవితినాడు ఎప్పుడైన చందురునణ్ణి చూసానా
నీ దర్శించక నీ  గుడిని దాటవేసానా
గుంజీలు తీసెదనిక తప్పులు క్షమియించరా
ఉండ్రాళ్ళు పెట్టెదనిక అలకనింక వీడరా

ఆరోగ్యమే మహాభాగ్యము
అన్న ఆర్యోక్తి అక్షర సత్యము
జబ్బుపడితెగాని ప్రతివారికి
 ఆ సంగతి అనుభవైకవేద్యము
నిర్లక్ష్యపు ఫలితానికి ఎప్పుడో
చెల్లించక తప్పదు మూల్యము
దీపమున్నప్పుడె కాచుకోవాలి
మన దేహదారుఢ్యము
జయహో దృఢభారత్
జయ జయహో ఆరోగ్య భారత్
జయహో జయహో సౌభాగ్య భారత్

1.ఎంత చులకన మేని పట్ల లోకాన
 పూసే రంగులకే విలువ మనిషి మొకాన
లోన లొటార ముంటేనో  పెరుమాళ్ళకెరుక
పైన పటారానికే జనం పట్టంకట్టే  వేడుక
చిన్ననాటినుండే తగిన ఆటలాడాలి
వ్యాయామపాఠాలు విధిగబోధించాలి
జయహో దృఢభారత్
జయ జయహో ఆరోగ్య భారత్
జయహో జయహో సౌభాగ్య భారత్

2.తెలతెలవారగనే మేలుకొని తీరాలి
పిల్లగాలుల స్వచ్ఛదనం ఆస్వాదించాలి
పచ్చదనం పరికిస్తూ నడక సాగించాలి
ప్రకృతి అందాలు పరవశంతొ చూడాలి
వీనులకింపైన సంగీతం వినాలి
తనువంతా తుళ్ళిపడగ సిగ్గుపడక నవ్వాలి
జయహో దృఢభారత్
జయ జయహో ఆరోగ్య భారత్
జయహో జయహో సౌభాగ్య భారత్

https://youtu.be/jdUzmrawUhs?si=Y7mSkWQZIwXiGu7L

రచన,స్వరకల్పన&గానం:డా.గొల్లపెల్లి రాంకిషన్ రాఖీ

రాగం:చెంచురుట్టి

జగన్నాటక సూత్రధారి
అర్ధనిమీలిత నేత్ర మురారి
భక్తజన హృదయ విహారి
భావయామి భజియించెద నిను శౌరి

1.అంతరంగాన చూపావు అఖిలాండ విశ్వాన్ని
యుద్ధరంగాన ఆవిష్కరించావు ఆ విశ్వరూపాన్ని
మామూలు మనిషిలాగ కొంటెపనులు చేస్తావు
మాయతెరలు కప్పేస్తూ భ్రమలో ముంచేస్తావు
లీలామానుష వేషధారి శ్రీ హరి
చిత్తములో నిను నిలిపెద శిఖిపింఛమౌళి

2.నడిపేదినీవే ప్రతిఅడుగు భుక్తి కుడిపేది నీవే
గడిపేదినీతోనె అనుక్షణము అంతరాత్మగానే
కర్తవునీవని కర్మవూనీవని  గీతన బోధిస్తావు
కర్తవ్యపాలనకై మము ఉద్యుక్తులచేస్తావు
జయ జనార్ధనా గోవర్ధన గిరిధారి
నా జీవన సారథీ వనమాలీ చక్రధారి

https://youtu.be/nJ5K_qbTWUQ

కదలిరార గణపతి
ఎలుకనెక్కి ఉధృతి
ఈనాడే నువు పుట్టిన భాద్రపద శుద్ధ చవితి
అందుకొనగ వేంచేయి మా పూజలూ హారతి
జై గణేశ జై గణేశ జైగణేశ దేవా
చేయిపట్టి నడిపించు మము చక్కని త్రోవ

1.వేనవేల మండపాలు సిద్ధముగా ఉన్నాయి
నిన్ను ఎదుర్కొనుటకై తయారు డోలూ సన్నాయి
కొలుతుమయ్య వినాయకా నిను పగలూ రేయి
నవరాత్రులు నీ భజనలు ఎంతెంతో హాయి
జై గణేశ జై గణేశ జైగణేశ దేవా
చేయిపట్టి నడిపించు మము చక్కని త్రోవ

2.తీరొక్క పూలతో  అలంకరించేమయా
అందాల మాలలెన్నొ నీ మెడలో వేతుమయా
షడ్రుచుల నైవేద్యాలు నివేదించేమయా
చల్లగ మము చూడుమని నిన్నువేడుకొనెదమయ్య
జై గణేశ జై గణేశ జైగణేశ దేవా
చేయిపట్టి నడిపించు మము చక్కని త్రోవ

రచన,స్వరకల్పన&గానం:రాఖీ
రాగం:వసంత

ఆత్మ రాధ పరమాత్మ కృష్ణ
తత్వమసి యే సంగమ తృష్ణ
బృందావనమే సకలభువనము
మురళీరవమే ఓంకార స్వనము
రాధామాధవీయం రమణీయం
రాసవినోదం కడుకమనీయం

1.నెరవేరని కలలు గోపికలు
తీరని కోర్కెలు అష్టభార్యలు
యమునా తీరము ఈ సంసారము
సాయంకాలము కర్మ పాకము
రాధామాధవీయం రమణీయం
రాసవినోదం కడుకమనీయం

2.తొలగించు వలువలు దేహచింతనలు
బిగికౌగిలులే ఆత్మైక్య సాధనలు
చుంబిత రసనలు సుధాసేవనలు
రమించు భావనలు పరసౌఖ్య యోగములు
రాధామాధవీయం రమణీయం
రాసవినోదం కడుకమనీయం

https://youtu.be/2DOzVjRLIrQ?si=DIwV3LKdz2zz0T-8

రచన,స్వరకల్పన&గానం:రాఖీ

సాకి:కక్కలేడు మ్రింగలేడీ కలియుగ శివుడు కర్తవ్య గరళాన్ని
చేయలేడు మానలేడు మానవతామూర్తి నిర్వర్తిత కార్యాన్ని
రాత్రి లేదు పగలు లేదు అలుపెరుగని ఈరవికి
పోలికే దొరకదు  పోల్చేందుకు ఏకవికి

అన్నా నీకు వందనాలన్నా
పోలీసన్నా సలాము నీకన్నా
గులామునే నెరవేర్చే నీబాధ్యతకన్నా
ఫిదానైపోయాను నీ నియ్యతికన్నా

1.విందులు వినోదాలు లేకున్న మానె
పండగ పబ్బము నీకు ప్రజలతోనె
శాంతీ భద్రతల పరిరక్షణె నీకు తృప్తి
సజావుగా జనులెప్పుడు మనగలుగుటె అనురక్తి
అన్నా నీకు వందనాలన్నా
పోలీసన్నా సలాము నీకన్నా

2.ఎందుకో చిన్నచూపు ప్రజలకు నీవైపు
ఎంత ఆదరించినా బెదురే నీ దాపు
కలుపుతీయ గలిగితేనె కలల పంట పండు
నీతికిమారుపేరు కావాలి మీ దండు
అన్నా నీకు వందనాలన్నా
పోలీసన్నా సలాము నీకన్నా

3.వత్తిడులతో ఎంతగానొ నలిగిపోతుంటావు
వృత్తికీ ప్రవృత్తికీ  మధ్య కుములుతుంటావు
కుటుంబానికెంతగానొ దూరమౌతుంటావు
అనవరతం ప్రజాసేవ పరమార్థమంటావు
అన్నా నీకు వందనాలన్నా
పోలీసన్నా సలాము నీకన్నా

https://youtu.be/3-SyzbtDwVk?si=rBhl8Mq9Uco5zuph

రచన,స్వరకల్పన&గానం:డా.గొల్లపెల్లి రాంకిషన్(రాఖీ

రాగం: మధుకౌఁస్ ( సుమనస రంజని, సముద్ర ప్రియ )

తెలుగుకన్న వెలుగు పంచు భాషలేదు
తెలుగుకన్న తెగువ పెంచు వాక్కు లేదు
అజంతా సోయగాల అమరభాషరా ఇది
యుగాలెన్ని మారినా ఇగురదుఈ జీవనది
నా మాతృభాష తెలుగు - నా ఊపిరి హృదయ లయ తెలుగు

1.ముత్యాల దస్తూరి నాభాషకు ఆభరణం
నుడికారాల కస్తూరి నా భాషకు పరిమళం
పద్యసాహితీ ప్రబంధాను బంధం నాతెలుగు
హృద్యమైన అవధాన  సంధానం నా తెలుగు
పొగడగ చెఱకుగడే కటిక చేదు  నాభాష ముందు
వివరింపగ మీగడే సాటిరాదు నా భాషే పసందు
నా మాతృభాష తెలుగు - నా ఊపిరి హృదయ లయ తెలుగు

2.భువన విజయకొలువులో కవనమై చెలఁగింది
దేశభాషలన్నిటిలో దవనమల్లె  కీర్తిగొంది
పాల్కుర్కిసోమన్న ప్రభవించిన నా తెలుగు
బమ్మెర  పోతన్న ప్రవచించిన నా తెలుగు
జానపదుల గళ గర్జన నా భాష శ్రీకారం
అన్నమయ్య పదకీర్తన నా భాష ఓంకారం
నా మాతృభాష తెలుగు - నా ఊపిరి హృదయ లయ తెలుగు

రచన,స్వరకల్పన&గానం:రాఖీ
రాగం:మాల్కోస్

ఏం రాత రాసాడు నీ పెనిమిటి
నా బ్రతుకంత చేసాడు కడు చీకటి
నాలుగు తలలున్న బహునేర్పరి
నను బలిచేయగ వింతే మరి
పలుకుల పూబోడి నీ దాసుడి
అలజడి మాన్పవే బ్రహ్మక్రొత్తడి

1.ఉండనీయడమ్మా ఉన్నచోట
పండనీయడమ్మా ఏ పూట
దండగైపోయిందీ మనుజ జన్మ
అనుభవించి తీరాలి పూర్వ కర్మ
ఆమాత్రం నువ్వాదరించకుంటెనో
ఆగమై పోయేవాణ్ణి విద్దెలమ్మా

2. ఏ కొఱతాలేదనీ విర్రవీగనా
కొఱతవేసినందుకు నేనేడ్వనా
అడగకున్న ఇచ్చాడని నమ్మికొలువనా
ఉన్నదూడ్చివేసాడని దెప్పిపొడవనా
కన్నతండ్రి కుండకుంటె ఏ కనికరము
ఆ బిడ్డల మనుగడయే నిత్యనరకము

మోముదాచుకున్న ఓ మోహనాంగి
నీ మేని మెరుపు దబ్బనిమ్మపండుభంగి
మబ్బుచాటు చందమామ చూశాడు తొంగితొంగి
గులామయీ సలాముచేసె వంగి వంగి

1.నీ నవ్వులు సంతూరు సంగీతం
నీ పలుకులు కుంతాల జలపాతం
నీ అధరాల ఆస్వాదన అమృతం
నిను పొందితె నా బ్రతుకే సరసగీతం

ముట్టుకుంటె ముడుచుకునే కోమలాంగి
నీ మేని నునుపు లేత తమలపాకు భంగి
తుళ్ళిపడే నిన్నుతాకి  గులాబి రేకు
రాలిపడే తనకుతానే తాళలేక నీ సోకు

2.లోకాన అతి మధురం నీతో ఏకాంతం
గడిచేను క్షణమోలె యుగాలు సాంతం
ప్రత్యక్షమవవే  నాకై సఖీ అమాంతం
అంకితమైపోతానే నాజీవిత పర్యంతం

చిలిపి లిపితొ  చూపువిసురు చిత్రాంగి
నీకంటి భాష అంతుపట్టలేని భంగి
మతిచలించి పోయింది భారతిపతికి
నా మీద ప్రయోగిస్తే నే చేరేద నేగతికి

పోతపోసిన పసిడిబొమ్మా ఓముద్దుగుమ్మా
ఆశరేపకు మర్మమెరుగని వాడనమ్మా నే మోడునమ్మా
పరికిణీ ఓణీలతో ఇనుమడించెను నీ అందం
తెలుగుదనమే ఉట్టిపడగా చూసినంతనె ఆనందం

1. పొడుగాటి జడకు జడకుప్పెలు
తలనిండ తురిమిన సిరి మల్లెమాలలు
నర్తించి మురిసెడి చెవి బుట్టలు
పాదాల ఘలు ఘల్లనెడి పట్టీలు
బ్రహ్మ అచ్చెరువొందు శిల్పమే నీవు
బాపు కుంచెన చిందు చిత్రమే నీవు

2.క్రీగంటి నీ చూపులే మన్మథుడి తూపులు
సిగ్గులొలికెడి నగవులే ముత్యాల జల్లులు
నిదుర హరియించు నీ తలపులు
మధువులే చిలుకును నీ పలుకులు
అందబోకమ్మ నాకెపుడు ఓ చందమామా
ఆరాధించెదను సౌందర్యరాశిగ ఓ దివ్యభామ

https://youtu.be/kzjOE_O2F0U

శంభో  హరహరా
మనోహర హరా
త్రిపురాసుర సంహరా హరా
త్రిభువనైక ఈశ్వరా భవహరా
కరుణాకరా శంకరా
అంజలింతు నీకిదే శుభకరా

1.మురిపెము తోడ పార్వతమ్మ
నలుగుపిండితో చేసెగ బొమ్మ
ఆయువునొందే ఆ బాలకుడై
అమ్మ ఆనతిన కాచె ద్వారపాలకుడై
ఎరుగక నిన్నే నిరోధించగా
ఆగ్రహమును నువు తలను ద్రుంచగా
ఆలి దుఃఖమును బాపగబూని
కరిశిరమతికి కనికరించితివి గణపతిని

2.దేవగణముల  వినతి మేరకు
కుమారసంభవ శుభ కామనకు
చెఱకు వింటి వేలుపు
వేయగ నీపై సుమాల తూపు
తపోభంగముతొ సోకక నీచూపు
కాముని దహించె నీ కనునిప్పు
పరమేశ్వరా నా అరిషడ్వర్గము తెంపు
దోషము బాపి కలిగించ కనువిప్పు

పన్నీటి వసంతం ఒక కంటిలో
కన్నీటి జలపాతం మరోకంటిలో
ఎన్నిసంచలనాలు నా ఒంటిలో
నందనవనాలూ స్మశానాలూ నా ఇంటిలో

1.జలతారు ముసుగుల్లో
దాగిఉన్న లొసుగులు ఎన్నో
దరహాస అధరాల వెనుక
మనసున ముసిరిన వెతలెన్నో
నోరు మాట్లాడుతుంది నొసలువెక్కిరించినా
తెగువ పోట్లాడుతుంది విధియే వక్రించినా

2.అన్ని పున్నమి రాత్రుల్లో
కారుమబ్బు కైనీడలెన్నో
గులాబీల రహదారుల్లో
గుచ్చుకునే వాడిముళ్ళెన్నో
వాస్తవాల గొంతునొక్కి మిథ్యరాజ్యమేలుతోంది
జీవించే హక్కుకొరకే బ్రతుకు ఈడ్వ బడుతోంది

రచన,స్వరకల్పన&గానం:రాఖీ

ఐదున్నర అడుగులున్న ఆడపిల్లవే
నీ హంస నడక చూడగానే మనసు గుల్లనే
వంపుసొంపులెన్నొ ఉన్న  కొండవాగువే
నీ మేని హొయలు కనగ నా గుండె ఆగునే
ఊరించి నను చంపకు ఉత్తుత్తిగా
వెర్రోణ్ణి చేయకూ నను బొత్తిగా

1.కారుమేఘాలె నీకు కురులైనవి
తారలెన్నొ నీ జడలో మల్లెలైనవి
మెరుపులెన్నొ నీ మెడలో నగలైనవి
హరివిల్లే నీ పెదవుల నగవైనది
ప్రకృతే పరవశించి నీవశమైనది
పసిడికాంతి నీ ఒంటి తళుకైనది
ఊరించి నను చంపకు ఉత్తుత్తిగా
వెర్రోణ్ణి చేయకూ నను బొత్తిగా

2.వరూధినే నీతో సరితూగనన్నది
దమయంతే నీకు దాసోహమన్నది
ఊర్వశే పోటీకి విరమించుకొన్నది
మేనకే తప్పుకొని నీ వెనకే నన్నది
విశ్వసుందరిగ నీవేకగ్రీవమే
జగన్మోహినిగ నీకగ్రాసనమే
ఊరించి నను చంపకు ఉత్తుత్తిగా
వెర్రోణ్ణి చేయకూ నను బొత్తిగా

OK

రచన,స్వరకల్పన&గానం:రాఖీ
రాగం:మధ్యమావతి

కాలరుద్రుడా వీరభద్రుడా
కన్ను తెరవరా ఇకనైనా
గరళకంఠుడా హే నటేశుడా
తాండవించరా ఇపుడైనా
ఘోరకలికి తెఱదించు
నేరవృత్తినే తెగటార్చు
పునఃసృష్టియే జరుగునట్లుగా
విశ్వ లయమునే గావించు
మానవత్వమును స్థాపించు

1.అత్యాచారము మా గ్రహచారం
అతివకు లేదిట అభయము
విలువలు మరచిన మా సమాజం
విశృంఖలతయే మా నైజం
కాల భైరవా భూతనాయకా
అవధరించరా ఇకనైనా
విరూపాక్షుడా విశ్వనాథుడా
నిదుర లేవరా ఇపుడైనా

2.అవినీతియే  మాకతి సామాన్యం
జనజాగృతియే ఇట కడు శూన్యం
మోసగించడం మా మనస్తత్వం
హింసించడం మా కానందకృత్యం
జ్వాలనేత్రుడా శూలహస్తుడా
ఆగ్రహించరా ఇకనైనా
వైద్య నాథుడా మృత్యుంజయుడా
అనుగ్రహించరా ఇపుడైనా

https://youtu.be/Cah4T19_tIs?si=yjO_5wLtOPfu_vYy

"కృష్ణాష్టమి" సందర్భంగా

రచన,స్వరకల్పన&గానం:రాఖీ

రాగం:సింహేంద్ర మధ్యమం

కృష్ణం వందే జగద్గురుమ్
గ్రోలవె మనసా గీతాసారం
పరమాత్మ నుడివిన జీవనమార్గం
మానవాళికిలలో అనుసరణీయం

1.చేయగలిగితే వగచేది లేదు
చేతకానిది నీ చేతిలొ లేదు
బాధను కొలవగ కొలమానమే లేదు
చిరునగవు తోడను భరియించు చేదు
నిత్యానందమె నిజమైన వేదం
ఆత్మానందమె అసలు వినోదం

2.నమ్మితె సర్వం కృష్ణార్పణం
నాస్తికతయే ఆత్మవిశ్వాసం
మనిషికి మనుగడ తెగని యుధ్ధం
తలపడగ నీవిక తెగువతొ సిధ్ధం
స్వధర్మ కర్మయే శ్రేయోదాయకం
నిమిత్తమాత్రతయే భవ్య తాత్వికం

రచన,స్వరకల్పన&గానం:రాఖీ
రాగం:రీతి గౌళ

గుడిలో బండగ నువ్వు
గుండె బండబారి నేను
ఉండీ లేక మొండిగా గడిపేస్తున్నాము
ఉద్దండ దైవమా ఉద్ధరించవేమయ్యా
ఏడు కొండల వేలుపు,నీకిదే మేలుకొలుపు
ఇకనైనా స్వామీ నాకు  మేలుజరుపు 

1.మొక్కులకై ఆశపడి నన్ను లెఖ్ఖచేయవేల
ముడుపులపై చిత్తముంచి నన్ను ముంచనేల
దిక్కు నీవనీ స్వామీ నిన్నే నమ్ముకొన్నాను
దక్కనీయి నీపాదాలు నీవే శరణమంటున్నాను
వడ్డికాసులవాడా డబ్బుయావ నీకేల
శ్రీనివాసనీ ఎదలో  మాతల్లి సిరికొలువుండ

2.ఊహతెలిసినప్పుడే బ్రతుకు ముడుపు కట్టాను
ఊపిరిలో ఊపిరిగా నిన్ను మ్రొక్కుతున్నాను
చిక్కులలో నన్నేలా చిక్కుకొనగ చూస్తివి
చక్కనీ నా స్వామీ ఏమి రాత రాస్తివి
ఆపదమొక్కులవాడ నన్నాదుకోవయ్యా
సంసారకూపం నుండి నన్నుచేదుకోవయ్యా

FOR AUDIO ,plz contact my whatsapp no.9849693324

https://youtu.be/5q1EnBpvWmU

రచన,స్వరకల్పన&గానం:రాఖీ
రాగం:దేవగాంధారి

శ్రీ రాజరాజేశ్వరి కరుణామృత ఝరి
జయ జయ శ్రీ రాజ రాజేశ్వరి శాంకరి
తవసేవక భవదుఃఖ హారిణీ శార్వాణి
పాలయమాం కృపాకరి

1.లేంబాల పుర బాలత్రిపుర సుందరి
దర్శనమాత్రేణ జన్మ పావనకరి శ్రీగౌరి
నిఖిలలోక పాలనకరి పరాత్పరి కుమారి
పాలయమాం రిపుక్షయకరి

2.మణిద్వీప స్థిరవాసిని భవాని
స్మరణ మాత్రేణ సాక్షాత్కారిణి శ్రీవాణి
శ్రీచక్ర సంవర్ధిని శ్రీ విద్యా ప్రవర్ధిని
పాలయమాం అన్నపూర్ణేశ్వరి

3.కుండలినీ సంయుతే చండీ చాముండేశ్వరి
మూలాధారాన్వితే శ్రీ లలితే అష్టసిద్ధి వరదే
సహస్రార సంప్రాప్తితే సాయుజ్య దాయికే
పాలయమాం భువనేశ్వరి

అల్లసాని వారిని అర్థిస్తా నేర్పమని
కాళిదాస సత్కవినీ వేడెదను చెప్పమని
శ్రీనాథుని గురువుగా ఎంచెద బోధించమనీ
జయదేవుని ప్రార్థిస్తా ప్రణయ రసమునెరిగించమనీ
నా కావ్య నాయకీ నిను వర్ణించ సాహసించెద
నా స్వప్న సుందరీ నిను  ఆవిష్కరించ బూనెద

1.తనువేమొ మదనుని సదనం
వదనమేమొ అహరహ శరదం
నయనమైతె వికసిత కుముదం
నుదుటవెలుగు సింధూరం
తొలిపొద్దుకు ప్రతిరూపం
దోబూచులాడే ముంగురులు
తేలిపోయే  పయోధరాలు
నా కావ్య నాయకీ నిను వర్ణించ సాహసించెద
నా స్వప్న సుందరీ నిను  ఆవిష్కరించ బూనెద

2.అధరమే చుంబన రంగం
చుబుకమే కౌశిక శకలం
కసిని జాగృత పరచి
ఉసిగొలిపే రసనే అమృతం
మిసమిసల కెంపుల్లా
నిగారింపు చెంపల్లో నవనీతం
నా కావ్య నాయకీ నిను వర్ణించ సాహసించెద
నా స్వప్న సుందరీ నిను  ఆవిష్కరించ బూనెద

https://youtu.be/QSfbwE_5Wwk?si=M8jz64GRLe_d_QJS

రచన,స్వరకల్పన&గానం:రాఖీ

అడగకనే వరమిచ్చే దేవత
కళ్ళముందు కదలాడే అప్సరస
అనునిత్యం తోడుండే  నీ నీడ
అర్ధాంగి ధర్మపత్మి గృహిణి ఇల్లాలు
ఏ పేరున పిలిచినా అన్నీ తానైన ఆవిడ
సరదాకైనా అపహాస్యం మానరా మానవుడా

1.ఆచితూచి తాను అడుగేస్తుంది
పతి తొందరపాటును సరిచేస్తుంది
న్యాయవాది పట్టా తనకు లేకున్నా
మన తరఫున వకాల్తా పుచ్చుకొంటుంది
సమాజాన మన స్థాయి ఏదైనా
సగర్వంగ మగని గౌరవిస్తుంది
భార్య కళత్రము  శాలిని మగనాలు
ఏ పేరున పిలిచినా అన్నీ తానైన ఆవిడ
పరాచికానికైనా పలుచన చేయకురా మానవుడా

2.సంపాదన నీదైనా తానే సగబెడుతుంది
ఇంటిపేరు నీదైనా తానే నిలబెడుతుంది
నీ ఆకలి తీర్చేటి కాశీ అన్నపూర్ణ తాను
నీ చింతను  బాపేటి చింతామణి తాను
నిన్నెంతో కట్టడి చేసైనా
నిను చక్కటి దారిలోన పెడుతుంది
పెండ్లాము దేవేరి ఇంతి ప్రాణేశ్వరి
ఏ పేరున పిలిచినా అన్నీ తానైన ఆవిడ
పొరబడికూడ కించపరచబోకురా  మానవుడా