రచన,స్వరకల్పన&గానం:డా.రాఖీ

నిను చూడాలని నాకెంతో తహతహ

ఒక్కసారి కనిపిస్తే యమహో యమహ

అపూర్వమౌ నీ అందం దేవకన్య తరహా

ఆ అందం అందినంత బ్రతుకంతా ఆహాఁ

1.ఎత్తగలను ఎన్ని జన్మలైనా  

నీ అధరామృతమునేనందగ

మరణించగలను ఈక్షణమైనా

ఒకే ఒక సారి నీ పొందుపొందగ

ననుబ్రతికించుట నీచేతిలోనే 

బుగ్గల నునుసిగ్గు చాటు భామా

ఇంతకన్న ఎలాతెలుపగలను 

చాటుమాటు నాఘాటు ప్రేమా

2.ప్రతి నిమిషం నీజపమే నామది

వరమిచ్చే వరకు నిను వదలనంటిని

నా మనోనివేదనే నమ్మవే ఇది 

అనుకోకు చెలీ నాదొక గాలి పాటని

ఒక్కసారి తెలుపవే నీ ప్రేమని

ఐపోతా బ్రతుకంతా నీ బానిసని

సుందరీ నా ఎదురుగ నీవుంటే

కవితలు వెల్లువెత్తు నినుకంటే

 

https://youtu.be/Vo8sDPJ5O20?si=HhFWV2Y55VhmPPHG

(విశ్వకవి రవీంద్రుని కవిత ఆధార నా స్వేఛ్ఛాగీతిక)

రచన,స్వరకల్పన&గానం:డా.రాఖీ

ఇప్పుడే తెలుపు నేస్తం నా మరణ సంతాపం

వెంటనే వెళగ్రక్కు నేస్తం నా వెలితి పరితాపం

బ్రతికుండగా నే ఎరగాలి  నీ ఎద విలాపం

నీ కనుకొలుకుల నుండి నువు చేసే అశ్రుతర్పణం

1.పోయినోళ్ళందరూ మంచివాళ్ళే అనుకుంటే

నా గురించి చెప్పు భాయి నాల్గు మంచిముక్కలు

నేను లేనిలోటును అనుభూతి చెందుతుంటే

ఈ క్షణం తేల్చుకోవోయి జమాఖర్చు లెక్కలు

2.తదనంతరమిచ్చేటి బిరుదులేవొ ఉటంకించు

ఫోటోకు ఎందుకు దండ నా మెడకే తగిలించు

ఎవరెవరు పొగిడేరో ఎంతగా నా వెనక తెగడేరో

నాముందే వక్కాణించక పాడెముందు పాడేరో

3.పోయాక రానేరాదు నీకు నాకు అవకాశం

మనసువిప్పి కుప్పవేద్దాం మన భావావేశం

శ్రద్దాంజలి నాఎదుటే ఘటించనీ సమావేశం

చేజారక ముందే  విలువనెంచమని నా సందేశం

 రచన,స్వరకల్పన&గానం:డా.రాఖీ

నీ మాటలన్నీ నీటిమూటలే

నీ బాసలన్నీ గాలిపాటలే

నమ్మితే వంచించే నయవంచకివి

నట్టేట ననుముంచే ఘరానా హంతకివి

1.బూటకాల నీప్రేమకు నేనే దొరికానా

నాటకాలు ఆడుకునుటకు నేనో బకరానా

వన్నెలెన్నొ కుమ్మరించి ఎరగా వేసావు

అన్నెంపున్నె మెరుగని నన్ను తేరగా దోచావు

2.వెలుగుకై ఆశపడితే శలభమై కాలాను

నీ ప్రేమలొ మునిగిపోయి శవంలాగ తేలాను

అగ్గిపాలు చేసావే పండంటి బ్రతుకును

బుగ్గిచేసి వేసావే నా బంగరు భవితను

https://youtu.be/DeQ4hAvoJb4

 రచన,స్వరకల్పన&గానం:డా.రాఖీ

రాగం:భీంపలాస్

కైలాసనాయకా కైవల్యదాయకా

కైమోడ్పులివి నీకే కైంకర్యము నా బ్రతుకే

1. కైరవమే ననుకానీ నీకై చేసే అర్చనలో

కైవారము సేయనీ నాకైతల గుఛ్ఛముతో

కైరవై కురియనీ నీ శీతల దృక్కులు నాపై

కైవశమైతిని శివా నీ భక్తిసుధే నాకు కైపై

2.కైశికమందు గంగ కావించనీ నను పునీతం

కైలాటకమాయే స్వామి నా జీవిత నాటకం

కైటభవైరి సఖా హరహరా ననుగావర తక్షణం

కైతవాలు వెతకకిక శరణం శరణం నీ దివ్య చరణం

https://youtu.be/ce0n3fTcZ4U?si=BTbYlW0-Hk-8QUBA

 రచన,స్వరకల్పన&గానం:డా.రాఖీ

రాగం:నీలాంబరి

మహాదేవా పరమశివా

మహాకాలకాల భక్తపాలా

మహామృత్యుంజయా నమోస్తు అవ్యయా

నటరాజా రాజరాజేశ్వరా నమామి ఈశ్వరా

1.భవా భవానీధవా ఆత్మసంభవా విభవ

వామదేవా కాకోలగ్రీవా ఖరువా భార్గవా

రుద్రా వీరభద్రా విరూపాక్షా నమోస్తుకాలాభైరవా

కపర్ది కామారి త్రిపురారి నమామి శంభో సాంబశివా

2.రాజరాజేశ్వరీ వరా హరా భక్తవశంకరా

నగరేశ్వరా స్థిరా వేములాడ భీమేశ్వరా

గంగాధరా చంద్రమౌళీశ్వరా నమోస్తు బాలేశ్వరా

వృషభ వాహనా విషకంధరా నమామి విశ్వేశ్వరా౹

 రచన,స్వరకల్పన&గానం:డా.రాఖీ

నిను తలవని క్షణమే లేదు

నిను కలవక బ్రతుకే చేదు

పెంచిపోషిస్తున్నా నీ ప్రేమ పాదు

వస్తే రానీ నా మీద అపవాదు

1.గాలివాటుగా పరిచయమైనాము

ఏటవాలుగా పయనిస్తున్నాము

కాలం కట్టింది మన మధ్యన వారధి

దైవం వరమిచ్చింది స్నేహమనే పెన్నిధి

2.ఏదో కావాలని ఎదకు ఉబలాటం

చెప్పడానికెంతగానో నాకు మొహమాటం

చెప్పలేక చెప్పలేక ఎప్పుడూ ఆరాటం

నీతో చెలిమి  వయసుకు మనసుతొ చెలగాటం

కన్నుల కురిసెను వర్షం

పెదవుల విరిసెను హర్షం

జీవితాన ప్రతి నిమిషం

ఆనందామృతం విషాద సంయుతం

1.కరోనా అంటినందుకు దుఃఖం

గండం గడిచినందుకు ప్రశాంతం

వ్యాక్సిన్ దొరికినందుకు మోదం

మరోసారి వేయనందుకు ఖేదం

2.దిన దినం క్షణక్షణం కరోనా భయం

ఎప్పుడు కడతేరుతుందో అయోమయం

రాకతప్పదను మాటే అందరికీ ఖాయం

బతికి బట్టకట్టామా అది అంతిమ విజయం

 రచన,స్వరకల్పన&గానం:డా.రాఖీ

గోరుచుట్టు ఒక బాధ

రోకటిపోటదే గోటిపై ఎంతటి బాధ

పుండువల్లనే ఎంతో నొప్పి

పుండుమీద పుట్రవల్ల ఇంకెంత నొప్పి

కరోనా కాటుతోటె చేటనుకుంటే

నల్లబూజు(బ్లాక్ ఫంగస్)మోపై

కబళించసాగె వెనువెంటే

1.పరిసరాలనన్ని పాడుచేసిన పాపం

పర్యావరణానికే కీడు చేసిన దోషం

జీవవైవిధ్యానికే హానిచేసిన నేరం

ప్రకృతే ప్రకోపించినా విపత్తులే విరుచుక పడినా

గుణపాఠాలే నేర్వం మానవులెవరం మారం

2.తమదాకా వస్తుందా అన్న నిర్లిప్తత

మొక్కబడిగా పాటించే తూతూ జాగ్రత్త

కనీసమైనా పట్టింపులేని జాగరూకత

తెగేదాక లాగుతూ తెగిందంటే వెక్కుతూ

నెత్తినోరుకొట్టుకుంటాం,దీనంగా మొత్తుకుంటాం

 రచన,స్వరకల్పన&గానం:డా.రాఖీ

శుభోదయం నేస్తమా ప్రియనేస్తమా

నీ నిలువెల్లా సుప్రభాతం ప్రాప్తమా

నిదురలేచు శుభవేళ ఎదురుగా నీ మోమే

అదిరిపాటు చెందేలా నా మోవితొ నీమోవే

శుభోదయం రసోదయం హసోదయం

1.నీలికురుల మబ్బుల మధ్యన

పారాడే పాపిట బిళ్ళనే ప్రత్యూషం

కనుబొమల కనుమల నడుమన

వెలిగే సిందూర తిలకం రవిలా విశేషం

అధరసుధా సాగరాన అలలపై తేలే

నవ్వుల కిరణాలతో హర్షోదయం

శుభోదయం రసోదయం హసోదయం

2.తలకునీళ్ళోసుకుని ఒడుపుగా విదిలిస్తే

నా ఒళ్ళుఒళ్ళంతా తుషారోదయం

కావాలనిలేదంటూ కావలించుకుంటుంటే

పొద్దంతా హద్దులుదాటే పరవశోదయం

మనసెరిగిన ఆలిచేసే చిలిపి అల్లరులే

ఉవ్వెత్తు ఉత్తేజంతో ఉల్లాన ఉల్లాసోదయం

శుభోదయం రసోదయం హసోదయం

శిష్ట రక్షకా దుష్టశిక్షకా కలియుగ వరదా

దీనబాంధవా ప్రేమ సింధువా ఆర్తత్రాణబిరుదా

ఎందుకు నీమౌనం దేనికి నీజాప్యం

పంచాయుధ పాణీ కరోనా అల్ప ప్రాణి

అంతమొందించవేమి గోవిందా నమోనమామి

1.వాడి వాడి వాడి వీడెనా  సుదర్శనానిది

ఊదిఊది నెర్రెవాసెనా పాంచజన్యానిది

చిలుంపట్టి బలం తగ్గెనా కౌమోదకిది

వధించగ పదను ఒగ్గెనా నందకానిది

ఎక్కిడగ పటిమ ఉడిగెనా సారంగానిది

పంచాయుధ పాణీ కరోనా అల్ప ప్రాణి

అంతమొందించవేమి గోవిందా నమోనమామి

2.గజేంద్రమోక్షగాథ నెరనమ్మియున్నాము

ప్రహ్లాదు గాచిన చరిత్రనే విశ్వసించుచున్నాము

ద్రౌపదీ మానసంరక్షణ కథవినియున్నాము

ధ్రువుడిని సరగున బ్రోచినగతి నెరిగినాము

నీ ఉనికే కల్పనయని భావించకున్నాము

పంచాయుధ పాణీ కరోనా అల్ప ప్రాణి

అంతమొందించవేమి గోవిందా నమోనమామి

 రచన, స్వరకల్పన&గానం:డా.రాఖీ

(నేటి {10th  MAY}మా  వివాహ 31 వ వార్షికోత్సవం సందర్భంగా నా ప్రియమైన శ్రీమతి 'గీత'కు ప్రేమకానుక)

భార్యకు సరియైన   పర్యాయపదమీవే

దేవేరికి ఉచితమైన నిర్వచనం నీవే

అర్ధాంగికి అసలైన అర్థమూ నీవె

ఇల్లాలుకు ఇంపైన రూపకమూ నీవే

ఓ చంద్రముఖీ నా ప్రాణసఖీ నా భాగ్యమీవే

ఓ చామంతీ నా దమయంతీ నా బ్రతుకు నీవే

1.నీ గొప్పతనమేలే నను భరించడం

ఘనమైన నీగుణమేలే నను సహించడం

క్షణమైన నువులేక యుగమౌ నిరీక్షణం

నీతో దాంపత్యం నిత్యనూతనం విలక్షణం

ఓ చంద్రముఖీ నా ప్రాణసఖీ నా భాగ్యమీవే

ఓ చామంతీ నా దమయంతీ నా బ్రతుకు నీవే

2.సీత సైతం దాటలేని నాపాలిటి గీతనీవే

జీవితగతికే ప్రగతిని కూర్చే కృష్ణ గీతనీవే

ఏడేడు జన్మలకు విధిలిఖిత నా నుదుటిగీతవే

నా కలం ఆలపించే ప్రతి మధుర గీతమీవే

ఓ చంద్రముఖీ నా ప్రాణసఖీ నా భాగ్యమీవే

ఓ చామంతీ నా దమయంతీ నా బ్రతుకు నీవే

https://youtu.be/UUcya6cRiIU

 "మాతృదినోత్సవ శుభాకాంక్షలతో"-

రచన,స్వరకల్పన&గానం:డా.రాఖీ

రాగం:ధర్మవతి

కాలం మారింది వయసు మీరింది

ఏ మాత్రం మారంది అమ్మా  నీ మనసే

చెక్కుచెదరకుంది ఇప్పటికీ నీ ప్రేమే

నా పాలిటి దేవతవే అమ్మా పాదాభివందనాలు

"ననుగన్న దినమిది" మన్నించి కురిపించు దీవెనలు

1.కథలెన్నో చెప్పమని వేధించా  చిననాడు

నిత్యం నిను పాడమనీ సతాయిస్తి అలనాడు

మౌనంగా ఉండమంటినిపుడు ఆయాసపడవద్దని

ధ్యానించమంటిని నిరతము ఐహిక ధ్యాస వద్దని

నా పాలిటి దేవతవే అమ్మా పాదాభివందనాలు

"ననుగన్న దినమిది" మన్నించి కురిపించు దీవెనలు

2.ఊతకర్ర కొనియిస్తిని చేయిపట్టి నడిపించిన నీకు 

చేరువైన మనకపోతిని కనురెప్పగ ననుకాచిన నీకు

పథ్యమంటు నీనోరుకట్టివేస్తిని రుచులు కొసరితినిపిస్తివే

ప్రతిదినం పలకరించనైతిని చీటికిమాటికి నన్నే పలవరిస్తివే

నా పాలిటి దేవతవే అమ్మా పాదాభివందనాలు

"ననుగన్న దినమిది" మన్నించి కురిపించు దీవెనలు

శ్రీశ్రీనివాసం శ్రితపారిజాతం

మా ప్రణతులివే గైకొనుమా సతతం

పద్మావతి అలమేలు మంగా సహితం

చేకూర్చర  సర్వదా మహి మహితహితం

గోవింద గోవింద పాహి ముకుందా

నారాయణ వాసుదేవ రమానందా పరమానందా

1.కట్లుబాట్లు మాకుంటే భరించుకోలేము

మా స్వేఛ్ఛను హరిస్తే సహించగాలేము

ఆంక్షలన్నవెపుడు మాకు   ఆకాంక్షలు కాబోవు

విచ్చలవిడి బ్రతుకె మాకు సంబరాల తావు

ఐనా సరె మమ్ములను నీవె ఆదుకోవాలి

కరోనా బారిబడితె నీవే చేదుకోవాలి॥గోవిందా॥

2.గాలిలోన దీపముంచి నీ ఉనికిని ప్రశ్నిస్తాం

చేతులైన కాపుంచక నీ మహిమను ఆశిస్తాం

చిత్తశుద్ది మావద్ద ఎంత మాత్రమూ లేదు

దైవభక్తి అంటేనే మామనసుకు కడుచేదు

మాపని ఏదైనా నీ పని మము సాంతం కావడమే

నీవిక చక్రం సంధిస్తే కరోనా అంతం కావడమే॥గోవిందా॥

 రచన,స్వరకల్పన&గానం:డా.రాఖీ

చిన్న చిన్న విషయాలకె పొంగిపోతాం

కాస్త గుర్తింపుకే సంబరపడతాం

చిన్నపాటి వెన్నుతట్టి ప్రోత్సహిస్తే 

ఏమాత్రమైన ప్రయత్నాన్ని ప్రశంసిస్తే

అదే ఘనవిజయమనీ ఉప్పొంగుతాం

రంధ్రాన్వేషణతో నొప్పిస్తే కృంగిపోతాం

అల్పసంతోషులం కవులం-అనల్ప సంతుష్టులం

అలుపెరుగని సాహితీ సేవకులం-కవన హాలికులం

1.ఉన్నదాన్నే ఎల్లరూ ఎరిగినదాన్నే

సరికొత్తగా ఆవిష్కరిస్తాం,పరిష్కరిస్తాం

విప్పినదాన్నే ఎవరో చెప్పినదాన్నే 

మాదైన పంథాలో స్పర్శిస్తాం,సృజియిస్తాం

కర్చీఫ్ కప్పినా కాశ్మీర్ శాలువగా భావిస్తాం

చాక్లెట్ నిచ్చినా నోబెల్ బహుమతిగా ఆనందిస్తాం

అల్పసంతోషులం కవులం-అనల్ప సంతుష్టులం

అలుపెరుగని సాహితీ సేవకులం-కవన హాలికులం

2.స్పర్ధనే మాకెందుకొ సమకాలీనులంటె

ఈర్ష్యనే లోలోన మా సాటి కవులంటే

నభూతో న భవిష్యతి మాదైన కవితంటే

తప్పులెన్న తహతహనే పరుల రాతలంటే

గురువుగా భావిస్తే చేయిపట్టి నడిపిస్తాం

అగ్రతాంబూలమిస్తె ఆకసానికెత్తుతాం

అల్పసంతోషులం కవులం-అనల్ప సంతుష్టులం

అలుపెరుగని సాహితీ సేవకులం-కవన హాలికులం

OK

 రచన,స్వరకల్పన&గానం:డా.రాఖీ

ఉషస్సులో రవి బింబం

నిశీధిలో శశి బింబం

సుందరమేనీ ముఖారవిందం

తొలిచూపులోనే వేసింది బంధం

అణువణువు నను తాకనీ నీ తనువు

మనసుకు మనసుకు జరుగనీ మనువు

1.నీ వాల్జడలో పూలమాలను నేనై

నీ పాపిట మెరిసే సిందూరము నేనై

నుదుటన వెలిగే తిలకము నేనై

నీ చెవులకు ఊగేటి జూకాలు నేనై

అణువణువు నను తాకనీ నీ తనువు

మనసుకు మనసుకు జరుగనీ మనువు

2.నీ సోగ కన్నులకు కాటుక నేనై

సంపంగినాసికకూ ముక్కుపుడకనై

నీ సొట్ట బుగ్గలకూ నునుసిగ్గు నేనై

మందార పెదవులకూ చిరునవ్వునై

అణువణువు నను తాకనీ నీ తనువు

మనసుకు మనసుకు జరుగనీ మనువు

3.శంఖమంటి కంఠాన నే వజ్రహారమై

నిను హత్తుకోగా బిగుతు రవికనేనై

నిన్నల్లుకోగా నేనే చెంగావి చీరనై

నీ నడుము చుట్టకోగా వడ్డాణమునై

అణువణువు నను తాకనీ నీ తనువు

మనసుకు మనసుకు జరుగనీ మనువు

 రచన,స్వరకల్పన&గానం:డా.రాఖీ

బ్రతుకు మీద ఆశపుట్టగలదు 

కాటికి కాళ్ళు జాపుకున్న వారికైనా

రతిపట్ల ధ్యాస మరలగలదు

ఎటువంటి ఘోటక బ్రహ్మచారికైనా

యతిరాజుకైనా మతితప్పునే

యువతి నీరీతి అందగత్తెవల్ల

నీ పాదాక్రాంతులవరన్నది ఒప్పనే

పురుషజాతి సాంతం పుడమెల్లా

1.ప్రతి కాంత సృష్టిలోనె ఒకవింత

కాంచినంతనే కలుగును కవ్వింత

చెంతచేర్చుకోవాలని నిరంతరం చింతననే

చేరువైతె పులకింతనే దూరమైతె పెనుచింతనే

సౌగంధీ  ఆనందీ పరిమళ భరితమే నీ సౌందర్యం

విశ్వమంత విస్తరించె  నీ సోయగ సమ్మోహన సౌరభం

2.సుమ కోమల స్నిగ్ధ లావణ్యము 

మాలతీ లతా ముగ్ధ సౌకుమార్యము

చకితమె నీసొగసు అతులితమే నీ హొయలు

మంజులమే నీ గాత్రము నా కల నువు కళత్రము

సొంతమైతివా జీవితమంతా అనంతమౌ సంతసము

బ్రాంతివైతివా బ్రతుకంతా అవధులే లేని పరితాపము

OK

అలరులు అలరిన పొదరిల్లు

నవ్వుల వన్నెల హరివిల్లు

అనురాగం ఆవరించిన మా ఇల్లు

ఆనందంతొ అల్లుకున్న అందమైన బొమ్మరిల్లు

1.గారాల ముద్దులపట్టి మాబొట్టె

సిరులెన్నో కొనితేగ మాఇంట పుట్టె

నట్టింట నడయాడే సాక్షాత్తు మాలక్ష్మి

కూతురే  లోకంగా మా మనస్సాక్షి

2.ఆడింది ఆటగా నడిచిందే బాటగా

ఎదిగింది మా అమ్మాయి విరితోటగా

కోరికలను నొక్కిపెట్టి ప్రతిపైసా చదువుకె పెట్టి

 చదివించాము మా పాప మాటకే పట్టంగట్టి

3. ఉన్నట్టుండి ఉరుమేలేక పడిపోయే పిడుగేదో

ఆకర్షణ మైకంలో వేసింది తనయ తప్పటడుగేదో

మా ప్రేమలొ లోపముందో ఏ దేవుడి శాపముందో

జాలిమాని మా ఎడల పెడ దారిచూసుకుందే

అర్హతే లేనివాడితో అయ్యో లేచిపోయిందే

ఎండిన మండిన పొదరిల్లు

కన్నీళ్ళు పారెడి మా కళ్ళు

వేదనయే ఆవరించిన మా ఇల్లు

విషాదం పరుచుకున్న శిథిలమైన బొమ్మరిల్లు

 రచన,స్వరకల్పన&గానం:డా.రాఖీ

రక్తసంబంధమేనా ఇలలో అనుబంధము

మానవీయ బంధమే కదా బంధాలకెల్ల అందము

మందికొరకు పిలుచుకుంటె ఆలంబనమవుతాయా

వావి వరుసలే చెలియలి కట్టను కడతాయా

ప్రతివారిని ప్రేమించే హృదయం చాలదా

బూటకాల నాటకాల వంతెనౌ బంధం కూలదా

1.పైనపటారం లోనలొటారం మోసపు ముసుగులు

ఈర్ష్యాద్వేషాలతో మనిషి మనిషిలో లొసుగులు

దాచుకున్న కత్తులతో వెన్నుపోటు ఆలింగనాలు

అవకాశవాదంతో ఎదుటివాణ్ణితొక్కి ఎక్కు అందలాలు

ప్రతివారిని ప్రేమించే హృదయం చాలదా

బూటకాల నాటకాల వంతెనౌ బంధం కూలదా

2.చేటు లేదు శత్రువుతో మెలిగితే అప్రమత్తులమై

హానిలేది అపరిచితులమైనపుడు అనిమిత్తులమై

పయోముఖ విషకుంభాలే చాపక్రింది బంధాలు

గోముఖ వ్యాఘ్రాలే నమ్మించి వంచించే గంధాలు

ప్రతివారిని ప్రేమించే హృదయం చాలదా

బూటకాల నాటకాల వంతెనౌ బంధం కూలదా

https://youtu.be/mz0zigOeVDE

జాతికి జాగృత గీతమే భగవద్గీత

యువత దిశా నిర్దేశనమే కృష్ణగీత

మానవతా సందేశ యుతమే గీత

హైందవ సంస్కృతికాలవాలమే గీత

గీతను తలనిడి అడుగేస్తే బంగారు భవితరా

గీతాసారమే ఇహపర సౌఖ్యానికి పూబాటరా

1.జీవితమొక రణక్షేత్రం -అనుక్షణం అని అనివార్యం

వెనకడుగే నిషిద్దం సర్వదా యుద్దానికి సంసిద్ధం

నెగ్గినా ఓడినా  శిరోధార్యమేదైనా

ప్రయత్నించు అనవరతం ఫలితం చేదైనా

వ్యక్తులకన్న ముందు పరిస్థితే నీ విరోధి

నిన్ను నీవు గెలవడంలో నిజమైన విజయమున్నది

2.సహానుభూతితో కలుగదు నీకు ఏ అసహనం

విశాల భావాలతొ మారగలదు దృక్పథం

విశ్వసించు నిన్నునీవు సందర్భమేదైనా

అధిగమించు తడబడక ఏ సంకటమెదురైన

కర్తవ్యపాలనయే నువు చేసెడి దైవార్చన

సందేహ నివృత్తికి భగవద్గీతయే ఆలంబన

 తెల్లారుతోంది పొద్దుగ్రుంకుతోంది

కల్లలై పోసాగె నువ్వాడిన సుద్దులన్ని

ముద్దరాలా తగదిది నీకు పలికి బొంకడం

ఓ జవరాలా శోభించదు నీకు ఆడితప్పడం

1.నీ మాటను నమ్ముకొని ప్రతిపూట ఆశపడి

వేచిచూస్తున్నానే పిచ్చివాడిలాగా

నీ ఇబ్బందినేగని పెద్ద మనసు చేసుకొని 

ఓపిక పడుతున్నా నీ హితుడిగా

మాయచేస్తున్నావో మనసుపడుతున్నావో మర్మమే ఇంకా

ఆడుకుంటున్నావో వేడుకుంటున్నావో దైవానికెరుక

2.అనుకోని అతిథిలాగ ఎదురైనావెందుకో

ఆలావచ్చి ఇలావెళితె సరిపోయేది

నా గుండెకి కొక్కెమేసి నీవైపుకి లాగివేసి

గుండుసూదితో గుచ్చేవు న్యాయమా ఇది

పైశాచికానందమా  పడతి తత్వమా అగమ్యగోచరం

అనాదిగా మగజాతికి నాతీనీవల్ల తీరని అపచారం ఘోరం

https://youtu.be/zwkTS4rjkCQ

 రచన,స్వరకల్పన&గానం:డా.రాఖీ

రాగం:షణ్ముఖ ప్రియ

అభయకరం నీ శుభనామం శివశంకరం

భవభయహరం శివా నీ ధ్యానం పురహరం

అపమృత్యునివారణకరం వందే విశ్వేశ్వరం

సర్వవ్యాధి వినాశనకరం ప్రణతోస్మి పరమేశ్వరం

కేవల పంచాక్షరీమంత్రం రక్షాకరం మోక్షకరం 

ఓం నమః శివాయ ఓంనమః శివాయ ఓం నమంశివాయ

1.భూతనాథం లోకైకనాథం దిక్పతిం

అనాథనాథం శ్రీవైద్యనాథం  వృషపతిం

దీననాథం కాశీ విశ్వనాథం అహర్పతిం

భగీరథీ ప్రాణనాథం గంగాధరం ఉమాపతిం

కేవల పంచాక్షరీమంత్రం రక్షాకరం మోక్షకరం 

ఓం నమః శివాయ ఓంనమః శివాయ ఓం నమంశివాయ

2.నాగభూషణమ్ చర్మధారిణం త్రయంబకమ్

యోగి వేషిణం భక్తపోషణం విషాంతకమ్

శూలపాణినం పంచాననం త్రిపురాంతకమ్

శశిభూషణం మోదదాయినం కరోనాంతకమ్

కేవల పంచాక్షరీమంత్రం రక్షాకరం మోక్షకరం

ఓం నమః శివాయ ఓంనమః శివాయ ఓం నమంశివాయ

OK

 రచన,స్వరకల్పన&గానం:డా.రాఖీ

గడిచింది గతమంతా- ఎదిరిచూపులోనే

కరిగింది యవ్వనమంతా-ఎడబాటులోనే

ప్రియతమా నా నేస్తమా

మన అడుగులు సాగేదెపుడో-బ్రతుకు బాటలో

పదిలమైన నా హృదయమా

మాధుర్యం చిలికేదెపుడో-నాతో జతగ పాటలో

1.సేదదీరు శుభఘడియేదో నీ ఎదపై

పవళించు పరవశమెపుడో నీ ఒడిలో

పసిపాపలాగా లాలించవే నన్ను

కనురెప్పలాగా పాలించవే నన్ను

అక్కున జేర్చుకోవే మిక్కిలి గారాబంగా

గ్రక్కున అరుదెంచవే అలరులు కురియంగా

2.ప్రణయ గోదారిలో నన్ను ఓలలాడనీ

  పాలకడలిలోన తలమునకలవనీ

కవ్వించి నన్ను కలతల్లో ముంచకు

ఊరించి నాలో ఉద్వేగం పెంచకు

మనసనేది నీకుంటే మరిజాగు సేయకు

ప్రాధేయ పడుతోంటే ఇక జాలిమానకు

నీ సుప్రభాతాలు గాలియలల తేలియాడి

చెవుల సోక పావన శుభోదయం

నీ కోవెల గరుడ ధ్వజ చిరుగంటల సవ్వడులే

మేలుకొలుప మంగళ శుభోదయం

1.శేషశైలవాసా శ్రీ శ్రీనివాసా నీదివ్య

దర్శమమవగా ధన్యమౌ శుభోదయం

గోవింద గోవింద యను నీ నామఘోష

భక్తి భావ మినుమడించ ఆహ్లాద శుభోదయం

2.నీ కరుణా కటాక్ష వీక్షణాలు మాపై

రోజంతావర్షించగ ఆనంద శుభోదయం

ఆయురారోగ్యాలు అందరికీ ప్రసాదించ

ధన్వంతరిరూపా జగానికే నవోదయం

మానవాళికే మహోదయం శుభోదయం

నేడే మేడే కార్మిక దినోత్సవగీతం

ఎత్తిన పిడికిలి సుత్తికొడవలి

చక్రం బాడిస కత్తి గొడ్డలి 

సమస్త కార్మిక సహస్ర రీతుల ఎత్తళి

ఘర్మజలాన్నే కందెనచేసి

యంత్రపుకోఱలు శ్రద్ధగతోమి

మానవ జీవన సౌకర్యానికి

 లోకుల విలాస  సౌలభ్యానికి

రక్తమునంతా చెమటగ వడిపే

 శ్రమైక కృషితో  ఫ్యాక్టరి నడిపే

ప్రపంచ కార్మికులారా మీకు సలాం

అహరహ శ్రామికులారా మీకు జయం

1.గనిలో పనిలో  కార్ఖానాలో

క్రీకర భీకర రణగొణ ధ్వనిలో

కనీస వసతులు కొఱవడుతున్నా

భరించలేని వేడికి వెఱవక

సహించలేని చలికీ జడవక

విషవాయువులనె శ్వాసగ పీల్చే

దుర్గంధముతో  రుచులను మరచి

ప్రమాదాలతో చెలిమే చేసే

మరణపు అంచులు నిత్యం చూసే

ప్రపంచ కార్మికులారా మీకు సలాం

అహరహ శ్రామికులారా మీకు జయం

2.చెల్లాచెదురౌ కార్మిక జాతిని

వివిధ వర్గాల శ్రామిక తతిని

ఒక్కతాటిపై నడువగ జేసి

సంఘటితంగా ముందుకి నడిపి

కార్మిక హక్కుల పోరే సలుపగ

ప్రపంచ కార్మిక ఐక్యత నెరుపగ

కార్మికోద్యమం క్రమతగ జరిపి

బలిదానాలకు వెనకడుగేయక

ఎగురెను నేడే మేడే అరుణ పతాక

రెపరెపలాడేను నేడే విజయ పతాక

ప్రపంచ కార్మికులారా మీకు సలాం

అహరహ శ్రామికులారా మీకు జయం

 రచన,స్వరకల్పన&గానం:డా.రాఖీ

నిద్దురపోతే కల్లో కొచ్చి

మెలకువలోను తలపులజొచ్చి

నిండిపోయావే నా మనసంతా

నేనే నీవైపోయానేమో అనేంత

1.చీమ చిటుకుమన్నా నీవే అనుకుంటున్నా

గాలితాకిపోతున్నా నీ కబురేదంటున్నా

ప్రాణవాయువై నన్ను బ్రతికించమంటున్నా

హృదయలయగ మారి నినదించమంటున్నా

2. వెచ్చించగ నాకోసం నిమిషమైన నీకుందా

యోచించగ నాకై క్షణమైన వీలౌతుందా

నూరేళ్ళ జీవితాన్ని నీ కంకిత మిచ్చేస్తా

మరుజన్మలోనైనా నీజతకై జన్మిస్తా

 రచన,స్వరకల్పన&గానం:డా.రాఖీ

పగలు గడిచి పోయింది 

రేయి కరిగి పోతోంది

జాడైన కనరాదు జామురాతిరైనా

పాటైన వినరాదు గాలివాటుగానైనా

ఓపలేను నా ప్రియా నీ ఎడబాటు

తాళలేను నే చెలియా ఒక లిప్తపాటు

1.సరదానా ననుడికిస్తే ఓ చినదానా

నన్నాట పట్టిస్తే సంబరమా నచ్చినదానా

గుండె కోసి తెచ్చాను నీకిస్తా కానుగగా

వలపు మూట గట్టాను కుమ్మరిస్త శుల్కంగా

2.రోజులెన్ని మారాయో  తగ్గలేదు మోజసలు

దూరమెంత పెరిగిందో సడలలేదు మోహమసలు

తాడోపేడో తేల్చుకంటా ఈ పూటనే

తెగిపోతె అనుకుంటానే గ్రహపాటనే

 రచన,స్వరకల్పన&గానం:డా.రాఖీ

నీ అందానికి పడిపోందెవ్వరూ?!

నీ పరువానికి దాసులే అందరూ

దివినుండి దిగివచ్చావో

కవిగుండె కల్పన నీవో

మనోహరి సుధామయి నీదృష్టి పడనీ నాపై

మిసమిసల మదాలసా సృష్టికే అపూర్వమై

1.వెన్నెలొలుకు కన్నుల్లో నను స్నానమాడించు

తేనెలూరు పెదవులనే తనివార అందించు

 విరులు తలవంచగా ఎన్ని వన్నెలో నీలో

మరులు కురిపించగా నాకెన్నెన్ని సైగలో

చూపుల్తొ రాసేస్తున్నావు ప్రేమలేఖలు

మాటల్లొ పలికిస్తున్నావు ప్రణయవీణలు

2.మాట ఇచ్చి తప్పకు ఎన్నడు నాతో

బాస చేసి మరువను ఎప్పుడు నీతో

ఆశగా వేచేనులే నీకై నా మనసు

అర్తిగా వగచేనని నీ కెలా తెలుసు

గొంతునులిమినట్లుండే నా తీవ్ర బాధ

గుండె మిక్సీలొ నలిగే విపరీతమైన వ్యధ

ఎంతగ నిను పొగిడాను

ఎన్నని  నిన్ను నేనడిగాను

ఉలకవు పలకవు నీవు ఓ బెల్లంకొట్టిన రాయి

కదలవు మెదలవు నీవు శ్రీ షిరిడీపుర సాయి

గుడిలోన కొలువైవున్న నీవో కొండరాయి

కన్నీటికైనా కరగని కరకు గుండెనీదోయి

1.నిత్యం అభిషేకాలు అందమైన వస్త్రాలు

గురువారమైతే చాలు ఊరేగ అందలాలు

షిరిడిసంస్థానమందు ఎన్ని రాజభోగాలు

ఊరూరా మందిరాలల్లో ఉత్సవాలె ఉత్సవాలు

ఫకీరువే నీకేలా సంబరాలు ఆర్భాటాలు

అవధూతవు నీకవసరమా ఈ వైభోగాలు

2.నమ్ముతూనె ఉన్నాను ఊహతెలిసి నప్పటినుండి

వేడుతూనె ఉన్నాను కష్టంవచ్చినప్పటినుండి

 ఏ విన్నపాన్ని విన్నదైతె ఎన్నడు లేదు 

 ఏ కోరిక తీర్చిన దాఖలాయే కనరాదు  

 అడుగడుగున ఆటంకాలు నోటికందకుండా

అనుభవించు గతిగనరాదు లేకనే నీ అండ

 రచన,స్వరకల్పన&గానం:డా.రాఖీ

నిత్యం పలకరింపులే లేక

నగవుల చిలకరింపులూ లేక..

ఊపిరాగి పోతోందే..గొంతునొక్కినట్టూ

గుండె నలిగిపోతోందే రోట దంచినట్టూ

నేస్తమా నీవే నా సమస్తము

అనుకుంటే ఇంతేనా నా ప్రాప్తము

1.ఊసైనా వినలేక ,ఊహైనా కనరాక..

పట్టలేకా విడవలేకా దూరమౌతూ భారమౌతూ

సతమతమైపోంది పండంటి బ్రతుకే

చేరుతుంది చేరువలోనే మండేటి చితికే

నేస్తమా నీవే నా సమస్తము

అనుకుంటే ఇంతేనా నా ప్రాప్తము

2.తమాషగా ఏర్పడలేదు మన మధ్య బంధము

అషామాషీ అనుకోలేదు నీతోటి స్నేహము

విధిమనని కలిపింది పరమార్థమేదో ఉంది

మన సంగమ నిమిత్తమేదో ఉత్కృష్టమవనుంది

నేస్తమా నీవే నా సమస్తము

అనుకుంటే ఇంతేనా నా ప్రాప్తము

OK

 రచన,స్వరకల్పన&గానం:డా.రాఖీ

నీళ్ళొదులుకుంటే మేలు నీతో స్నేహానికి

చరమగీతం పాడితె ఇకచాలు మన చెలిమికి

పట్టించుకోనపుడు  పట్టుబట్టి పట్టిపట్టి వెంటపడతావు

పరిచయాన్ని పెంచుకోబోతే ముఖం కాస్త చాటేస్తావు

1.ఎండమావిలోనైనా నీరుండవచ్చేమో

ఇంద్రధనుసునైనా అందుకోవచ్చేమో

ఉసూరనిపిస్తుంది నీతో చేసే మైత్రి

వృధాప్రయాస మాత్రమే నా అనురక్తి

2.చేయీచేయి కలిపితేనే అది స్నేహితం

మనసు మనసు ఒకటైతేనే భవ్య జీవితం

ఉబుసుపోక కట్టేవన్నీ గాలి మేడలే

సరదాకై గడిపితె బ్రతుకులు చట్టుబండలే

 రచన,స్వరకల్పన&గానం:డా.రాఖీ

సైచలేను నేను సై అనని నీ మౌనాన్ని 

మరచిపోలేను జన్మల మన ప్రణయాన్ని

ఓపలేను విరహాన్ని మానలేను నీ ఊహల్ని

ఎంతకష్టం ఈ ప్రేమికుడిది ఓ చెలియా

బ్రతుకలేక చావలేక అనుక్షణం నా ప్రియా

1.తటపటాయిస్తావు ఔననడానికి 

వెనకంజవేస్తావు కాదనడానికి

అనురాగం నిండిన నీహృదయం

మానసమేమో డోలాయమానం

తాత్సారమెందుకు పచ్చ జెండాకై

తర్కించగా తగదు స్వచ్ఛమైన ప్రేమకై

2.బంధనాలు త్రెంచుకో మన అనుబంధానికి

రెక్కలను విప్పుకో నింగికి నీవెగరడానికి

చేరుకుందాము సరికొత్త స్వర్గాలే

మనంవేసె అడుగుల్లో మల్లెపూల మార్గాలే

మేడకడతా మనకై స్వప్నాల పొలిమేరల్లో

పడకనౌతా నీకై పండువెన్నెల రాత్రుల్లో

హృదయవీణ మీటితే ..పలుకుతుంది అనురాగం

పెదవి వేణువూదితే కలుగుతుంది ప్రేమ యోగం

గీతం నీవు సంగీతం నీవు నా జీవితానికి సంకేతం నీవు

ఆ రాధనే నీవు ఆరాధన నోచేవు  

మరపురాని ప్రణయ గాధవైనావు

1.కను కలువలు విచ్చినంత మందహాసం

సంపంగి నాసిక పూయగ వింతహాసం

చెంపల రోజాలు విరియగ దరహాసం

అధర మందారాలు మురియగ చిరుహాసం

మొత్తంగా మోమంతా  వెలిసింది పూవనమై

చెలీ నీవు చేరువై  నీవైనావు నాజీవనమై

2.పదహారు ప్రాయమై పరవశించెనీ పరువం

ప్రేమైక లోకమై పరిమళించెగా మరువం

తాకితే మాసిపోయె అపరంజి నీతనువు

మన్మథుడే ఎక్కిడిన పంచబాణ ధనువువు

మన కలయిక కానీయకు ఎన్నటికీ మరీచిక

నిస్సారపు నా బ్రతుకున నీవే నాకు వేడుక

 

OK

 రచన,స్వరకల్పన&గానం:డా.రాఖీ

ఏమీ తోచడం లేదు-నోచినదానికై వేచివేచి

ఏదీ సైచడం లేదు- నీ పెదవుల నే రుచి చూచి

జాబిలిదీ అందమనగలేను నీ మోమును కన్నాక

వెన్నెలా చల్లగ అనిపించలేదు నీ చేరువ నున్నాక

1.మబ్బులకూ అబ్బురమే నీ కురులు రేగ

చుక్కలూ మిణుగురులే నీ చూపుల తూగ

రోజాలకిష్టమే నీ బుగ్గల సిగ్గులై మెరవగ

మల్లెలకదృష్టమే నీ నవ్వులకవి పోలికవగ

2.నీ నడుం మడతలు గోదారిసుక తిన్నెలు

వయారాల నడకలు కిన్నెరసాని మెలికెలు

దృష్టి దాటి పోనీని నీ సుందర మందర గిరులు

సృష్టికి ప్రతిసృష్టిగా మరులురేపు నీ పురులు

 రచన,స్వరకల్పన&గానం:డా.రాఖీ

కాలుకు దూరమైనా -నాకంటికి భారమైనా

మానసాన్ని దర్జాగా ఆక్రమించినావే

మెదడునే దౌర్జన్యంగా కబ్జా చేసినావే

అబ్జదళనేత్రి అభిమాన అభినేత్రి

సుమ సమ కోమల దివ్యగాత్రి నా ప్రియమైత్రి

1.మేని పై నీ మెరుగులే ఎరలాయె దక్కేటందుకు

నీ చిలిపి చేష్టలన్ని వలలాయే చిక్కేటందుకు

ప్రయోగించినావే నీ మంత్రదండాన్ని

ప్రదర్శించినావే ఏదో ఐంద్రజాలాన్ని

ప్రస్తుతం నేను ఐనాను నీ దాసుడను

వస్తుతః నేను నిఖార్సైన బానిసను

2.నర్మగర్భముంటుంది వింతగ నీ పలుకులలోనా

అంతరార్థముంటుంది నీ మూగ సైగల్లోనా

కట్టిపడవేసావే కనికట్టుతొ నీఎదవాకిట

గారడేదొ చేసావే కళ్ళుమూసి తెరిచే లోపట

అయస్కాంతమల్లే నన్నులాక్కున్నావే

ఇనుపముక్కలాగా నిన్నతుక్కున్నానే

https://youtu.be/YfmqEze8eQk

 రచన,స్వరకల్పన&గానం:డా.రాఖీ

చిత్రం: Sri.Agacharya Artist 

శ్రీరామ బంటువని నిన్నంటే మారుతి

పులకరించి పోయెదవు నీ కెంతటి ప్రీతి

శ్రీరామ గానమే నీకు నిత్య నిర్వృతి

ప్రత్యక్షదైవమ హనుమా నీవే శరణాగతి

1.వాయుతేజస్సుగల వరపుత్రుడవు

సాక్షాత్తు పరమేశ్వర అంశవే నీవు

అంజనాదేవీ కేసరి నందనుడవు

దినకరునికి నీవు ప్రియమైన శిశ్యుడవు

2.వజ్రాయుధ ఘాతానికి హనుమవైనావు

బ్రహ్మాస్త్రానికి నీవు బద్ధుడవైనావు

ధర్మానికి రామునితో తలపడనిలిచావు

రామనామ మహిమను లోకానికి చాటావు

3.సకల శాస్త్ర కోవిదుడవు సంజీవ రాయుడవు

సంగీతంలో నారదు గర్వభంగమొనర్చావు

భీముని కావరాన్ని అణచి దీవించావు

పార్థుని పతాకవై విజయము నందించావు

https://youtu.be/Ivs7FWL0E4A

 రచన,స్వరకల్పన&గానం:డా.రాఖీ

రాగం:దర్బార్ కానడ

రప్పించెద నిన్నూ రామనామ భజన చేసి

మెప్పించెద నిన్నూ సిందూరము మేన పూసి

కుప్పించి ఎగసి కడలిని దాటిన లంకాదహి పావని

చప్పున నను భవజలదిని కడతేర్చర పాహిపాహి

శ్రీ ఆంజనేయా  జయమంగళం

శ్రితపారిజాతా  శుభమంగళం

1.నీ జయంత్యుత్సవము నేడు మదికెంతో ఉత్సాహము

హనుమశ్చరితమున నీ కీర్తి గానము శ్రవణ పేయము

భక్తి ముక్తిదాయం నీ సుందరకాండ పారాయణం

నీదివ్య దర్శనముతొ దీర్ఘ వ్యాధులే మటుమాయం

శ్రీ రామదూతా అభివందనం

జైజగజ్జేతా హస్తార్పణం

2.రవిని ఫలమని మ్రింగిన ఘనుడవు బాలాంజనేయ

యయాతికండగనిలిచిన బలుడవుఅభయాంజనేయా

రోమరోమమున రామునిగన స్వామిదాసుడవు భక్తాంజనేయా

భక్తులపాలిటి కల్పతరువువు జయహో ప్రసన్నాంజనేయా

కపివర్యుడా  నీకు  కైమోడ్పులు

వాగధీశుడా నీకు వందనశతములు

శ్రీ రామదూత హనుమజ్జయంతి శుభకామనలు

 రచన,స్వరకల్పన&గానం:డా.రాఖీ

పాపిట మెరిసే సింధూరం

నుదుటన కుంకుమ తిలకం

కంటికి దిద్దిన అంజనము

వనిత వదనానికే సింగారము

భారతీయ సంస్కృతికి నెలతే నిదర్శనం

సాంప్రదాయ మనుగడకు మగువే కారణం

1.సీత సింధూర ధారణ మహిమనెరిగి మారుతి

మరిచెదమా తన మేనంతా పులుముకొన్న సంగతి

కుంకుమ ధరించినంతనే దిష్టి దోషానికి దుర్గతి

పసుపు కుంకుమలతొ పడతికి ఆయురారోగ్య ప్రాప్తి

2.ఆకట్టుకొనుగ అరచేతుల గోరింట  అరుణకాంతి

ప్రమద పాదాలకు పారాణే నిత్య సౌందర్య దీప్తి

నిండుగా చేతికి వేసుకొన్న గాజులే చూపరులకు రక్తి

పద్దతైన చీరకట్టులో పూబోడి అందమే ప్రశస్తి

 రచన,స్వరకల్పన&గానం:డా.రాఖీ

నిను రమ్మన్నానా మతిమాలి

మనసిమ్మన్నానా బ్రతిమాలి

నీ మాయలొ పడ్డానే ఖర్మకాలి

నీ మత్తులొ మునిగానే నామీద నాకే జాలి

1.ఊడిపడ్డావే నాపై ఉల్కలా ఉన్నట్టుండి

ఉప్పెనై నను ముంచావే తెంచుకొని గండి

విందునందమన్నావే  సొగసులన్ని వండి

పొందు పొందమన్నావే వలపుపంట పండి

2.సరళహృదయవనిపించే కఠినాత్మురాలివే

మంజులసడిగా తోచే సాగర ఘోషవే

ఊరించినావే కలనైనా ఎన్నడూ ఎంచనట్టుగా

వంచించినావే ఉత్తుత్తి ఊహవై  కనికట్టుగా

https://youtu.be/ka-tVKdg7Ao?si=oVqIjh98UWSahGk7

రచన,స్వరకల్పన&గానం:డా.గొల్లపెల్లి రాంకిషన్(రాఖీ

రాగం:ఖరహరప్రియ

కైలాసగిరి వాస-కాశీపురాధీశ
వేములాడ శ్రీరాజ రాజేశ్వరా
శ్రీరాజ రాజేశ్వరీవరా
బేడిసములందుకో భీమేశ్వరా
నమసములు నీకివే నగరేశ్వరా
ఓం నమఃశివాయ ఓం నమఃశివాయ
ఓం నమఃశివాయ ఓం నమఃశివాయ

1.నందివాహన నీకు కోడెనిచట కట్టింతు
గంగా ధరా నీకు అభిషేక మొనరింతు
మారరిపుడవు నీకు మారేడు నర్పింతు
జంగమయ్యానీకు సాగిలబడి నతియింతు
ఓం నమఃశివాయ ఓం నమఃశివాయ
ఓం నమఃశివాయ ఓం నమఃశివాయ

2.మాసిద్ధి గణపతిని తొలుతనే దర్శింతు
మాత బద్ది పోచమ్మను తప్పకనే పూజింతు
మావాడివి రాజన్నాయనుచు వేడుకొందు
మహాలింగా నిన్ను ఆలింగనమొనరింతు
ఓం నమఃశివాయ ఓం నమఃశివాయ
ఓం నమఃశివాయ ఓం నమఃశివాయ

 రచన,స్వరకల్పన&గానం:డా.రాఖీ

మధువొలుకు పాత్రలే నీ నేత్రాలు

చూపులతో గ్రోలగా నాకు ఆత్రాలు

సుధ గుళికలే నీ అరుణ అధరాలు

నే జుర్రుకోగా అత్యంత మధురాలు

ముక్కెఱతొ చక్కదనం అక్కెఱే తీరేను

చెక్కిళ్ళ మెరుపు గుణం కొక్కెమే వేసేను

1.అపరంజి జిలుగులు చిలికే సాలభంజికవు 

అవనీతలాన వెలసిన గంధర్వకన్యవు

సౌరభాలు విరజిమ్మే కస్తూరి గంధం నీవు

మంజులనాదాలు పలికే సంతూర్ వాద్యం నీవు

ఏపూర్వపుణ్యమో నీవు నా పరమైనావు

ఏ తపఃఫలమోగాని నా పాలిటి వరమైనావు

2.నాగావళి కులుకులన్నీ నీ నడకలో

కిన్నెరసాని వంపులన్నీ నీ నడుములో

వంశధార సుడులెన్నొ నీ నాభిలోయలో

వింధ్యా మేరులు చిరుగిరులే నీ జఘన సీమలో

నీతో సహజీవనాన  బ్రతుకంతా నిత్య వసంతం

నీ సంగమక్షేత్రాన ఆనందమె మనకాసాంతం

https://youtu.be/MNmQUwYHiqU?si=8Qowh8geXTBNdYd_

రచన,స్వరకల్పన&గానం:డా.గొల్లపెల్లి రాంకిషన్(రాఖీ)

రాగం:శహనా 

అలా చూస్తుండి పోయా-శిలా ప్రతిమనై

కోలుకోలేకపోయా నే మంత్ర ముగ్ధుడనై

ఏమందం నీఅందం ప్రస్తుతించగా అందం

నీ తనువున అణువణువూ పారిజాత సుమగంధం

1. ముక్కు ఒక్కటే నా గుండెను నొక్కేయసాగే

చూపపుడే సూటిగ ఎదపై  తూపులు వేయసాగే

అరనవ్వేమో నన్నుక్కిరిబిక్కిరి చేయసాగే

ఎక్కడ నిలపాలో నాదృష్టి తికమకపడసాగే

2.పండునిమ్మవంటి మేను వెన్నెలగా తోచే

పట్టులాంటి నీ దేహం ముట్టుకొనగ తొందరించే 

కలలోనైనా నా మనసు కలయిక నాశించే 

అద్వైత స్థితి గురించి జీవితమే పరితపించె

 రచన,స్వరకల్పన&గానం:డా.రాఖీ

కనికరమున ననుబ్రోవుమ

ముకుళిత కరముల నీకు నమః

అన్యథా శరణమని  వేడేద

వరమీయగ నీచరణ యుగళి వేంకటనాయకః

1.పంచేంద్రియముల పంచన చేర్చుకో

నా చపల బుద్దిని నీ..వైపుగ తిప్పుకో

నా గతిని ప్రగతిని నీదిగా మార్చుకో

నా మదిలో స్థిరవాస మేర్పర్చుకో

2.ఎందఱిని దరి జేర్చినావో నన్నొదిలితివే

ఏ విధి మెప్పించిరో తెలుపక పోతివే

దిక్కులేని వాడినై నీ దెస మరలితినే

అక్కున ననుజేర్చి ఆదరించవైతివే

 రచన,స్వరకల్పన&గానం:డా.రాఖీ

యోధులం మేము ఆశావాదులం

తలపడతాం వైరులతో వైరస్ లతో

తలపెడతాం పులి నోటైనా కరోనా కాటైనా

1.రక్షణ కవచం మాకు మాసిక

బ్రహ్మాస్త్రమె సానిటైజరిక

పద్మవ్యూహమె స్వగృహనిర్బంధం

భౌతిక దూరమె విజయ నినాదం

2.వంటింటి చిట్కాలే వారుణాస్త్రాలు

యోగాభ్యాసాలే సమ్మోహనాస్త్రాలు

ముక్కు గొంతుల ప్రక్షాళణ పాశుపతాస్త్రం

ఆత్మనిర్భరతే అపూర్వ నారాయణాస్త్రం

https://youtu.be/12Zhak2mZ3Y

 రచన,స్వరకల్పన:డా.రాఖీ

సంగీతం,గానం:లక్ష్మణ సాయి

ఏ కానుకలందీయను ఎంత ఘనంగా జరుపను

మాకతిముఖ్యమైన పండగ నీ పుట్టిన రోజును

ప్రేమమీర ప్రకల్పించు నీ జన్మదిన వేడుకను

"హ్యాప్పీ బర్త్ డే టూ యూ హరీష్ భరద్వాజ

విష్ యూ హాప్పీ బర్త్ డేటూయూ మా యువరాజ"

1.వెలిగిస్తాము  మాచూపుల దీపాలను

దిద్దేస్తాము నుదుటన మురిపాల తిలకమును

తలను చల్లెదము మా దీవెనాక్షంతలను

ఆశీర్వదించేము వర్ధిలగ ఆయురారోగ్యాలను

2.కన్నుల నిను నిలిపేము మా కనుపాపగ

ఎదలోన నింపేము అనురాగపు రూపుగ

తోడుగ నీడగ నీతో నడిచేము నీకు కాపుగ

నువు వృద్దిచెందాలి భవితన తోపులకే తోపుగ

3.ముక్కోటి దేవతలు నిలవనీ నీ అండగా

కొండగట్టు హనుమ నిన్ను కరుణించనీ మెండుగ

ధర్మపురి నరహరి దయగననీ నిను దండిగ

సిద్దీశుడు సోదరునిగ ఎంచనీ నిను తన గుండెగ

మా అబ్బాయి జన్మదిన సందర్భంగా తమ శుభాశీస్సులందజేసిన పెద్దలకు,మిత్రులకు మా హరీష్ భరద్వాజ నమస్సులు!

నా కృతజ్ఞతాభివందనములు..💐😊🌹🙏

 రచన,స్వరకల్పన&గానం:డా.రాఖీ

ఏముని వాకిటనో తారాడే వనకన్యవో

రాముని పదతాడన వరమైన మునిపత్నివో

దేవతలకె మతిచలించు సౌందర్యవతి దమయంతివో

శృంగార రంగాన అంగాంగ ప్రేరకమౌ దేవత రతివో

కవులు నిన్ను పోల్చంగ చవులూరుదురే

లోకాన ఏ పోలిక నీతో సరితూగ బలాదూరే

1.చందమామలోని తునక శ్రీచందన తరువు ముక్క

సింధుభైరవి రాగ రసగుళిక సుధామాధురీ కలయిక

మయబ్రహ్మ హొయలెన్ని ఏర్చికూర్చెనో నీకు లతిక

విశ్వకర్మ అవయవాల మర్మమెంత పేర్చెనో గీతిక

కవులు నిన్ను పోల్చంగ చవులూరుదురే

లోకాన ఏ పోలిక నీతో సరితూగ బలాదూరే

2. చిలుక పలుకు పలుకులనే అందించిరి నీ నోటికి

హంసకున్న వయ్యారాన్ని అమరించిరి నీ కటికి

దృష్టి లాగు అయస్కాంతమతికించిరి నీ నాభికి

కనికట్టుతొ మత్తుచిమ్ము మైమ నిచ్చిరి నీ కంటికి

కవులు నిన్ను పోల్చంగ చవులూరుదురే

లోకాన ఏ పోలిక నీతో సరితూగ బలాదూరే

 రచన,స్వరకల్పన&గానం:డా.రాఖీ

కరోనా కనుమరుగైతే శుభోదయం

భరోసా బ్రతుకు పట్ల కలిగితే శుభోదయం

జనులంతా జాగ్రత్తలు పాటిస్తే శుభోదయం

అవనియంత ఆరోగ్యమయమైతే శుభోదయం

1.పార్టీలు పదవులనక ప్రజాశ్రేయమెంచితే శుభోదయం

రోజువారి కూలీలకు చేతినిండ పనిదొరికితె శుభోదయం

సరకులలో కల్తీలేక ఆహారం లభియిస్తే శుభోదయం

ఏ లంచం ఇవ్వకున్నా ఆఫీసు పనులైతే శుభోదయం

చక్కని పుస్తక మొక్కటి చదివితె మిక్కిలిగా అది శుభోదయం

2.నిర్భయంగ ఆడవారు ఉద్యోగం చేసొస్తే శుభోదయం

అత్యాశకు పోకుండా మోసాల పాలవకుంటే శుభోదయం

చిన్ననాటి మిత్రులంత అనుభూతులు నెమరేస్తే శుభోదయం

వేచిచూచు లబ్దియేదో ఆపూటనె అందుతుంటె శుభోదయం

మోవిపైన చిరునవ్వు విరిసిన ప్రతి ఉదయం శుభోదయం

సాయీ అన్నాగాని బాబా అన్నాగాని

నువ్వే మా తండ్రివని మేము నీ పిల్లలమేయని

ఆమాత్రమైనా ఎరుగవేలనూ

ఏ మాత్రమైనా ప్రేమ చూపనూ

1.కాదల్చుకొని మమ్ము కష్టాల పాల్జేతువా

కనికరించి ఇకనైనా స్పష్టమైన మేల్జేతువా

నిన్ను చూస్తే మమ్ము చూడటమేమిటి

నీ పిల్లల పాలించగ షరతులేమిటి

కన్న తండ్రి అనురాగం అంతేనా

మా అండనీవని నమ్మితె వింతేనా

2.రెండు రూకలెందుకు గుండెనే నీదైతే

పండో దండో ఎందుకు ఇచ్చేదే నీవైతే

కాలుకు మట్టంటకుండా నీవె మము సాకాలి

మాకంటికి రెప్పలాగ మమ్మలనిక కాచాలి

అనాథలం ఔతామా అక్కున మము జేర్చగా

తప్పులంటు చేస్తామా మా చిత్తమునే మార్చగా

https://youtu.be/BFzGSZehk4I

 రచన,స్వరకల్పన&గానం:డా.రాఖీ

రాధ బాధనెరిగితిని

ఆ బాధనే నే మరిగితిని

శ్యామసుందరుని సన్నధికఱుగని

నందనందనుని కౌగిట కరుగని

బ్రతుకే శూన్యమనీ కడు దైన్యమని

1.అందింతును నాడెందము నవనీతముగా

నివేదింతును నా సర్వము  కృష్ణార్పణముగా

నా పెదవులనే మురళిగ వాయించుమనెద

నా మేని మెరుపులు పింఛముగా తలదాల్చమనెద

ప్రార్థించెదన నే పదదాసిగ అర్థించెద నే ఆశగ

2.బాలకృష్ణుని పాలుచేసెద నాక్షీరభాండాలను

మోహనకృష్ణుని పడక చేసెద నా దేహభాగాలను

రతికేళి సలుపగ సతతము నా మతిలోను

సద్గతులేవొ చేరెద సత్యము శివము సుందర స్థితిలోను

ధ్యానించెద లయమై తన్మయమై ఆనంద నిలయమై

 రచన,స్వరకల్పన&గానం:డా.రాఖీ

పనికి పోక పోతె నేమో పస్తులాయే

పనికి పోవు తెగువజేస్తే కరోనా కాటాయే

దినదిన గడం నూరేళ్ళ బ్రతుకాయే

పొరపాటు ఎవరిదైనా ప్రాణానికి వేటాయే

బతకలేక చచ్చుడాయే ఏనాడు

చావలేక బ్రతుకుడాయే నీతోడు

1.మాస్క్ తో మూస్కున్నా ముక్కూమూతిని

సానిటైజర్ తో పదేపదే కడుక్కున్నా  చేతిని

రోగాల పాలవడమే బయటి తిళ్ళన్ని తిని

కరోనాకు బలియవడమె తిరుగుళ్ళు తిరిగితిరిగి

బతకలేక చచ్చుడాయే ఏనాడు

చావలేక బ్రతుకుడాయే నీతోడు

2. క్లబ్బులు పబ్బులు వదిలించవ డబ్బులు

పెండిండ్లు సినీహాళ్ళు అంటించగ జబ్బులు

ఎలక్షన్లు మీటింగులు పెట్టగ పెడబొబ్బలు

పండుగలు పబ్బాలు ఆరోగ్యానికే దెబ్బలు

బతకలేక చచ్చుడాయే ఏనాడు

చావలేక బ్రతుకుడాయే నీతోడు

3.ప్రభుత్వాలు చేతులెత్తె తోచినంత చేసి

ప్రజలేమో విధిలేక బ్రతుకు తెరువు మానేసి

ఆస్పత్రులు ఎంతగవీలైతే అంతా దోచేసి

మందులు టీకాలకు బ్లాక్మార్కెట్ రాజేసీ

బతకలేక చచ్చుడాయే ఏనాడు

చావలేక బ్రతుకుడాయే నీతోడు

 

https://youtu.be/evUHLQslWDw?si=Oo3Zm_g0VaTeQ5PF

#EarthDay2021  శుభాకాంక్షలతో

రచన,స్వరకల్పన&గానం:రాఖీ

చల్లని తల్లి మన పుడమి

జీవులకే కల్పవల్లి మన భూమి

విశ్వంలో జలరాశి కలిగినదై

ప్రాణవాయు ఉనికికి ఆలవాలమై

కారణభూతమైంది మానవ మనుగడకు

ఆరాధ్య యోగ్యమైంది యుగయుగాలకు

1.వరాహస్వామి కావ ఇల్లాలుగ మారింది

సీతమ్మ తల్లికే తను జనని అయ్యింది

సూర్యమండలానికే తలమానిక మైనది

నరసంచారమున్న ఏకైక గ్రహమిది

కారణభూతమైంది మానవ మనుగడకు

ఆరాధ్య యోగ్యమైంది యుగయుగాలకు

2.వృక్షజాతి వ్రేళ్ళూనగ ఆధారభూతమైంది

పంటలనందించే మనిషికలల పంటైంది

ప్రకృతినంత సమతుల్యత నొనరింపజేస్తుంది

పర్యావరణం పాడైతే నొచ్చుకుంటుంది

కారణభూతమైంది మానవ మనుగడకు

ఆరాధ్య యోగ్యమైంది యుగయుగాలకు

 

https://youtu.be/FD671HBoTHw?si=-YMFOodgM5EgiSRD

రచన,స్వరకల్పన&గానం:డా.రాఖీ

రాగం:మధ్యమావతి

మొఱనాలించరా, పరిపాలించరా

చెఱవిడిపించరా, దరి చేర్పించరా

రఘుపతి ఎదగల మా మారుతి

గొనుమిదె ప్రణతి వినుమిదె వినతి

నువు తలుచుకుంటే కానిదియేది

నువు కరుణజూడగ బ్రతుకే పెన్నిధి

1.బ్రహ్మ రూపుడవు శివాంశయేనీవు

విష్ణుతేజమును దాల్చినవాడవు

వేదవేదాంగ పారంగతుడవు

సంగీత శాస్త్రాన ఘనకోవిదుడవు

నువు తలుచుకుంటే కానిదియేది

నువు కరుణజూడగ బ్రతుకే పెన్నిధి

2.జితేంద్రియుడవు దివ్యదేహుడవు

మహాబలుడవు దనుజాంతకుడవు

రోమరోమమున రామ ధ్యానమే

భక్తుల ఎడ నీకు కడు వాత్సల్యమే

సంజీవరాయా నీ దయతొ స్వాస్థ్యము

చిరంజీవా చిదానందా నీవే నీవే శరణము

 https://youtu.be/vhpueN1fn0c

రచన,స్వరకల్పన&గానం:డా.గొల్లపెల్లి రాంకిషన్(రాఖీ)

"జనులకు శుభకామనలు-రాముని శుభ దీవెనలు"

ధర్మానికి నిలువెత్తు రూపంగా

వెలిసాడు శ్రీరాముడు హైందవ దీపంగా

సహనానికి సరికొత్త భాష్యంగా

అవతరించె సీతమ్మ ఉత్తమ సాధ్విగా

భరతావని రామాయణ చరితమే ఉత్ర్రేరకంగా 

శ్రీరామనవమి హిందువులందరి ఉత్సవంగా

జనులకు శుభకామనలు రాముని శుభ దీవెనలు

1.పితృవాక్య పరిపాలన కర్తవ్యమన్నాడు

సార్వభౌమత్వాన్ని తృణంగా గణించాడు

వనవాసమైనా శిరోధార్యమన్నాడు

 ఆలితో అడుగులేసి మాటచాటుకున్నాడు

భరతావని రామాయణ చరితమే ఉత్ర్రేరకంగా 

శ్రీరామనవమి హిందువులందరి ఉత్సవంగా

జనులకు శుభకామనలు రాముని శుభదీవెనలు

2.సౌమిత్రి తోడుగ పర్ణశాల వసించాడు

మాయలేడి యని ఎరిగీ సీతకోర్కె వహించాడు

వైదేహి ఎడబాటులో  పరితాపం చెందాడు

జానకి జాడకొరకు హనుమను పంపాడు

భరతావని రామాయణ చరితమే ఉత్ర్రేరకంగా 

శ్రీరామనవమి హిందువులందరి ఉత్సవంగా

జనులకు శుభకామనలు రాముని శుభదీవెనలు

3.లక్ష్మణున్ని బ్రతికించగ సంజీవని తెచ్చె హనుమ

అక్కున జేర్చెను మారుతిని రాముని ప్రేమ

దశకంఠుని దునుమాడెను రామబాణ గరిమ

ప్రకటితమాయే పట్టాభి రాముని ప్రజారాజ్య పటిమ

భరతావని రామాయణ చరితమే ఉత్ర్రేరకంగా 

శ్రీరామనవమి హిందువులందరి ఉత్సవంగా

జనులకు శుభకామనలు రాముని శుభదీవెనలు

 

https://youtu.be/p9IUJbuKvbM

రచన,స్వరకల్పన&గానం:డా.రాఖీ

రాగం:వసంత

పరమ దయాళా పరమ శివా

సరగున నను పరిపాలించవా

నా ఉరమున ప్రియముగ కేళించవా

నీ కుమరునిగా నను లాలించవా

శంభో మహాదేవ గంగాధరా

సాంబమూర్తీ సాగిలపడెదర 

1.నీవే ఇచ్చిన ఈ జన్మము

నీవే మలచిన నా జీవితం

నీకొఱకే…హరా… నా దేహము ప్రాణము

ఉఛ్వాస నిశ్వాసలందున నీ స్మరణము

శంభో మహాదేవ గంగాధరా 

తీరగ నా ఆర్తి కావర వేగిర

2.ఐశ్వర్యమాశించ ఆరోగ్యమీయర

ఆస్తులుకోరను స్వస్థత కూర్చర

పదవుల నడగను నీ పదముల దయసేయ

యశమును కొసరను నువు వశమవగ

శంభో మహాదేవ గంగాధరా

కైవల్యమీయర కైలాసపురహరా

 రచన,స్వరకల్పన&గానం:డా.రాఖీ

రాగం:శివరంజని

రాబోయే రోజులైతె అతిదారుణం

కరోనా మరణాలిక సాధారణం

మనుషుల పెడ చెవిన పెట్టు దుర్గుణం

నరజాతికి పాడుతుంది చరమగీతం

1.జబ్బు అంటుకోకుండుటె అదృష్టం

వైద్యసేవలందబోవు నన్నదే సుస్పష్టం

పరిమితమౌ ఆస్పత్రులు మనపాలిటి దురదృష్టం

ఆక్సీజన్ గాలికైన నోచుకోక ఎంతటి కష్టం

2.ఉధృతంగ చేస్తోంది కరోనా కరాళనృత్యం

నేనైతే అతీతుణ్ణి అన్నదే మన పైత్యం

అజాగ్రత్త మనుజల స్వీయమైన అకృత్యం

ఏ ఒక్కరు పాటించక  నరకమే ఇక నిత్యం

3.తను మినహా పరుల చావు మామూలై

వ్యాధివల్ల బాధవల్ల బతుక్కన్న చావే మేలై

శ్మశానాల్లొ శవాలదిబ్బలు అనాథలై

కడతేరక కళేబరాలు రాబందుల పాలై

4.టీకామందె ఇప్పటికొకటే ఉపశమనం 

మాస్క్ లు ముక్కు మూయ కడు శ్రేయం

ఒక్క క్షణం ఒక్క తప్పిదం చావుకు మూల్యం

సానిటైజర్ వాడుక భౌతిక దూరమిక అనివార్యం

రచన,స్వరకల్పన&గానం:డా.రాఖీ

ఎవరోవస్తారని  ఏదో మనకు చేస్తారని

ఎదిరిచూచి మోసపోవుటెందుకని

నిజం మరచి నిదురపోకూడదని

ఏనోడో తెలిపినాడు మహాకవి

తలదాల్చక తప్పని మాటలు మనకవి

1.ప్రజలకొఱకు ప్రజలచేత ప్రజలకై ప్రభుత పాలనం

నీ కొఱకు నీచేతనె నీకునీవు మనగలిగే జీవనం

నీదైన బ్రతుకు తెరువు నీదైన సంక్షేమం

నీదైన ఆరోగ్యం నువు పొందే వికాసం

ప్రభుత్వాలకొకటే ప్రాధాన్యత

ప్రణాళికా బద్ధమైన సాధికారత

2.చప్పట్లు తప్పెట్లు జనతను జాగృత పరిచేట్లు

దివ్వెల దీపాల వెలుగులు జాగ్రత్తల నెరిగేటట్లు

ప్రకటనలు నియమాలు పెడచెవిపెట్టి

తేలికగా తీసుకునే నైజాన్ని తలపెట్టి

నిర్లక్ష్యం వహిస్తే చావైనా బ్రతుకైనా నీది

ఎవరికి వారయే తీరు నేటి సమాజానిది

 రచన,స్వరకల్పన&గానం:డా.రాఖీ

ఊపిరే భారమై

గొంతునొప్పి క్రూరమై

దగ్గు తెరతొ హాహా కారమై

ఒళ్ళంతా నలతగా నరకమై

బలహీనత ఆవరించ హృదయవిదారకమై

అతలాకుతలమౌను బ్రతుకంతా

కరోనా మహమ్మారి ఆవరించినంత

ముందు జాగ్రత్తలే కరోనాకు పరిహారం

మందులే లేవన్నది కాదు వాస్తవదూరం

1.శ్వాసకోశాలనే ఆవాసం చేసుకొని

నాడీవ్యవస్తనే ఆక్రమించేసుకొని

తనువులోని అవయవాల నిర్వీర్యం చేయబూని

కరోనా చేయుదాడి ప్రత్యక్షర మరణమని

వైద్యసాయమందుట ఒక అదృష్టమేనని

తమకైతే రాదనే నిర్లక్ష్య మేమాత్రం తగదని 

ఎరిగి మెలగకున్నచో ఎవరు కాచలేరు మనని

2.తుమ్ములు దగ్గులవల్లనే కరోనాకు వ్యాప్తి

నోరు ముక్కుల ద్వారా వ్యాధి సంప్రాప్తి

సరి మాస్క్ ధారణొకటె సంరక్షణా యుక్తి

భౌతికదూరం పాటిస్తే బ్రతుకులకే దీప్తి

సానిటైజర్ వాడితే అదికరోనాకు స్వస్తి

ప్రతి ఒక్కరు అరికడితే కరోనా పరిసమాప్తి

టీకామందు పొందు ముందు కరోనాకది మిత్తి

ఓం శాంతి ఓం శాంతి ఓం శాంతిః

 

https://youtu.be/j0aqE6IyRUE?si=ZQ7s9JPNcCghpN0N

రచన,స్వరకల్పన&గానం:డా.రాఖీ

రాగం:చంద్రకౌఁస్

భువనైక మాత విశ్వవ్యాపిత

ప్రాణికోటి జీవనగీత సకలలోక పూజిత

పాహి పాహి దేవీతవ పద పద్మయుగ్మం

దేహిమే జననీ తవ చరణయుగళ సన్నిధానం

నువు వినా గతిలేదు కరుణజూడవే తల్లీ

సత్వరమే మముకాచి దరిజేర్చు కల్పవల్లి

1.నీ కను సన్నలలో చరాచరజగత్తు

నీ చిరునవ్వులలో అపూర్వమైన మహత్తు

నీ దయాదృక్కులలో మా బంగరు భవిష్యత్తు

నీ పరిపాలనలో తొలగును మా ప్రతి విపత్తు

నువు వినా గతిలేదు కరుణజూడవే తల్లీ

సత్వరమే మముకాచి దరిజేర్చు కల్పవల్లి

2.మనుజ జాతి మనుగడకే ముప్పువాటిల్లెనే

దిక్కుతోచనట్లుగా మా శక్తి సన్నగిల్లెనే

స్వేఛ్ఛగా గాలైనా పీల్చ వీలులేదాయే

మానవ బంధాలే పెనుమంటల పాలాయే

నువు వినా గతిలేదు కరుణజూడవే తల్లీ

సత్వరమే మముకాచి దరిజేర్చు కల్పవల్లి

 రచన,స్వరకల్పన&గానం:డా.రాఖీ

ఒక తల్లికి ఆరాటం

ఒక చెల్లికి అనుమానం

చెలియకు చెలగాటం

బొట్టికి ఉబలాటం

ఎన్ని కోణాలో అన్నులమిన్నలకు

ఎన్నగ ఎవరితరము అతివల మతులను

1.పట్టించుకోకుంటే పరమకష్టము

చొరవచూపబోతే అది అయిష్టము

పరులచూపుకొరకే పడతి అలంకరణం

చూపు తిప్పుకోనీయని వస్త్రధారణం

అయస్కాంతమే పురుషులకిల కాంత

ఔనన్నా కాదన్నా మగవాడికే చింత

2.అందాల కేంద్రాలన్నీ ప్రదర్శించడం

గుడ్లుమిటకరిస్తేనో విమర్శించడం

స్త్రీపురుషుల  ఆకర్షణ పరస్పరం సహజం

మనసుముసుగు తొలగిస్తే బయటపడును అసలు నిజం

హద్దులు మించనపుడు ఏదైనా ముద్దే

మగవారినె నిందించుట అన్యాయపు సుద్దే

 రచన,స్వరకల్పన&గానం:డా.రాఖీ

ప్రతి గీతానికీ.. నీవే శ్రుతిలా

నా గాత్రానికి నీవే ఊపిరిలా

నా స్వప్నాలకు సాకారంగా

నా స్వర్గాలకు ప్రాకారంగా

అలజడిరేగే ఎద లయ సైతం నీలా మంజులమై

చంచలమైన చిత్తమంతా నీవే కేంద్రకమై

అంకితమైతేనె కదా జీవితం

పంచుకుంటేనె కదా స్నేహితం

1.మది తేలిపోతుంది నీ ఊసు మెదలగనే 

కైత వాలిపోతుంది నీ ఊహకలగగనే

నను నడిపించే చోదక శక్తిని

నను కదిలించే నా అనురక్తివి

తట్టిలేపుతుంటావు నిద్రాణమైనపుడు

మార్గదర్శివౌతావు దారితప్పినప్పుడు

నాలో కవికి స్ఫూర్తివి నీవై ప్రేరణ నిస్తావు

నాలో రగిలే ఆర్తే తీరగ కారణమౌతావు

2.వరదవై ముంచెత్తావు చినుకులా రాలి

శరత్తుతో జతకట్టావు చకోరిలా వాలి

మనసునే అల్లుకున్నావు మల్లెతీగలా

వయసునే గిల్లుతున్నావు కందిరీగలా

మూడునాళ్ళు చాలవా మూడుముళ్ళరాగానికి

ఏడు జన్మలెత్తాలా ఏడడుగుల యోగానికి

కల్పనలకు ఇక స్వస్తి కనులెదుట కనిపించు

కనీవినీ ఎరుగని రీతి అనుభూతులందించు

OK

 రచన,స్వరకల్పన&గానం:డా.రాఖీ

సవా లక్ష సవాళ్ళు బ్రతికినన్నాళ్ళు

సాధించడంలొనె గెలుపు ఆనవాళ్ళు

వడ్డించిన విస్తరైతె జీవితమే చేదు

కాలుకదుప పనిలేదన అదే కదా ఖైదు

1.నిస్సారమౌతుంది మార్పన్నది లేకుంటే

నిర్వీర్యమౌతుంది బుద్దిని వాడకుంటె

చలనం లేకుంటే తిమ్మిరెక్కుతుంది చేయి

తిన్నదరిగిపోకుంటే అదే పెద్ద రోగమై

వడ్డించిన విస్తరైతె జీవితమే చేదు

కాలుకదుప పనిలేదన అదే కదా ఖైదు

2.పిచ్చెక్కిపోతుంది వ్యాపకమే లేకుంటే

విసుగుకలుగుతుంది పాడిందే పాడుతుంటె

తేరగదొరికే విజయమూ ఓటమి సమమట

మలుపులు మజిలీలు బ్రతుకుదారికూరట

వడ్డించిన విస్తరైతె జీవితమే చేదు

కాలుకదుప పనిలేదన అదే కదా ఖైదు

 రచన,స్వరకల్పన&గానం:డా.రాఖీ

ఆదర్శవంతమట నీ జీవితం

అనుసరణీయమట సదా నీ పథం

ఆచరణీయమట నీ ఏకాదశ సూత్ర వ్రతం

అభివాదనీయమంటి నీ పదం సతతం

సాయీ సాయీ గొను వందనం

సద్గురు సాయీ నీకిదె సాష్టాంగ వందనం

1.చిరుగులదొక కఫ్నీ తలచుట్టు రుమాలు

పాదరక్షలైన లేని నీ పవిత్ర పాదాలు

పూటగడవడానికై చేసావట భిక్షాటనాలు

పాడుబడ్డ మసీదే వసతైన నీ ఇల్లు 

ఎందుకు పడతారో జనం నీకు బ్రహ్మరథం

ఎరుగలేరు ఎవ్వరు నీ భక్తుల మనోరథం

సాయీ సాయీ గొను వందనం

సద్గురు సాయీ నీకిదె సాష్టాంగ వందనం

2.మహిమలేం చేసావో మాకు సందేహమే

లీలలేం చూపావో అసలు నమ్మశక్యమే

బూడిద నొసగెదవది సంపదనా  భాగ్యమా

వేడితేం పొందెడిది సౌఖ్యమా ఆరోగ్యమా

అనుభవైకవేద్యమైందె విశ్వసనీయము

మా వ్యాధుల వైద్యమైందె పరమౌషధము

సాయీ సాయీ గొను వందనం

సద్గురు సాయీ నీకిదె సాష్టాంగ వందనం

 రచన,స్వరకల్పన&గానం:డా.రాఖీ

రాగం:బౌళి

ఇచ్చినవాటికి నే తృప్తినొందనా

నోచనివాటికి ఆరాటమొందనా

అమందానంద కందళిత అరవిందాననా

చకోరికా వరదాయిక శరదిందు వదనా

అంజలింతు మంజులభాషిణి

ఆశ్రయింతు నీ చరణయుగళిని

1.తల్లివి నీవని తలపోతును కాదే

నా క్షుద్బాధ నెరుగవంటె  మది నమ్మదే

అర్ధాకలితో నన్నుంచగ న్యాయమదేఁ

దేహిమే కవనగాన ద్వయాన్విత క్షీరదే

అంజలింతు మంజులభాషిణి

ఆశ్రయింతు నీ చరణయుగళిని

2.మెరుగు పరచు భావ లాలిత్యము

ఇనుమడించు ప్రతీకాత్మ సాహిత్యము

ఒనగూర్చవె నా గాత్రమందు మాధుర్యము

పరిమార్చవె నా గళ గరళ వైపరీత్యము

అంజలింతు మంజులభాషిణి

ఆశ్రయింతు నీ చరణయుగళిని

 రచన,స్వరకల్పన&గానం:డా.రాఖీ

వాడొక్కడే కారకుడు

వాడొక్కడే కార్యకారణ సంబంధితుడు

వాడొక్కడే ఉన్నఫళంగా బ్రతుకు కుదిపివేసేది

వాడొక్కడే ఓడలు బళ్ళుగ బళ్ళు ఓడలుగ మార్చేది

పనికిరాని ఆటలెందుకు ఆడుతాడో

ఏ పావునెలా కదుపుతూ ఎందుకు మట్టుబెడతాడో

1.పట్టకొనగ ప్రయత్నిస్తే పారిపోతాడు

పట్టించుకోకపోతే మరీగుర్తుచేస్తాడు

అంతతిక్కలోడు లేడెవడూ లోకానా

అంత తింగరోడు కానరాడు జగానా

పనికిరాని ఆటలెందుకు ఆడుతాడో

ఏ పావునెలా కదుపుతూ ఎందుకు మట్టుబెడతాడో

2.చేయి పట్టినడిపించే తండ్రి తానే

పాఠాలు బోధించే గురువు తానే

ఏమరుపాటుకు గుణపాఠం నేర్పేది తానే

జీవితాన్నే మూల్యంగా గైకొనెది తానే

పనికిరాని ఆటలెందుకు ఆడుతాడో

ఏ పావునెలా కదుపుతూ ఎందుకు మట్టుబెడతాడో

 రచన,స్వరకల్పన&గానం:డా.రాఖీ

జిట్టెడు పొట్టకోసం

పట్టెడు బువ్వకోసం

పుట్టెడు పుట్టెడు దుఃఖం

శోకమె నిండిన లోకం

ఆ రడ్గుల జాగకోసం

ఆనందపు నిద్దుర కోసం

పుట్టెడు పుట్టెడు దుఃఖం

శోకమె నిండిన లోకం

పట్టుకొచ్చిందైతేమి లేదు

పట్టుకెళ్ళ వీలైతె కాదు

నడుమన నాదను దుఃఖం

శోకమె నిండిన లోకం

మూణ్ణాళ్ళ ముచ్చట అందం

మూడే నిమిషాల కామం

మైథునయావతొ దుఃఖం

శోకమె నిండిన లోకం

తప్పని మరణంకోసం

నానా వ్యాధుల పీడనం

పుట్టెడు పుట్టెడు దుఃఖం

శోకమె నిండిన లోకం

https://youtu.be/db493H0yqdo?si=IkDYui_xYIMUgTF_

 రచన,స్వరకల్పన&గామం:డా.రాఖీ 

పేటలు పట్టణాలు కడచి వచ్చినాను

నీ చరణాలనెప్పుడో శరణుజొచ్చినాను

ఏనాటికి మాపురవేల్పువు నీవేస్వామి

సంకటములనిక మాన్పర పాహిపాహి

ధర్మపురి లక్ష్మీ నరసింహ స్వామి

మా ధర్మపురి లక్ష్మీ నరసింహ స్వామి

1.నీ సుందర రూపాన్ని కనుల ముందు చూపు

నీ మంగళ విగ్రహాన్ని నా తలపున నిలుపు

నీ ఉగ్రరూపంతో అరివర్గము నెడబాపు

నీ శాంత స్వరూపమే సర్వదా నాకు ప్రాపు

ధర్మపురి లక్ష్మీ నరసింహ స్వామి

మా ధర్మపురి లక్ష్మీ నరసింహ స్వామి

2.మా ఈతి బాధలన్ని ఏ రీతి తొలగింతువొ

మా లోన జ్ఞానజ్యోతి ఎప్పుడు వెలిగింతువో

బ్రతుకంతా వ్యాధులతో పోరాటమె సరిపోయే

నీ సన్నిధి చేరినంత మనసుకెంతొ ఊరటాయె

ధర్మపురి లక్ష్మీ నరసింహ స్వామి

మా ధర్మపురి లక్ష్మీ నరసింహ స్వామి

పన్నగేంద్రునిపైన పవళించియున్నావొ

శేష తల్పము మీద సేదదీరుతున్నావొ

మా యమ్మ అలమేలు సేవగొనుచున్నావొ

మామేలుకూర్పగా ఆదమఱచి యున్నావొ

ఏడుకొండలవాడ ఏమిటో నీమాయ

యతిరాజుకైనను గతిగానరాదాయే

1. కాలైన కదపక నీ గుడికి రాలేక

పేరైన పలకక నీ నామమనలేక

కళ్ళున్నవేగాని నిను కాంచలేక

నా దేహమెప్పుడు నా మాట వినక

ఏలదిగజార్చావొ జీవచ్ఛవమల్లె

నువులేక నాకేల ఈ బ్రతుకు డొల్లే

ఏడుకొండలవాడ ఏమిటో నీమాయ

యతిరాజుకైనను గతిగానరాదాయే

2.పక్షివాహన నీవు పక్షపాతివి స్వామి

ఆపేక్ష నెరవేర్చ నీకు ఆక్షేపణయేమి

ముంచగా ఎంచితివి నా జీవనావను

దరిజేర్చ దయలేద నను ఇకనైనను

నీ పాదపద్మాలె నెరనమ్మితి

ఎదలోనె నిన్నింక స్థాపించితి

ఏడుకొండలవాడ తాళరా నీమాయ

యతిరాజుకైనా దొరుకునా నీదయ

 రచన:డా.గొల్లపెల్లి రాంకిషన్( రాఖీ)

"ప్లవించనీ 'ప్లవ ఉగాది' జీవ గోదారిగా.."

ఓ కవి ప్లవ సరస భావనా ఉగాది

ఒక విప్లవ శోభన కవన  నాంది

నవ జీవన  పరిపుష్ట భవనపునాది

అశాస్త్రీయ విధానాల కిది సమాధి

విరులు పూయ ఎద ఆమని వనవాటిగా

గొంతు పెంచు కోయిలవై నిలదీయ సూటిగా

పచ్చడిచేయాలి  వైరులార్గురుని ధాటిగా

జాతకాలనే మూఢంగా  పాటించని మేటిగా

తెగులు తొలగ తెలుగులు తెగువ మీరగా

తెలుగువారి హక్కులకై ఎడతెగక పోరగా

తెలుగు భాష తెలుగుజాతి వెలుగు తీరుగా

తెరలు తీసి తెలుగు మనసు లొకరికొకరుగా

కరోనా నేపథ్యం ఆరోగ్యమె ప్రాథమ్యం

వ్యాయామం వదలక తెమలే దినచర్యం

అలవాట్లు మేలుకూర్చ మనకదే మహాభాగ్యం

అనందమె పరమావధి పొందవలదు వైరాగ్యం

 రచన,స్వరకల్పన&గానం:డా.రాఖీ

వెలవెల బోతోంది పండువెన్నెలే

మిలమిలలాడుతుంటే నీ మేని వన్నెలే

ప్రౌఢగా మారిన కొలది ఇనుమడించె నీ అందం

ఎలా నిలుప గలిగేవో నిత్య నూత్న యవ్వనం

1.తపనలే పెరిగేను తలతిప్పి చూస్తేనూ

చూపులతొ తెలిసేను ప్రేమలేఖ రాస్తేనూ

పెదవులే పంపేను చిరునవ్వు స్వాగతాలు

కలలు కల్పించేను కలయికల ఆనందాలు

2.చెంపకున్న సొట్టలు వేయిస్తాయి లొట్టలు

చెవులకింపు జూకాలు కలిగిస్తాయి మైకాలు

ఉల్లిపొరల వస్త్రాలు మన్మథుని పుష్పాస్త్రాలు

వెన్నముద్ద మెత్తదనం తనువు తడుమ తన్మయం

 జయహో తెలుగు సినీ కళామతల్లి నీకు జయం

జగన్మోహనుడే కొనితెచ్చె నీకు పూర్వ వైభవం

పసిపాపకు చందమామ నందించిన చందంగా

సామాన్యుడి వాకిటిలొ నిను  ఆడిపాడ నిలిపెనుగా

అభినవ శ్రీ కృష్ణ దేవ రాయలుగా

అండగనిలిచాడు జగన్నీకు అపూర్వ కళాభిమానిగా

1.పాలాభిషేకాల ఉత్తుత్తి హీరోలు జీరోలౌతూ

అభిమానుల గుండెలపై తన్నేలా బాక్సాఫీసు రాజేస్తూ

వీక్షకుణ్ణి నిర్లక్ష్యం చేస్తూనే తాము ఎదిగేస్తూ

దారుణానికొడిగట్టారు ఫ్యాన్స్ నే పావులుగా ఎరవేస్తూ

వాస్తవాల నెరిగినపుడె అభిమానికి కనువిప్పు

గుడ్డిగా నమ్మితే ఎప్పటికైనా తప్పదు ముప్పు

2.వినోదాన్ని వ్యాపార పరం చేసే గుత్తాధిపత్యం

 ఒకరిద్దరి కబంధ హస్తాల్లో చిక్కెను నీ భవితవ్యం

టికెట్టు రేటు శాసిస్తూ థియేటర్లుదాచేస్తూ పరిశ్రమను చేసారు అయోమయం

సామాన్యుడికెన్నటికి అందుబాట్లొ లేకుండా సిన్మా అయ్యింది  ఓ గగనసుమం

గుప్పిటిలో నొక్కేసి లాభాలే ధ్యేయంగా నిను చేసిరి  విషమయం

కరవాలం ఝళిపించి కట్టడి చేసె జగన్ మించనీక సమయం

3.సినిమాఫియా కోఱలు పెరికినాడు జగన్ జడవక

లోకాన నిజమైన హీరోగా వెలిసాడీ cm మడమతిప్పక

చిన్నా పెద్దా అనికాక ప్రతి సినిమాకొకే రీతి టికెట్టుగా జారీ చేసాడు హుకుం

విర్రవీగు సినీముఠాకు బుద్ధివచ్చునట్లుగా నేర్పాడు చక్కని గుణపాఠం 

కళాకారులెందరి కృషితోనో వెలిగె నీ తెలుగు సినీ ఖ్యాతి

పేదోడికి ఏకైక ఊరటగా సేదదీర్చగా చల్లనైన నీ సన్నిధి

 రచన,స్వరకల్పన&గానం:డా.రాఖీ

విష్ణు పాదాబ్జ జనిత

బ్రహ్మకమండల సంభూత

శివజటాఝూట విలసిత

హిమ శిఖర ప్లావిత

గంగా సమ పునీత నా కవిత

పుట్టేది ఏ విధో,తట్టేది ఏ మదో

1.భవమే అనుభవమే ఒక భావమై

హృదిని ఉత్తేజపరచు అనుభూతియై

అంతశ్చేతనలో అస్పష్టరూపమై

అక్షరమే జీవ కణమై పదతతి ప్రాణసద్మమై

అవతరిస్తుంది నాదైన కవిత 

తరింపజేస్తుంది ఏ సరస మదో

2.ఊహయే అనూహ్యమై భవ్యమై

గత కవితల తలమానికమై నవ్యమై

శైలీ శిల్పములో మాన్యయై అనన్యమై

కవనమంత రసాలఫలరసమై రమ్యమై

అలరింప జేస్తుంది నాదైన కవిత

రంజింపజేస్తుందే పాఠక మదో

 రచన,స్వరకల్పన&గానం:డా.రాఖీ

కలనైనా కలవాలని ఉంది

నీ కౌగిట వాలాలని ఉంది

వరమొసగెడి దేవతనడిగి

నా మనసుకు రెక్కలు తొడిగి

ఉన్నఫళంగా- నీవున్నతావే నాకు దేవళంగా

1.తపిస్తున్నాను నీకై ఒక మునిలా

పరితపిస్తున్నా సీతకై రామునిలా

నిరీక్షిస్తున్నా పికముకై ఆమనిలా

ప్రతీక్షిస్తున్నా తారకకై సోమునిలా

2.అల్లుకున్న బంధనాలే అశనిపాతం

పెల్లుబికే కన్నులలో అశ్రుజలపాతం

వెల్లువెత్తు వేదనకు నీ తలపే నవనీతం

వెల్లడించలేని ప్రేమే నా హృదయగతం

https://youtu.be/tTeiBU2f1r

 రచన,స్వరకల్పన&గానం:డా.రాఖీ

రాగం:దర్బార్ కానడ

తామరాకు మీది నీటిబొట్టు నీ గుట్టు

బ్రహ్మకైన బోధపడదు నీ తాత్విక పట్టు

చూడబోతె ఆలికి విలువిచ్చిన సంసారివి

వాడవాడ బిచ్చమెత్తు సన్యాసివి

ఎంతవింతదయ్య నీమాయ సదయ్య

చింత మాయ  నీ చింతన హాయి కదయ్య

1.ఆది అంతమే అసలులేనివాడివి

అనాదిగా దైవమైన పరమశివుడివి

ఇల్లూ వాకిలీ నీకంటూ పట్టవేవి

ఏనుగుతోలునే ఎపుడూ కట్టితివి

నిన్నుచూస్తె తెలియదా నిరాడంబరమేంటో

అడిగిందల్లా ఇచ్చే నీవల్ల త్యాగమంటేమిటో

2.అందాలను ఏమాత్రం నువు ఆశించవు 

బంధాల వలలోన ఎన్నడూ చిక్కవు

సత్రపు భోజనం మఠంలో నీ నిద్ర

నాకు తోడు నీవేరా కరుణా సముద్ర

నీ కంటె సుఖపురుషుడు ఎవ్వరీ లోకంలో

నిన్నుమించి స్థితప్రజ్ఞులున్నారా ఈ ఇలలో

Pic courtesy: Agacharya Artist

రచన,స్వరకల్పన&గానం:డా.గొల్లపెల్లి రాంకిషన్ రాఖీ

పట్టీలతొ మది కట్టేసే నీ పాదాలకు ముద్దు

పట్టుచీర అంచుకు నే పెట్టెదనొక ముద్దు

పట్టపురాణిగ చేకొని చేసితి నినుముద్దు

పట్టుగొమ్మ పరువాలకీవేనని ఇచ్చితినొకముద్దు

1.పట్టుతేనెకాటపట్టు నీపెదాలపై ముద్దు

పట్టుబట్టిపెట్టితి నీ నుదుటిపైన ముద్దు

పట్టరాని ఆనందం నీవిచ్చే ప్రతి ముద్దు

పట్టిపట్టి నువుపెట్టే ప్రతిముద్దూ నాకు ముద్దు

2.పట్టువిడుపు ఉన్నప్పుడు బెట్టైనా ముద్దు

పట్టించుకోనప్పుడు చేదౌను పెట్టే నా ముద్దు

పెట్టకుంటెమానె నన్ను తిట్టుకుంటు నువు ముద్దు

పెట్టేబేడా సర్దుక పుట్టింటికెళ్ళకుంటే బతుకంతా ముద్దు

 https://youtu.be/gGx_53Tr-D0

రచన,స్వరకల్పన&గానం:డా.రాఖీ

కుప్పబోసిన అచ్చర ముత్తెము లసలేకాదు

ఏర్చికూర్చిన పదముల పగడములైతే కాదు

తలకూ తోకకు పొంతనలేని వాక్యాలు కాదు

పటాటోపమై వింతనుగొలిపే శైలి శిల్పం కాదు

కవితంటేనే హృదయ జన్యమౌ భావుకత

కవితంటేనే మనసును మనసుతొ కలిపే గీత

1.ఉల్లాసానికి నిలయమై ఉద్వేగానికి ఆలవాలమై

నవరస సుసంపన్నమై ప్రకృతితో మమేకమై

శివజటాఝూటమౌ ఆకాశగంగయై

అర్జున శరాఘాతజనిత పాతళగంగయై

కవి మనమున ఉద్భవించు బ్రహ్మకమలమే కవిత

కవితంటేనే మనసు మనసుతో పలికే భాష

2.అందరి అస్పష్టానుభూతి అందరికిష్టమైన విభూతి

సరస్వతీమాతృ స్తన్యమే సాహితి ఇది మేధోసంపతి

జానపదుల శ్రమజీవన సౌందర్యమై

సమసమాజ నిర్మాణ సాధనమై

కవి కరమున తిరుగులేని ఆయుధమే కవిత

కవితంటేనే మనసుకు మనసుకు అనుసంధానత

OK

 రచన,స్వరకల్పన&గానం:డా.రాఖీ

ఎక్కడ నీకు నొప్పైనా

కలుక్కుమంటుంది నా గుండె

ఏ మాత్రం నీకు బాధైనా

నలిగిపోతుంది నా మెదడె

ప్రియా నీవూ నేనూ వేరువేరా

ఏనాడో నేను నీవుగా పూర్తిగా మారా

1.గరికమీదనీవు నడవగా నొచ్చే

నీపాదాలకా, అదినా ఎదకుగుచ్చే

బొడ్డుమల్లె నీపైన రాలిపడ్డ నొప్పే

ఇంకా మానలేదు నా నెత్తిబొప్పే

ప్రియా నీవూ నేనూ వేరువేరా

ఏనాడో నేను నీవుగా పూర్తిగా మారా

2.సీతాకోకచిలుక నీ పెదాల వాలి

చేసినగాయాలు నాకెపుడు మాయాలి

సూర్యరశ్మి పడినంత నీ మేను కమిలే

రగిలెనా కన్నుల్లో కన్నీటి మంటలే

ప్రియా నీవూ నేనూ వేరువేరా

ఏనాడో నేను నీవుగా పూర్తిగా మారా

 రచన,స్వరకల్పన&గానం:డా.రాఖీ

విశ్వసించెద మిమ్ము అశ్వినీ దేవతలారా

నా మనోవాక్కాయకర్మల ద్వారా

నమస్కరించెద తథాస్తు దేవతలారా

ఆయురారోగ్యములందించే విధాతలారా

1.రవిఛాయా పుత్రులై ఆవిర్భవించినారు

ఉషాదేవినే సోదరిగా బడసియున్నారు

హిరణ్యావర్తారద విహారమొనరించెదరు

సంధ్యాసమయమందు వ్యాహళికేగుదురు

మంచిని తలచడమే వాంఛించియున్నారు

సద్భావననే సర్వదా స్మరించమన్నారు

2.ఆయుర్వేదానికే అధిష్ఠాన దేవతలు

వ్యాధిపీడితుల పాలిటి జీవన వరదాతలు

సాధువర్తనులు మీరు దయాహృదయ సంపన్నులు

ఆపన్నుల ఆర్తితీర్చు కరుణా సముద్రులు

నా కుమరుని నయము జేయ ప్రాధేయ పడుచుంటిని

అన్యధానాస్తి తమేవ శరణమని విన్నవించుచుంటిని

 రచన,స్వరకల్పన&గానం:డా.రాఖీ

గుండెనెంతొ కెలికెనే కలికీ నీ కులుకులు

ఉండబట్టకుంటినే నీతో కలుప పలుకులు

మరణమేకాస్త మేలు నిను పొందనినాడు

స్వర్గమేనేల వాలు నీవుంటె తోడు నీతోడు

1.ఆగమంటె ఆగలేను మరుజన్మదాకా

అరక్షణమూ వేగలేను నిన్ను చూడకా

 చేరరావు నిను చూస్తుంటే ఆకలీదప్పికా

నిదురపారిపోతుంది రెప్పైనా వాలకా

2.ఇల కాంతలెవరు తూగరు నీకాలిగోటికి

గంధర్వకన్యలైన రారు నీతో పోటీకి

అప్సరసలు దిగదుడుపే నీసాటి పాటనకి

నా పుట్టి ముంచావే అందంగా పుట్టి నీ పాటికి

 రచన,స్వరకల్పన&గానం:డా.రాఖీ

వేంకట నారాయణా నమో

దివ్యాలంకార భూషణా ప్రభో

శంఖచక్రగదాపద్మ చతుర్భుజ ధారణ

ఆశ్రితజన సంరక్షణ మునిజనవందిత చరణ

1.కుతూహలమున్నది నిను వర్ణించగా

తాహత్తు తగకున్నది నీ భక్తకవిగా

రాసేదెవరైనా రాయించుకొనుట నీ పని

అక్షరాలనావహించ నే నిమిత్తమాత్రుణ్ణి

2. నీవె నిండినావు నా మానసమంతా

పదములు పునీతమాయె నీ పదముల చెంత

నీదే ఇక భారమంటి నా కేలస్వామీ చింత

అనంతపద్మనాభా కనికరించు రవ్వంత

 https://youtu.be/XrG5M-GlKCI

https://youtu.be/80WPuCZWcbo

https://youtu.be/_ra-TS341Og?si=hEsAxRBk1RtiH5p5

పారింది ప్లవ ఉగాది స్వరఝరియై

పాడింది తెలుగులమది మత్తకోయిలై 

లలితలలిత పదయుత సుమకోమలమై

మధుర మధుర తర శ్రావ్య గీతికయై

నవవత్సరాది ప్లవ ఉగాది శుభాగమనం

తెలుగు జగతికిది తొల్త పర్వదినం

ఆరురుచుల పచ్చడినే సేవించగా

ఆర్గురు వైరుల పచ్చడిగా మధించగా

ఆరుఋతువుల కాలగమన నాందిగా

ఆరుచక్రాలు మేల్కొని మేలుకూర్చగా

నవవత్సరాది ప్లవ ఉగాది శుభాగమనం

తెలుగు జాతికిది ఆనందనందనం

పంచమ స్వరాన ఇంపగు పికగానం

పంచభక్ష్యపరమాన్న విందుభోజనం

పంచానన శివమందిర దివ్య దర్శనం

పంచాంగ అంచనాల శుభ శ్రవణం

నవవత్సరాది ప్లవ ఉగాది శుభాగమనం

తెలుగుజనుల సమైక్య విశ్వకేతనం

 ఒకే ఒక గమ్యం ఒకే ఒక ధ్యేయం 

ఒకే ఒక లక్ష్యం ఏకైక మార్గం

భవసాగరం నుండి పయనం

చేరాలి ఆనంద తీరం మనం....

సదానందమై అనంత దిగంతం  నిండినది

చిదానందమై చిరంతనం సాంతం ఉండినది

మహదానందమై మన మది నిలుచునది

సచ్చిదానందమై వరలెడి అద్వైతమేఅది

దేహాలు దగ్ధం కాగా మోహాలు మాయం కాగా

సోహమే యోగంకాగా త్వమేవాహమైనది

ప్రారబ్ధ కర్మలు ఎడబాసి ఐహికమౌ కామనలే బడసి

సంతృప్తితో మనసే అలసి పొందగలము తత్వమసి.

 రచన,స్వరకల్పన&గానం:డా.రాఖీ

దాహం పెంచే తరంగిణీ

మోహం పంచే రమణీ

ఎలా తీరుతుందో ఈ తాపము

మృగతృష్ణ కానీకు నీ రూపము

కణకణాన నిండావే నీవే ప్రాణమై

ప్రతి శ్వాసలోనూ నీవే జీవమై

నేనంటూ లేనేలేనూ నా ఎరుకలో

అస్థిత్వం కోల్పోయానే నీ ధ్యాసలో

వాలిపోతా ఉన్నపళంగా నీ ఎదుటన

తిలకమౌతా శాశ్వతంగా నీ నుదుటన

నిను కౌగిట బంధిస్తా ఒక్క ఉదుటన

నటనకాదు నమ్మవే మన కలయిక దైవఘటన

 రచన,స్వరకల్పన&గానం:డా.రాఖీ

అలసట తొలగించే మలయ పవన అనుభూతి

అలకను మానిపించె అనునయ స్పర్శరీతి

ఆహ్లాదం ప్రసరించే పూర్ణేందు మాలతి

ఉల్లాసం కలిగించే సమ్మోహన స్నేహగీతి

నీ ముఖమే అపూర్వ దివ్య బ్రహ్మ కమలం

ఇందిందిరమై గ్రోలెద పుష్కల పుష్ప మరందం

1.ప్రత్యూష కిరణాల హాయిగొలుపు వెచ్చదనం

చిన్ననాటి అమ్మచేతి గోరుముద్ద కమ్మదనం

తొలిప్రేమ ప్రియురాలి అధరాల తీయదనం

పారమార్థ సాధకమౌ ప్రశాంతధ్యానసదనం

అలౌకికానంద దాయకం నీ దివ్య వదనం

వీక్షణ మాత్రాన ధన్యం అనన్యం నా జీవనం

2.నడివేసవి పగటి పూట దాహార్తికి చలివేద్రం

నిశ్చలమౌ నిర్మలమౌ పావనమౌ పాల సంద్రం

కవిగాయక ఉత్ప్రేరక నిత్య పరమ మంత్రం

ఆహారనిద్రా అవ్యయాన్వయ ఏకైక సూత్రం

సౌందర్య లహరియై ఒప్పారెడు నీ ఆననం

పరవశమే కలిగించెడి అద్భుతమౌ ఇంధనం

తెల్లవారదు నాకు నువ్వులేక

పొద్దుపోనెపోదు నువ్వురాక

ఏ పూట గడవదు నీ ఊసులేక

నా కాలు నిలవదు నిన్ను కలవక

ఓ నేస్తమా నా సమస్తమా

అస్తమానమూ నీదేలే నా ధ్యాస

ఆస్తమాలా నువువినా కష్టమే నా శ్వాస

నీకు నేనెంత ముఖ్యమో కాదో

నువ్ లేక బ్రతుకు నాకెంత చేదో

వస్తేరానీ నాకే ఏ అపవాదో

కలనెరవేరనీ కనీసం నీదో నాదో

ఓ నేస్తమా నా సమస్తమా

అస్తమానమూ నీదేలే నా ధ్యాస

ఆస్తమాలా నువువినా కష్టమే నా శ్వాస

మూడునాళ్ళే కదా జీవితం

ముచ్చటగా సాగనీ స్నేహితం

ఉండనీ నీగుండెలో ఓ మూలన

గత జన్మ వాసనే తీరుతీరున

ఓ నేస్తమా నా సమస్తమా

అస్తమానమూ నీదేలే నా ధ్యాస

ఆస్తమాలా నువువినా కష్టమే నా శ్వాస

 రచన,స్వరకల్పన&గానం:డా.రాఖీ

నువ్వక్కడ-నేనిక్కడ

నిను కలవడానికి చోటెక్కడ

మనిషిక్కడ మనసక్కడ

నా బింకాలన్నీ కప్పల తక్కెడ

1.కలవాలనీ నినుకలవాలనీ

నను నీ రెప్పలపై కలగా వాలనీ

తలవాలనీ ననునీవానిగ తలవాలనీ

కలలోనైనా నీ ఒడిలో నా తల వాలనీ

2.  మోయనీరేయినీ  మోయని హాయినీ

కరిగించగా సరసాల నీ గుండె రాయినీ

అందని ఆనందాలనే ఇక నాకందనీ

పొందని పొందునే నీవల్ల నను పొందనీ

 రచన,స్వరకల్పన&గానం:డా.రాఖీ

 నీ పని నువు చేయి హరా సరా

నను చేసుకోనీయి నా పని తీరా

నా జోలికి రాబోకు  ఆటంక పరుస్తూ

మాటిమాటికీ మనసును చంచలింపజేస్తూ

వరములిచ్చు మాటన్నది నీ పరిధి

కర్తవ్యపాలనయే నాకేకైక విధి

1.జన్మలు కర్మలు పుణ్యపాప ఫలములు

ఎవరికెరుక ఎవరని కర్తలు దాతలు

ఇప్పటికిప్పుడే వేసేయి నేరాలకు శిక్షలు

ప్రక్షాళన గావించి దయచేయి మోక్షము

నీకు చెప్పుడెందుకు తెలవదా ఆ మాత్రము

నిను కోరుడెందుకు తీర్చేవా ప్రతి ఆత్రము

2.పూజలు వ్రతాలు యజ్ఞయాగాదులు

చేస్తేనే ఔతాయా సార్థకాలు జీవితాలు

బదులుకు బదులిస్తే పక్కా వ్యాపారము

ఆత్మ పరమాత్మల బంధమెలా అక్షరము

వికసించనీ నాలో సహస్రార కమలము

అపుడే నే చేరగలను భవసాగర తీరము

 "శివలీలలు"

https://youtu.be/9E7WFZrBoI4

భూనభోంతరాళ సుస్థిరా ఆదిమధ్యాంతరహిత హరా

లింగరూపోద్భవ స్వయంభో శంభో శంకరా

ఎందరు తరించిరో నీ ఉపవాస దీక్షా వ్రతులై

ఎందరు లయించిరో నీలో జాగృత మతులై

శివరాతిరి నిరంతరం శివా నీ నామ స్మరణమే

అహరహం జాగారం భవా నీ గుణగానమే

1.సాలీడు నిర్మించె నీడ నిచ్చుగూడు

సామజమూ అర్పించె పూలూ మారేడు

భుజగము పుణికరించె నాగమణుల వీడు

కన్నులనే పూన్చె నీకు భిల్లుడయీ తిన్నడు

శివరాతిరి నిరంతరం శివా నీ నామ స్మరణం

అహరహం జాగారం భవా నీ గుణగానం

దశకంఠుడు మెప్పించె రుద్రవీణ మీటి

మార్కండేయుడాయె చిరంజీవి నమ్మికతోటి

సిరియాళుడు ధన్యడాయె నీ లీలను చాటి

దుర్గుణ గుణనిధీ ముక్తినొందె నీ మైమకేది సాటి

శివరాతిరి నిరంతరం శివా నీ నామ స్మరణం

అహరహం జాగారం భవా నీ గుణగానం

 "శివపాద 

https://youtu.be/nu1aSAc90R0?si=1Pg9luxZONOJDjPH

భోభో భోళాశంకరా శాంభవీ విభో

సామగానలోల సాంబసదా శివా  ప్రభో

మహా లింగ రూపా విశ్వేశా స్వయంభో

భవా మాం పాహి పాహి పాహి నమశ్శంభో

శరణు శరణు శరణాగతవత్సల హరహరా

1.హరిబ్రహ్మార్చిత  అభిషేక ప్రియ ఈశ్వరా

మునిజన వందిత  బిల్వదళాలంకార సుందరా

దేవ దానవ మానవ పూజిత పన్నగ ధరా

వృషభవాహన పంచానన హిమవన్నగ చరా

శరణు శరణు శరణాగతవత్సల హరహరా

2.దిగంబరా ఋతంబరా చర్మాంబర ధరా

కాలకంఠ హే నీలకంఠ హే గరళకంఠ శబరా

త్రయంబకా వైద్యనాథా మృత్యుంజయ శశిధరా

జటాఝూటధర గంగాధర వర జంగమ దేవరా

శరణు శరణు శరణాగతవత్సల హరహరా

 https://youtu.be/47BOQ6lh_aY

అంతర్జాతీయ మహిళా దినోత్సవ(08/03/2021)

సందర్భంగా మాననీయ మానినులందరికీ శుభాకాంక్షలు*

రచన,స్వరకల్పన&గానం:డా.గొల్లపెల్లి రాంకిషన్ (రాఖీ)

అమ్మనురా నే ముద్దుగుమ్మనురా

తడియారని కంటి చెమ్మనురా

ఆడదానిగా పుట్టిన గాజుబొమ్మనురా

మనుజాళికి జన్మనిచ్చు నిజమైన బ్రహ్మనురా

నేను కోరుకున్నదేమి స్వాభిమానమే కదా

నేను పొందదలచినది స్వావలంబనే సదా

1.అక్కనై నిను చంకనెత్తుకొంటిరా

చెల్లినై నీకు ముద్దులిచ్చి ఉంటిరా

నేస్తమై నీకు నవ్వులెన్నొ పంచిఉంటిరా

ఆలినై నీకు నిండు బ్రతుకునిచ్చుచుంటిరా

నేను ఆశించినది మరియాదనే కదా

నేను నడిగినదేమున్నది సమానతే సదా

2.వైద్యురాలిగా నీకు పురుడుపోసినాను

దాదిగా చిననాడు సేవలందించినాను

ఉపాధ్యాయినిగా నీకు చదువు సంధ్యనేర్పినాను

అధికారిణిగా నీకు ఉన్నతి కలిగించినాను

భావించకు నను విలాసాల  సామగ్రిగా

ఎంచకు,నను,వాడి పారవేయు వస్తువుగా

3.అంతరిక్షానికెగసినా అవనైతి ఆకసాన సగం

అవనిని పాలించినా నామమాత్ర అధికారం

చోదనలో వాదనలో తీసిపోను నీకే మాత్రం

అర్ధనారీశ్వరత్వమే అనాదిగా సృష్టి సూత్రం

చిరకాల వాంఛ మాది మానభంగ చరమగీతి

నెరవేరని ఇఛ్ఛమాది  అబల సబలయన్న ఖ్యాతి

 రచన,స్వరకల్పన&గానం:డా.రాఖీ

కవనం ఎడారైంది-గాత్రం తడారింది

ఎటుచూసినా మృగతృష్ణలే

ఎదురాయెలే శిశిరమ్ములే

1.భాషనింక ఎలాకూర్చను

భావుకతకు స్ఫూర్తే లేదు

పదములనిక ఎలా అల్లను

అనుభూతి ఆర్తే ఆరదు

ఎలా కదిలించను నా కలమును

కలత పండించదు నా కలలను

2.ఏమని నే పలవరించినా

ఆమని ఆచూకే లేదు

ఎంతగా వెదకి చూసినా

మావికి చిగురాకే లేదు

ఎలా సవరించను నా గొంతు

పాటకొరకు చింతే ఇక నా వంతు

OK

 నన్ను నన్నుగా నువ్వు చూడాలనుకుంటే

పూర్తిగా చూడగలవు కనులు మూసుకుంటే

మిరుమిట్లుగొలుపుతుంది నా ఔన్నత్యం

రంగులీనుతుంది నాతో సాంగత్యం

నేను నీవుగా మారింది తెలియలేదా

అద్దంలో నారూపే అగుపించలేదా

తడిచివెయ్యి మనం వేరువేరన్న భావం

తనివితీర చేసుకో నన్నాలింగనం

ఈ ప్రేమలోపిచ్చోణ్ణౌతున్నా

నీ ప్రేమలో వెర్రోణ్ణౌతున్నా

సంగీతం పలుకుతోంది నా ఊపిరి నీ ఊహల్లో

వసంతం చిలుకుతోంది నీ సన్నిధి నా తలపుల్లో

ఈ క్షణాన్నే చేసేద్దాం వేల ముక్కలు

ఈ యుగాన్నే తాగేద్దాం కొన్ని చుక్కలు

తెమలవేలనే ఓపలేను జాప్యాన్ని

దాటవేలనే ఈ కట్టుబాట్ల కూపాన్ని

నీవు లేక నేనెపుడూ అనంత శూన్యాన్ని

నీవల్లనే పొందగలను జీవితానికర్థాన్ని

ఈ ప్రేమలోపిచ్చోణ్ణౌతున్నా

నీ ప్రేమలో వెర్రోణ్ణౌతున్నా

 రచన,స్వరకల్పన&గానం:డా.రాఖీ

రేపల్లియ నీ కిట్టమైతె కిట్టయ్యా

మా పల్లెని రేపల్లెగ జమకట్టయ్యా

పావనమౌ నీ పాదమిచట పెట్టయ్యా

గోవులు నీకిట్టమైతె కిట్టయ్యా

నను గోవుగ ఇపుడే  జమ కట్టయ్యా

నను నిమురగ మేను కాస్త ముట్టయ్యా

1.మన్ను నీకు ఇట్టమైతె బుర్రనిండ ఉన్నది

మొత్తమంత నీవే తినిపెట్టయ్య

వెన్న నీకు ఇట్టమైతె మనసంతా ఉన్నది

తలపుతలుపు తీసా దోచిపెట్టయ్య

2.నటనలు నీకిట్టమైతె వేసాను ముసుగులు

అహం మమకారాలు కట్టానయ్యా

నగ్నత నీకిట్టమైతె విప్పాను బట్టలు

నన్ను నన్నుగా  నిలబెట్టానయ్యా

3.యమున నీకిట్టమైతె నాకన్నుల ఉన్నది

ఎన్నటికీ ఎండిపోదు  వెతలున్న నా నది

రతము నీకిట్టమైతె అభిమతము నాకున్నది

అనంగమే నిను సంగమించ విహంగమైనది

https://youtu.be/k0CaMKhbmUs

 రచన,స్వరకల్పన&గానం:డా.రాఖీ

అధర హాసం మధుర హాసం

కులాసాల బాసకే విలాసం

హాస్యానికి స్పందించే మోవి లాసం

ఓష్ఠాకాశం వర్షించే మౌక్తిక హర్షం

మోము సీమ పల్వల్వ కనుమ చంద్రవంక

పెదవి మిథున మథన అమృతావతారిక

1.పసితనాన్ని ప్రస్ఫుటించే లేత సంతకం

తొలివలపు తెలుపుటలో మూలకారకం

నవ వధువుకు నులిసిగ్గుల సరస సాధకం

అతిథుల ఎడ ఇల్లాలి ఆహ్వాన సూచకం

వెతలకు వేసిన జలతారు మేలి ముసుగు

వదన గ్రంథానికి  ముఖచిత్రమై పొసగు

2.గోదావరి గలగలలా మంజులమై నినదించు

ప్రత్యూష శకుంతాల కువకువగా రవళించు

విచ్చీవిచ్చని విరిరేకుల పరిమళమై ప్రవహించు

ఘనాఘన ఘనతాడన పరిఘోషమై ఘోషించు

సంతూర్ వాద్య స్వన ఆహ్లాద వాదము

సుస్వర తరంగవ్యాప్త మంగళకర వేదము

OK

 *నా  సాహిత్యాభిమాన పాఠక బంధుమిత్రులకు కృతజ్ఞతాభి వందనములు..!!*

రచన,స్వరకల్పన&గానం:డా.రాఖీ

ఋణం తీరిపోదు ధన్యవాదాలతో  

మొక్కుచెల్లిపోదు కృతజ్ఞతా ప్రకటనతో

ఎన్నాళ్ళ అభిమానమో మన సాహితీ గంధం

ఎన్నేళ్ళ సావాసమో మన కవన బాంధవ్యం

మనసా వచసా శిరసా మీకు అభివందనాలు

నిన్నా నేడూ రేపూ మీకు మైత్రీ   చందనాలు

1.అడుగు అడుగులో మీ శుభాకాంక్షలు

అలుపు అలుపులో మీ స్ఫూర్తీ ప్రేరణలు

మలుపు మలుపులో తెలిపే మీ ప్రశంసలు

గెలుపు గెలుపులో మీ శుభాభినందనలు

ఇంతకన్న ఏంకావాలి ప్రోత్సాహకాలు

ఇవేకదా ఉత్సాహానికి ఉత్ప్రేరకాలు

2.పెద్ద మనసు గలవారు మీరు పాఠక శ్రేష్టులు

విశాల రసహృదయులు నా పాటల ఇష్టులు

నాకు పరిపూర్ణత కూర్చగ మీరే నా స్రష్టలు

నా ఉన్నతి సంకల్పించే నిజమైన ద్రష్టలు

ఇదేకదా జీవితానికి అసలైన పరమార్థం

మీ ఆదరాభిమానంతో నా జన్మ చరితార్థం

 రచన.స్వరకల్పన&గానం:డా.రాఖీ

ఆ కళ్ళు వేస్తాయి కదలనీక సంకెళ్ళు

ఆ కళ్ళు రేపుతాయి చూపులకే ఆకళ్ళు

ఆ కళ్ళే అందానికి ఆనవాళ్ళు

ఆ కళ్ళే అనురాగపు లోగిళ్ళు

వదన సరసు మీనాలై ఒప్పారును ఆ కళ్ళు

ఆనన కాననాన విహ్వలించు పసి లేళ్ళు

1.ఆ కళ్ళు అంగాలలో అనుంగు వ్యంజనాలు

ఆ కళ్ళు ముఖపుస్తక  సమీక్షకే నీరాజనాలు

ఆ కళ్ళు మది గది వీక్షింపజేయు దీపికలు

ఆ కళ్ళు భావ పుష్ప సౌగంధికా వీచికలు

మోము కొలను కలువలై అలరారు ఆ కళ్ళు

లలనకు లాల నూరించెడి అల్లనేరేడు పళ్ళు

2.ఆ కళ్ళు ఒలికించు అలవోకగ నవరసాలు

ఆ కళ్ళు అచ్చతెనుగు ఇచ్చకాల సమాసాలు

ఆ కళ్ళు కురిపించును నచ్చక కడు వడగళ్ళు

ఆ కళ్ళు అతివల అలకలందు పారే సెలయేళ్ళు

కాటుక పుట్టుకకే కారణాలు ఆ సోగ కళ్ళు

సైగల భాషలో వెలయించే కైతల పుట్టిళ్ళు

https://youtu.be/xhLnwhJY1K4?si=zbuWRPkvy7sRnU6j

 రచన,స్వరకల్పన&గానం:డా.రాఖీ

రాగం: జన సమ్మోహిని

జటాఝూటధర నీలకంధరా

జంజాటములను పరిహరించరా

జడదారి జ్వాలి జంగమదేవరా

లంపటములనిక సడలించరా

భంభం మహాదేవా నమః శంభో సదాశివా

1.సతిపార్వతితో అతులిత దాంపత్యం

ఐనా యోగివి నువు అను నిత్యం

సుత ద్వయముతొ సహా కుటుంబం

నీదొక యోగ భోగ వింత కదంబం

భంభం మహాదేవా నమః శంభో సదాశివా

2.తామరాకు సరి ఈ సంసారం 

నను అవనీ ఒక బిందు తుషారం

కలతల బ్రతుకే కల్లోల సాగరం

కడతేరనీ నీవే నావై కైవల్య తీరం

భంభం మహాదేవా నమః శంభో సదాశివా

OK

 https://youtu.be/cutA5IWMO7g

రచన,స్వరకల్పన&గానం:డా.రాఖీ

రాగం:పహాడి

రాసకేళి వేళ వనమాలి 

నా మానసమే తేలితేలి

శిఖిపింఛ మౌళి నా జీవనమాలి

మన మేనుల మిథున శైలి

నేను వెన్నెలా నీవు జాబిలి

చిలికింది సరసరవళి మురళి

నను మథించరా గిరిధరా

నన్నుధరించరా వసుంధర ధరా

1.విచ్చిన పొన్నాగలు నా తపనలు

రెచ్చిన మిన్నాగులు నా తమకాలు

మచ్చిక చేసుకోర లచ్చిమి పెనిమిటి

మెచ్చెద నను జేర్చగ వెచ్చని నీ కౌగిటి

నను మథించరా గిరిధరా

నన్నుధరించరా వసుంధర ధరా

2..వలువలు తొలగించు రయమున

మురిపించు ముద్దుల సాయమున

నిను నేనెరిగెడి శుభసమయమున

ఓలలాడించు ఆనందతోయమున

నను మథించరా గిరిధరా

నన్నుధరించరా వసుంధర ధరా

https://youtu.be/AipzL7z-R6k?si=Q--C3qYHFeSpwpmS

రచన,స్వరకల్పన&గానం:డా.గొల్లపెల్లి రాంకిషన్(రాఖీ)

రాగం:సిందు భైరవి

దయమానితి వేల శ్రీపతి,వేంకటా చలపతి
నిన్నే నా దైవమని నమ్మితి నా నెరనమ్మితి
అరిషడ్వర్గాలకు అతీతుడే కదా పరమాత్ముడంటే
కినుక ఏల నాపైన తండ్రివి నీవని భావించుకుంటే
వీథుల పాల్జేయ బాధల పడద్రోయ ధర్మమా
నీవే శరణన్న నన్ను లక్ష్యపెట్టకున్న న్యాయమా

1.అవకాశమెందుకిచ్చెదవు నిను నిందాస్తుతిజేయ
ప్రయోగించనేల ఈ సుతునిపై నీ మహామాయ
సుఖములెవరు బడసిరిమును నిను కొలిచినవారు
పడరాని పాట్లు పడి కడకు నీ కడ కడతేరినారు
బతుకంతా వెత చెంది ఛిద్రమాయె నా బొంది
ఉద్ధరించ తక్షణమే పరికల్పించు నాంది

2.చెఱసాల పాలాయిరి కృష్ణావతారాన నీ తల్లిదండ్రులు
కొఱతవేయబడినాడు రామదాసు కట్టినీ గుడీగోపురాలు
నిత్య దరిద్రులైనారు నిను నుతించి పోతన శేషప్పలు
అన్నిఉన్నట్టే ఏమీ లేనట్టే  ఎందుకు చేసావు మా జీవితాలు
వరములీయకు సరే నను సదా నీ సేవలొ తరించనీ
రాజును చేయకుమానే నను నీ బంటుగనే అంతరించనీ

 రచన,స్వరకల్పన&గానం:డా.రాఖీ

అతను:  రోజూ చూసే రోజానే...

నీవల్లె నీ నవ్వల్లె అపురూప పువ్వయ్యింది

ఆమె:ఎపుడూ పలికే మాటలే..

నీ వల్లే నీ మనసల్లే అబ్బురమైన కవితయ్యింది

అతను: పల్లవి నువ్వైతే.. నీ చరణం నేనౌతా

ఆమె: మువ్వవు నువ్వైతే..మంజుల సవ్వడి నేనౌతా

అతడు:1.)నీ హృదయపు ద్వారానికి

వాడని మామిడి తోరణమౌతా

నీ  అధరాల ముంగిలిలో

రాలిన ముత్యాల ముగ్గునౌతా

నీ పాపిటి సింధూరం నా అక్షరం

నీ పాదాల పారాణిగా నే సుస్థిరం

ఆమె:2.)నీ మగటిమి సంకేతపు

కౌగిటిలో నే సాంతం కరుగుతా

నీ కండలు నాకండదండ 

నిశ్చింతగ బతుకంతా చెలఁగుతా

నీ కోఱమీసం నాకయస్కాంతం

నీ ఓరచూపు నాకింద్రజాలం

 రచన,స్వరకల్పన&గానం:డా.రాఖీ

అ:)పువ్వుల్లో లవ్వులు-

ఆ:)లవ్ వల్లే నవ్వులు

అ:)నవ్వుతు సాగే తొవ్వలు-

ఆ:)తొవ్వల వెంటే గువ్వలు

అ:)గువ్వలై ఎగిరే ఆశలు-

ఆ:)మువ్వలై మ్రోగే గుండెలు

అ:)1.సత్యాలుగ తోచే స్వప్నాలు

స్వప్నాల్లో నిత్య స్వర్గాలు

స్వర్గాల్లో సర్వ సుఖాలు

సుఖాలే మనకు వరాలు

ఆ:)వికసించే వసంత పుష్పాలు

పుష్పాల్లో మరంద మధురాలు

మధురాలై కోయిల గీతాలు

గీతాల్లో ప్రణయ సరాగాలు

ఆ.)2.హర్షాలై కురిసే వర్షాలు

వర్షంలో మెరిసే కిరణాలు

కిరణాల్లో సప్తవర్ణాలు

సప్తవర్ణాల్లో మన జీవితాలు

అ:)రేయంతా పరిచిన వెన్నెలలు

వెన్నెల్లే రేపె విరహాలు

విరహాలే వింత దాహాలు

దాహాలు తీరేలా దేహైక్యాలు

 రచన,స్వరకల్పన&గానం:డా.రాఖీ

పడరాని పాట్లుపడే  పతులారా

భార్యాబాధిత సోదరతతులారా

కక్కలేని మ్రింగలేని పశుపతిలారా

పరస్పర హితులారా మహితులారా

భూమాతను మించింది మన సహనం

అంపశయ్య మీదే మన జీవనం-సహజీవనం

భర్తలుగా మన బతుకులు నిత్యం చితుకులు

సంసారపు అతుకులు,ఏవో నాల్గు మొతుకులు 

గతకలేక గతుకులు పెనిమిటులెంత మెతకలు

1.తాము పడేదే కష్టమనీ-ఇంటి చాకిరే కఠినమనీ

లేనిపోని నలతలనే సాకుగా అడుగడుగున మేకుగా

ఎడాపెడా రొదచేసే డబ్బా రేకుగా ముల్లునే విరుచు ఆకుగా

మాటిమాటికీ మాటమాటకీ చిరాకుగా

మనమన్నదేదైనా మతి పెట్టక పరాకుగా

2.నానా  గడ్డేదో కరిచైనా- మనం కాళ్ళావేళ్ళా పడైనా

ఆర్జించిన సొమ్మంతా దోపిడిచేసి-సంపాదన సాంతమే'దో'చేసీ

ఎంతైనా చాలదని ఎద రాపిడి చేసి-ఏమన్నా అనబోతే ఎదురుదాడి చేసి

పండచోటిస్తే మనబతుకే దండుగైనట్టు 

ఉండ తావిస్తే మన ప్రాణ గండమైనట్టు

 రచన,స్వరకల్పన&గానం:డా.రాఖీ

దుఃఖమే నిండింది నా గుండెనిండా

కన్నీరే పారుతోంది నర నరాలగుండా

నెత్తురుకిక తావేది హృదయాన కొలువుండ

ఎప్పుడోఆవిరైంది ఆశలు అడియాసలై మండ

1.నలువైపులా వెతల మహా సాగరం

కనుచూపు మేరలోనా కనరాదే తీరం

పుండుమీది పుట్రలా మ్రింగే తిమింగలాలు

శిథిలమైన ఈ పడవను ముంచెత్తే కెరటాలు

2.అల్లంత దూరంలో అగుపించెను భూఖండం

ఊరట చెందునంత తెలిసెను అది హిమగండం

ఇంతలో లాగివేసె  నా నావను సుడిగుండం

కొస ఊపిరి మిగిలిన కుడి అయ్యింది ఖండఖండం

 రచన.స్వరకల్పన&గానం:డా.రాఖీ

గుండె గాయపరచకు మాటల శూలంతో

మదిని వేటువేయకు భీకర కరవాలంతో

చేయనైతె మలాంపూయి దెబ్బతిన్న తరుణంలో

చేయిపట్టి దారిచూపు  గాడితప్పు క్షణంలో

1.గుళకలు చేదైతే చక్కెర పూతపూయి

కోత తప్పదన్నప్పుడు మత్తుమందునీయి

మృదువుగాను చెప్పడం గొప్ప చాకచక్యము

నొప్పింపక తానొవ్వక అన్నదె కద లౌక్యము

2.శాశ్వత ప్రయోజనం ఆశించదెపుడు జనం

తబ్బిబ్బుగ పొగడుతూ పట్టాలి నీరాజనం

దోషాలే మరి లక్ష్యంగా వేయకు ఏ అంజనం

ఆత్మీయ బంధాలను చేయబోకు నిమజ్జనం

 రచన,స్వరకల్పన&గానం:డా.రాఖీ

కదలదేం నా చెలీ 

జాలి మాని రాతిరి

ఎదిరిచూపులాయెనే

ఇలా చకోరి మాదిరి

1.తెచ్చివ్వ రాదే

ఎత్తుకెళ్ళిన నా ఎదే

అంతులేని ప్రేమనంతా

కనులమోసుకు రావే

2. కురిసింది వాన జల్లు

తడిపింది  నా వొళ్ళు

నిలువెల్లా వికృత చలి

నువువినా ఎలా  మదిలోగిలి

https://youtu.be/tG99E8grdr0?si=7tXRdxhoDS0JLLFh

రచన,స్వరకల్పన&గానం:డా.గొల్లపెల్లి రాంకిషన్ రాఖీ

రాగం:పీలూ

వర్ణించనా నీ అపురూప రూపాన్ని
కీర్తించనా నీ గుణగణ విశేషాలని
అభినుతించనా నీ లీలావిలాసాలని
భజించనా  దివ్య పంచాక్షరీ  మంత్రాన్ని
ఓం నమఃశివాయ ఓం నమఃశివాయ

1.పంచముఖా పంచభూతాత్మికా
పంచాక్షర నామాన్వితా ప్రపంచేశ్వరా
పంచామృతాభిషేక ప్రియ పంచప్రాణేశ్వరా
పంచాయుధ ధరా పంచశరు హరా
ఓం నమఃశివాయ ఓం నమఃశివాయ

2.శివరాత్రి లింగోద్భవ గాథ పాడనా
త్రిపురాసుర వధ కథనే నుడవనా
శ్రీ కాళ హస్తి భక్తి లీలను కొనియాడనా
భూకైలాసమా గోకర్ణ క్షేత్ర మహిమ పొగడనా
ఓం నమఃశివాయ ఓం నమఃశివాయ

OK 

 రచన,స్వరకల్పన&గానం:డా.రాఖీ

పోతపోసిన తెలుగు కవిత నీవు

హృద్యమైన తెలుగు వెలుగు పద్యమె నీవు

అమృత భాష అమ్మభాష తెనుగుకే సొంతము

అష్టావధానమై అలరించు నీ అందము

నీలోని అణువణువు ఒక ప్రబంధమే

నీ ప్రతి కదలిక సైతం అపురూప కావ్యమే

1.వసుచరిత్ర యే స్ఫురించు నీ వదనంలో

శృంగారనైషధాలు నీ కనుసదనంలో

యయాతి చరిత్రయే నీ నీలి కురులలో

స్వారోచిషమను సంభవాలు నీ మేనులో

నీలోని అణువణువు ఒక ప్రబంధమే

నీ ప్రతి కదలిక సైతం అపురూప కావ్యమే

2.పారిజాతాపహరణం నీ ముక్కు చక్కదనంలో

కళాపూర్ణోదమే నీ  నొక్కుల చెక్కిళ్ళలో

రాజశేఖర చరిత్రమే నీ పలుకుల చతురతలో

ఆముక్తమాల్యదే నీ బాహుబంధనంలో

నీలోని అణువణువు ఒక ప్రబంధమే

నీ ప్రతి కదలిక సైతం అపురూప కావ్యమే

(మాతృభాషా దినోత్సవం సందర్భంగా)

https://youtu.be/lu915fIZEWI

సింగారాల శ్రీనివాసా

వైభోగాల వేంకటేశా

ఎన్నినోళ్ళపొగడుదు నీ వైభవం

ఎంతని చాటను నీ ప్రాభవం

తిరుపతి బాలాజీ గోవిందా గోవిందా

తిరుమల గిరి విరాజి పాహిముకుందా

1.ఎంతకూ తీరిపోని నీ పెళ్ళి అప్పులు

భక్తుల ఆర్జీలు తీర్చ నీకెన్ని తిప్పలు

సతులిరువురు సాధించే ఒప్పుల కుప్పలు

ఎన్నని కొనియాడుదు స్వామీ నీ గొప్పలు

తిరుపతి బాలాజీ గోవిందా గోవిందా

తిరుమల గిరి విరాజి పాహిముకుందా

2.ఏడుకొండలెక్కితేమి ఎరిగిరార తిరువళ్ళు

మెక్కుబళ్ళుతీర్చుకోను కొట్టింతురు గుళ్ళు

రెప్పపాటులోన దాటు బంగారు వాకిళ్ళు

అనిమేషులౌదురట మూయక రెండుకళ్ళు

తిరుపతి బాలాజీ గోవిందా గోవిందా

తిరుమల గిరి విరాజి పాహిముకుందా

 రచన,స్వరకల్పన&గానం:డా.రాఖీ

రాసుకపూసుక తిరిగేద్దామా

అచ్చిక బుచ్చికలాడేద్దామా

మనసు కవితలెన్నో రాసేద్దామా

మమత గంధమంతా పూసేద్దామా

1.భావానికి మాటలల్లి పాటలే కట్టేద్దాం

అనుభవాల తోటలన్ని హాయిగా చుట్టేద్దాం

నీ చూపులు నాకు సుప్రభాతమైపోగా

నీ చేరువలోనా వసంతమే తోచగా

2.పదాలనే అందెలుచేసి మంజుల సడి పలికిద్దాం

పెదాలనే పువ్వులుచేసి నవ్వుల జడి కురిపిద్దాం

నీ కలకలమే  నన్ను వెన్నుతట్టగా

నీ చెలిమి బలమే నా ప్రగతికి మెట్టుగా

 రచన,స్వరకల్పన&గానం:డా.రాఖీ

ఎప్పుడెగిరిపోతుందో అహమను హంస

ఐక్యమొందింతువెపుడొ ఓ పరమహంస

దైహిక భావనయే నాకెంతటి హింస

చివికిపోయెనిది ఇంక వదిలించర సర్వేశా

1.తప్పవాయె తనువుకు శీతోష్ణ స్పందనలు

మిక్కిలాయే ఈ మేనుకు సుఖదుఃఖ భావనలు

చిక్కిపోతి చిక్కులబడి కాయముతో ముడివడి

వేడుకొందు చేదుకొనగ నీ కడ సాగిలబడి

2.తెగత్రెంచినాగాని తగులుకొనే బంధాలు

విదిలించినాగాని అతుక్కునే బాధ్యతలు

అంతన్నదిలేదాయే ఎంతనీ ఎంతకనీ జంజాటం

సచ్చిదానంద మొసగు తీరగ నా ఆరాటం

 రచన,స్వరకల్పన&గానం:డా.రాఖీ

ఉల్లమే ఉల్లాసమొందితె-గడ్డిపూవూ అందమే

కాలమే అనుకూలమైతే-గాలి పాట గాంధర్వమే

మనసుకు తగిలించు కనులు-లోకమంతా అద్భుతమే

స్పృశించి చూడు ఎదలు-పరశాలు సాంతం సొంతమే

1.చిరు చిరు సరదాలతో  భారమంత తేలికౌను

చిన్ని చిన్ని కానుకలే సంతృప్తికి మూలమౌను

ఇవ్వడంలొ పొందు మజా నవ్వులే పంచు సదా

గుండెలొకటొకటిగ కూర్చి కట్టాలి  దండగా 

మానవతకు అదియే అండ దండ దండిగా

2.ఉనికిని గుర్తించడమే ప్రతిమనిషికి ఊరట

కాసింత వెన్నుతట్టితే ప్రగతి బాటకు బాసట

ప్రేమిస్తే నష్ట మేముంది తిరిగిపొందడం మినహా

బ్రతుకు సాగిపోవాలి సీతాకోక చిలుకల తరహా

అనుక్షణము ఆహ్లదంతో అనిపించాలి ఆహాఁ

 రచన,స్వరకల్పన&గానం:డా.రాఖీ

గురువే బ్రహ్మ గురువే విష్ణువు గురువే శివుడు

గురువే సాక్షాత్తు పరబ్రహ్మా 

సాయీ సాయీ నీవే  నా సద్గురువని నమ్మా

నన్నుద్ధరించు బాధ్యతను సత్వరమే చేకొమ్మా

1.లేనిపోని దుఃఖాలతొ దృష్టిని మరలించుతావు

చిరుచిరు వరములతో బులిపింప చూస్తావు

కోరాల్సిన పరసౌఖ్యము స్ఫురణకు రానీయవు

నిలువలేను ఒరకొనగా  ఏల నన్నేలవు

సాయీ సాయీ నీవే  నా సద్గురువని నమ్మా

నన్నుద్ధరించు బాధ్యతను సత్వరమే చేకొమ్మా

2.తమసోమా జ్యోతిర్గమయా ఈ జగమే మాయ

అన్యధా శరణంనాస్తి నీవే నాకు శరణమయా

భవజలధిని దాటింటే సరంగువే నీవయా

జన్మరాహిత్యమొసగు జగదీశుడ వీవయా

సాయీ సాయీ నీవే  నా సద్గురువని నమ్మా

నన్నుద్ధరించు బాధ్యతను సత్వరమే చేకొమ్మా

 రచన,స్వరకల్పన&గానం:డా.రాఖీ

అందరూ మంచివారే

తప్పుచేయు అవకాశం రానంతవరకూ

అందరూ గొప్పవారే

మనసు ముసుగు జారనంత వరకూ

హద్దులు గిరిగీస్తుంది ఈ సభ్యసమాజం  

న్యాయమూర్తిగ వ్యవహరిస్తుంది

చుట్టూరా ఉన్న ప్రపంచం

1.దాసులే అంతా అహం మమకారాలకు

అతీతులెవ్వరు కానేకారు గుణత్రయాలకు

బుజ్జిగించి అపగలేరు పంచేంద్రియాలను

ఎదిరించలేరు ఎపుడూ అరిషడ్వర్గాలను

వేదాలు వల్లిస్తారు అందుబాటులేకనే

నీతుల్ని బోధిస్తారు అనువుకానిచోటనే

2.అధిగమించలేరు సప్తవ్యసనాలను

ఆశించక మానరు అష్టైశ్వర్యాలను

పోషించక వీడరు నవరసాలను

ప్రదర్శిస్తూనే ఉంటారు దశరూపకాలను

వెసులుబాటు నిస్తుంది ఆ కాస్త విచక్షణ

మొక్కుబడిగ పాటించే విలువలే రక్షణ

 రచన,స్వరకల్పన&గానం:డా.రాఖీ

పంచవన్నెల రామ చిలుక నీవు

ప్రపంచమే నీవైన శారిక నేను

వంచించకు నను నిలువెల్లా ముంచకు

ప్రేమించడమంటేనే నేరంగా ఎంచకు

నే తగనని భావించకు

1.నెమలిని కోరలేదు విలాసమే పరికించి

హంసను ఆశించలేదు వయ్యారమే కాంచి

అందమైన వెన్నిలేవు సుందర ప్రకృతిలోన

అనుబంధమేదొ మేలుకొంది మనమధ్యన

చెలీ మన మధ్యనా

2.ఇంద్ర ధనుసు నీకన్న కడు విణ్నానమే

ప్రత్యూష వర్ణాలు నయనానందకరమే

అందముంటె మాత్రమేమి నంజుకతింటామా

ఆనందమేదొ కలుగుతోంది జంటగ కలగంటినా

నిను జంటగ కలగంటినా

https://youtu.be/BBF-hhfgWg4?si=ql4bXAfP5YseJSFf

రచన,స్వరకల్పన&గానం:డా.గొల్లపెల్లి రాంకిషన్(రాఖీ)

రాగం : బేగడ

అంతటా నీరూపమె దర్శించితి
నా అంతరంగమందు నిన్నే నిలిపితి
వసంత పంచమీనాడు నీ జన్మతిథి
నాకీవే సర్వదా జననీ శరణాగతి
మనసా శిరసా వచసా రచసా ప్రణమిల్లుదు సరస్వతి 

1.అక్షరాలలోన సలక్షణంగ కొలువైతివి
  మోక్ష ప్రజ్ఞాన వికాసమై వరలితివి
  శాస్త్రజ్ఞుల శోధనలో ఆవిష్కృత మైతివి
  మేధావుల బోధలలో ద్యోతకమైతివి
  సాష్టాంగ ప్రణామాలివె చదువుల పడతి

2.నాలోన లోలోన కవన స్ఫూర్తివైతివి
మహాకవుల కావ్యాలతొ ప్రేరణ నిచ్చితివి
నాకలమున పెల్లుబికే జీవఝరివి నీవైతివి
స్వరకల్పన కూర్పున మనోధర్మ సంగీతమైతివి
నా కృతుల నమస్కృతుల గొనవె తల్లి భారతి

 రచన,స్వరకల్పన&గానం:డా.రాఖీ

దాచిన సొత్తు పైనే మక్కువ ఎవ్వరికైనా

మూసిన గుప్పిటి అంటే ఉత్సు కతెవ్వరికైనా

తేరగా పొందేదేదైనా  పలుచనే పదుగురికీ

అందరాని అందాలంటేనే  ఆసక్తి అందరికీ

1.ఒడుపుగా కట్టుకున్నకోక ఆకట్టుకొంటుంది

నిండుగా కప్పుకున్న పైటే కనికట్టు చేస్తుంది

అసూర్యం పశ్య సౌందర్యం వశపరచుకుంటుంది

అనాఛ్ఛాదిత ఉత్సేధమైతే వెగటు కొడుతుంది

2.అన్నులమిన్న కన్నులు చిలుకును సరస సరాగం

అభినవ మోహిని నవ్వులొలుకును రసమయ భావం

పాదాల పట్టీల మంజుల నాదం ఒక శృంగార వేదం

ఎలనాగ ఒళ్ళంతా పారేను వలరస జలపాతం

 కలువ నీవే నను కలువనీవే

కలువ నీవే చెంగలువ నీవే

ఇల కావలగల  అందాలు పోగేసినావే

నీ చూపుల వలవేసి నను లాగేసినావే

నను వలపుల సెగలోన పడద్రోసినావే

1.సిరిమల్లెలు నీవ్వులు నా దోసిట పట్టనా

మనసుదారానికి దండగుచ్చి సిగన పెట్టనా

సింగమంటి నీ నడుము పిడికిట పట్టనా

పెదవులతో వడ్డాణం ముద్దుముద్దుగ పెట్టనా

ముట్టనా పట్టనా పెట్టనా ఉట్టిగ లొట్టలేయనా

2.పట్టుజారి పోనీకు నీ కంచి పట్టుకోకనే

కట్టుకున్నా కట్టనట్టున్నదే నే పట్టీ పట్టుకోకనే

వెన్నలా నున్నగుంది తాకుతుంటె నీ వెన్ను

జున్నుయాదికొస్తుందే అన్చుతుంటె పెదాలున్ను

ముట్టనా పట్టనా పెట్టనా ఉట్టిగ లొట్టలేయనా

Pic Courtesy: Agacharya Artist

 రచన,స్వరకల్పన&గానం:డా.రాఖీ

ఒక్కమాట చెప్పు ఓంకారేశ్వరా

గుట్టుకాస్తవిప్పు గోకర్ణేశ్వరా

అనంత దిగంత రోదసీ సీమలకూ

సమస్త జంతు జీవ మానవ రాశులకూ

నీవొక్కడివేనా ఆధారం నీదేనా ఈ రచనా కౌశలం

1.ఇంత విశ్వాంతరాళంలో

ఈ వింత వింత జీవజాలంలో

నేనేంత నా ఉనికెంత  కంటికి ఆననంత

లోకమంతాకలవన్నా నాలో కలవన్నా 

ఎంతకు అంతుపట్టదెందుచేత

2.ఎంత కాలం గడిచిందో సృష్టికి

ఎంత వైవిధ్యమో సృజనలొ స్రష్టకి

నా ఆయమెంత నా ప్రాయమెంత

ఈ నా జన్మకు అర్థమేమిటో పరమార్థమేమిటో

ఎంతకూ బోధపడదు ఎందుకని

 

https://youtu.be/fDM7orLDMUE

రచన,స్వరకల్పన&గానం:డా.రాఖీ

"ప్రేమికులరోజు" శుభాకాంక్షలతో-

***   ***  ;***   ***   ***   ***

ప్రేమంటే చులకనా ప్రేమిస్తే పలచనా

అనుభూతించు ప్రేమని ఆస్వాదించు ప్రేమని

పంచిచూడు ప్రతివారికి ప్రేమని

ప్రేమించిచూడు కనీసం ఎవరో ఒకరిని

1. ఇముడ్చడం ఎందుకు ఏదో ఒక చట్రంలో ప్రేమని

 గిరి గీయడమెందుకు అనంతమైన ప్రేమకి ఇంతే లెమ్మని

అంతకంటె మించిందే ఉంది ప్రేమకు పరమార్థం

అంతరంగాలే ఎరిగిన అద్భుతమౌ అంతరార్థం

2.ప్రేమంటే దైవానికి  ఏకైక పరిపూర్ణ నిర్వచనం 

ప్రేమంటే కాలాన్నే ఎదిరించే అపురూప విశ్వాసం

విశ్వజనీనమై విశ్వవ్యాప్తమై  అవ్యక్తయై ప్రేమా

సార్వజనీనమై సృష్టిధర్మమై అనుభవైకవేద్యమై ప్రేమా

 https://youtu.be/iqN_YnqggJc

రచన,స్వరకల్పన&గానం:డా.రాఖీ

(ప్రేమికుల చుంబన దినోత్సవం నేడు-శుభాకాంక్షలతో-డా.రాఖీ)

ముద్దముద్దగా ముద్దంటావు

పెట్టుకోబోతే వద్దంటావు

హద్దులేన్నో గీస్తావు

పద్దులేవో  రాస్తావు

ముద్దరాలా నీతో ఎట్లా వేగేది

సుద్దులెన్నని నా ఎదలో దాచేది

1.తీరానికి నిరంతరం అలల ముద్దులు

మేఘానికి అనవరతం తెమ్మెర ముద్దులు

నింగీ నేల నడుమన   చినుకుల ముద్దులు

శశికీ కలువకు మధ్యన వెన్నెల ముద్దులు

ఏ పొద్దూ రద్దుకావు ప్రకృతి పంచ బంధాలు

2.పిచ్చుకకు పిచ్చుకకు నులి వెచ్చని ముద్దులు

పికమునకు చివురులకు సరిగమ ముద్దులు

చిలుకా గోరింకల కలలౌ అమలిన ముద్దులు

క్రౌంచ మిథున మథన సదన సరస ముద్దులు

ఏ పొద్దూ రద్దుకావు ప్రకృతి పంచ బంధాలు

https://youtu.be/8udpF1bw6To

తోమాల సేవకు ఏమాలలల్లను

నీ మాలకోసము ఏపూలుచెల్లును

పూలెన్నొ దొరికేటి ఏ తోటకెళ్ళను

నా తోటే నాకుడి నీకే చెల్లింతును

తిరుమలగిరివాస అలసెను నా శ్వాస

నా వపువు వాడకనే మెడను దాల్చు నీవాడిగ 

1.నీమాల నెరుగను నీ నామాలను మినహా

వేదాల నెరుగను నీ దివ్య పాదాలు వినా

మంత్రాలనెరుగను నీ మహిమలు మాత్రమే

ఏ పూజలెరుగను నీ పుణ్య కథా శ్రవణమే

తిరుమలగిరివాస అలసెను నా శ్వాస

నా వపువు వాడకనే మెడను దాల్చు నీవాడిగ 

2.తనువులొ అణువణువు తులసీదళమే

నయనాలు కలువలు సర్వదా నీ పరమే

నా నవ్వుల మల్లెలను కర కమలాలను

ఎద గులాబీని కూర్చి అల్లివేతు మాలలను

తిరుమలగిరివాస అలసెను నా శ్వాస

నా వపువు వాడకనే మెడను దాల్చు నీవాడిగ

 రచన,స్వరకల్పన&గానం:డా.రాఖీ

మధుర స్వప్నాల తో శుభరాత్రి

నిద్ర చెడగొడుతుందేమో నీ మైత్రి

మూతబడే రెప్పలతో చెప్పరాని తిప్పలు

ముసిరే నీతలపులతో కునుకునకు యాతనలు

1.వ్యసనంగా చేరావు వదలుకోనట్లుగా

అశనంగా మారావు ఆకలే తీర్చునట్లుగా

నా ప్రపంచమంతా కేవలం నీవైనావు

ఆత్మీయ నేస్తంగా ఎదనాక్రమించావు

2.నీ మంజుల గాత్రంలో పరిమళాలెన్నో

నీ నవ్వుల సవ్వడిలో సంగీతాలెన్నెన్నో

నీ సావాసంలో  అనునయాల నవనీతాలు

నీ చెలిమి నాలోనా నింపె మొండిధైర్యాలు

 రచన,స్వరకల్పన&గానం:డా.రాఖీ

నీ పేరులొ మోహన రాగం

నీ ఎదలోనూ అనురాగం

వన స్నేహమే ఒక యోగం

మనకలయికనే ఆమోఘం

1.ఎడారినే వనాలు చేద్దాం

మోడులను చిగురింపచేద్దాం

స్నేహసీమలోనా నిరంతరం విహరిద్దాం

ఆనందాల సందడిలో విందులారగించేద్దాం

2.ఈ జీవన పయనంలో చిత్రంగా కలిసాము

తోడునీడలాగా వెనువెంట నడుద్దాం

కడదాకా బ్రతుకు కడలిని ఒడుపుగ దాటేద్దాం

ఒంటరితనానికే వీడుకోలు పలికేద్దాం

 రచన,స్వరకల్పన&గానం:డా.రాఖీ

తరించాయి రవికిరణాలు నిన్ను తాకి తాకగానే

హసించాయి చిరుపవనాలు నీ మేను సోకగానే

ప్రత్యూషవేళలో  ప్రత్యక్షమైనావు

నే రాసే కవనాక్షరం నీవే నీవే ఐనావు

జాదూ ఏదొ ఉన్నది నీలో జవరాల

జాజిపూల నవ్వులు నాపై చల్లరాదా

1.నీలో ఉన్న గమ్మతేదో నన్ను చిత్తు చేస్తోంది

చిత్రమైన మత్తేదో నన్ను కమ్మివేస్తోంది

నిన్ను ఉపాసించడమే ఏకైక నా లక్ష్యం

ఎప్పటికి కలిగించేవో నా ప్రేమకు మోక్షం

జాదూ ఏదొ ఉన్నది నీలో జవరాల

జాజిపూల నవ్వులు నాపై చల్లరాదా

2.రామప్ప నాగిని శిల్పం నీ ముందు అత్యల్పం

రవివర్మ మోహిని రూపం నీకంటే ఏదో లోపం

నీ రాణ ఆరాధనే నాదైన కర్తవ్యం

దినదినం నీ నెయ్యం నవ్యాతి నవ్యం

జాదూ ఏదొ ఉన్నది నీలో జవరాల

జాజిపూల నవ్వులు నాపై చల్లరాదా

 

https://youtu.be/q-0Wu24PzXA?si=2HOd9V3e86wwyMFD

రచన,స్వరకల్పన&గానం:డా.రాఖీ

నువులేనిదెక్కడమ్మ నిఖిలలోక జనని

అణువణువున అగుపింతువు మార్చి కనగ దృక్పథాన్ని 

వాక్కులో మేథోరుక్కులో జగతిన ప్రతిదిక్కులో

ధనములో మనములో అవనీ జనవనములో

తెగువలో తేకములో ధరణీ నియంత్రణలో

1.అమ్మగా అక్కగా ఆలిగా చెల్లిగా

కొమ్మగా మదిదోచే పున్నమి జాబిల్లిగా

చెమ్మగా కన్నుల జారే మమతల వెల్లిగా

కమ్మగా కడుపునింపు అనురాగవల్లిగా

2.ఊహగా ఆశగా భవిష్యత్తు స్వప్నంగా

డబ్బుగా డాబుగా దర్పంగా సగర్వంగా

కాంతగా చింతగా విపత్తుగా విత్తపు కవ్వింతగా

కాంక్షగా కామనగా కీర్తిగా అంతులేని ఆర్తిగా

3.చోదనగా చోద్యముగా బ్రతుకే నైవేద్యంగా

వేదనలో వేడుకలో ఓలలాడు మద్యంగా

చూపుల ఆయుధంగ హాస అయస్కాంతంగా

బ్రతికించే బలికోరే అని కారణభూతంగా

 రచన.స్వరకల్పన&గానం:డా.రాఖీ

ఎందుకో ఆ మౌనం, ఏమిటో నీ ధ్యానం

మూగభావనేదో నన్ను చేరకుంది

ఎద నివేదనేదో అంతుపట్టకుంది

దాటేసి వెళ్ళవు చాటైతే కానేకావు

ఏమిటో అంతరార్థం ఎరుగనైతి పరమార్థం

1.గాలికి మబ్బుతొ స్పర్శనే ఒక భాష

భువికి రవి ప్రదక్షణే ప్రేమ వంతెన

కడలి ఖంబులకు దిక్చక్రం అలంబన

చినుకు కిరణ ప్రణయానికి హరివిల్లే వారధి

ఎరుగవా ఈ మాత్రం ప్రకృతిగత వలపు సూత్రం

2.మునులను మించిపోయె నీ తపోదీక్ష

శిలా శిల్పమై తెలుపును మనస్సమీక్ష

బ్రద్దలైపోతుంది నిశ్శబ్ధ అగ్ని పర్వతమైనా

అగాధాలు అధిగమించు జలధి బడబానలమైనా

గ్రహించవా నిగ్రహించ వీలవనిది  అనురాగం

 రచన,స్వరకల్పన&గానం:డా.రాఖీ

నారు పోయువాడు నీరుపోయునన్నది నిజమే ఐతే

కాపుకాయువాడు కునుకుతీయడన్నది నానుడే ఐతే

తస్కరించిన నా సంతోషాన్ని ఇపుడే తెచ్చియ్యి

సంస్కరించి నాకు ఆనందాలే కలుగజెయ్యి

అవధూత సాయి మా కడగండ్లు పోనీయి

మహిమల బాబా మాకు నీ చేయూత నీయి

1.ఇమ్మని అడిగానా దుఃఖాన్ని మాకు

కొనితెమ్మని కోరానా  వ్యాధుల్ని మాకు

వేడకున్నా మాకు వెతలెన్నొ ఇచ్చావు

ప్రార్థిస్తున్నాగాని అసలే పట్టించుకోవు

షిరిడీ సాయి మరిమరి చెప్పాలా

సద్గురు సాయి మనసింకా విప్పాలా

2.మంచెంత చేసిన గుర్తింపునీయవు

పొరపాటైతోనో తగిన బుద్ధి గరిపేవు

బోధపడలేదు నీ తత్వమైతే మాకు 

పామరత్వమింక మాకు పోలేదుఎందుకు 

ద్వారకమాయికి మమ్మిపుడే రానీయి

మా గుండె మంటల్ని చల్లార్పి వేయి

 రచన,స్వరకల్పన&గానం:డా.రాఖీ

సైగతొ రమ్మంటావు-మాటతొ పొమ్మంటావు

వస్తే జారుకుంటావు-పోతే  జాలిగొంటావు

అదేంటో ప్రియతమా నీ వాలకం

నీ హృదయమయ్యిందా ఒక లోలకం

1.చేరువకాబోతే  మూతివిరుపులు

దూరంగా జరిగితే వలపు పిలుపులు

కబురంపుతావు కపోతాలతో

కలలోన దూరుతావు వరమాలతో

 అదేంటో ప్రియతమా నీ వైఖరి

అర్థమై చావదు  నీదైన ఈ శైలి

2.వెళ్ళబోస్తావు నాతో నీ వేదనంతా

సాయపడగ వద్దంటావు ఇసుమంతా

వినకుంటే విసుగేల నీకు

మనసుకింక ముసుగేయకు

అదేంటో ప్రియతమా నీతత్వము

సాంత్వనకోసమేనా ప్రతి నేస్తము

 https://youtu.be/ryHd9sFXZSU

రచన,స్వరకల్పన&గానం:డా.రాఖీ

పాలు నా లోపాలు- నీకె అందించెదరా

రోలు నా చిత్తము -నిను బంధించెదరా

వెన్ననే నా మనసు -ఇంక అపేక్షించరా

నా కన్నుల యమునవంక -విహరించరా

జగన్మోహన కృష్ణా -నను గ్రహించరా -అనుగ్రహించరా

1.వలువలు నా వాంఛలు సంగ్రహించరా

చిలువలు పలువలు వలపులు నిగ్రహించరా

కాళీయునివంటివి నా కామనలు మధించరా

కబళించే రిపులార్గురు తక్షణమే వధించరా

జగన్మోహన కృష్ణా నను గ్రహించరా అనుగ్రహించరా

2.గోవులు నా ఇంద్రియాలు పాలించరా

కుబ్జయే నా వక్ర బుద్ధి చేరి లాలించరా

రాధికగా ఎంచి నాతో రతి కేళించరా

సుధామునిగ భావించి నన్నుద్ధరించరా 

జగన్మోహన కృష్ణా నను గ్రహించరా అనుగ్రహించరా